Lamentations 2

Kamba (Mbivilia) 1956

← Chapter 1 Jump to: Chapter 3 →

1A! Mwĩaĩi nũvw’ĩkĩte mwĩĩtu wa Saioni na ĩthweo e mũthatu! Nĩwekisye nthĩ kuma ĩtunĩ wanake wa Isilaeli, Na ndalilikene kavĩla kake ka nyaĩĩ mũthenya wa ũthatu wake.

2Mwĩaĩi nũmeletye motũo onthe ma Yakovo, na ndew’ĩĩte tei: Nũng’uthũlangĩte ngome syĩ vinya sya mwĩĩtu wa Yuta e mũthilĩku; Nĩwitheetye nthĩ; nũvukĩtye ũsumbĩ na anene me mbee ũsumbĩnĩ.

3Nũvetete e na ũthatu mwai kĩla ũvya wa Isilaeli; Nũtũngĩte kw’oko kwake kwa aũme kumya mbee wa mũmaitha: Na nũvĩvĩtye Yakovo o ta mwaki mwakanu, ũla ũminaa ngalĩ syonthe.

4Nũkootete ũta wake ta mũmaitha, nũũngamĩte kw’oko kwake kwa aũme kũilyĩ ta nthũ. Na nĩwũaĩte onthe ala maĩ ma kwendeesya itho: Ĩeemanĩ ya mwĩĩtu wa Saioni nĩwonoetye ũthilĩku wake ta mwaki.

5Mwĩaĩi nũtw’ĩkĩte ta mũmaĩtha, nũmeletye Isilaelĩ; Nũmeletye nyũmba syake syonthe mbanakavye, nĩwanangĩte ngome syake syĩ vinya; Na nĩwingĩvĩtye kĩmeto na kĩĩo mwĩĩtunĩ wa Yuta.

6Na nũvetete wĩkalo wake na vinya, o ta wa mũũnda; nĩwanangĩte vandũ vake va kũũmbana: Yeova nĩũlĩthĩtye mboka ĩtw’ĩtwe o na savato ku Saioni, Na nũvũthĩtye mũsumbĩ na mũthembi ũthilĩkunĩ wa ũthatu wake.

7Mwĩaĩi nĩwĩkĩtye kũasa kĩthembeo kyake, nũthĩthĩte vandũ vake vatheu; Nũnenganĩte mokonĩ ma mũmaitha mawako ma nyũmba syake mbanakavye: Nĩmokĩlĩlye mawasya nyũmbanĩ ya Yeova, o ta mũthenya wa ũmbano ũkilĩtye.

8Yeova nũtw’ĩte kwananga wako wa mwĩĩtu wa Saioni; Nũtambũũkĩtye ũlii, ndatũngĩte kw’oko kwake aeke kwananga: Na nũtumĩte wiio mũlũmu na wako imeta; nileelaa vamwe.

9Mbingĩlo syake nithelele nthĩ; nĩwanangĩte na kũtũla ivĩngi syake: Mũsumbĩ wake na anene make me mbee ũsumbĩnĩ me katĩ wa i mbaĩ vala vate mĩao; Ĩĩ, athani make matyonaa woni kuma kwa Yeova.

10Atumĩa ma mwĩĩtu wa Saioni nĩmekalaa nthĩ, maivindya; Nĩmekisye kĩtoo ĩũlũ wa mĩtwe yoo; nĩmevotoete makunia: Eĩtu atheu ma Yelusaleme nĩmakunamasya mĩtwe yoo kũvika nthĩ.

11Metho makwa nĩmeũseekea ũndũ wa methoi, ngoo yakwa nĩnĩkũũũya; Ĩtema yakwa nĩ yĩtiku ĩũlũ wa nthĩ, nũndũ wa wanangĩko wa mwĩĩtu wa andũ makwa, Nĩkwĩthĩwa syana nini na tũũkenge nikũnyalĩla nzĩanĩ nene sya ndũa.

12Nikũlasya aainyia masyo, Lĩu wa mbaa ngetha na mbinyu syĩva? Yĩla ĩũnyalĩla nzĩanĩ nene sya ndũa ta ala okite, Yĩla ngoo yasyo ĩnĩkwonow’a kĩthũinĩ kya aainyia masyo.

13Ngakũkũsĩĩa ũndũ mwaũ? Ngakũelekan’ya na kyaũ, we mwĩĩtu mũtheu wa Yelusaleme? Ngeanan’ya kyaũ naku, nĩ kana ndonye ũkũkiakisya, we mwĩĩtu mũtheu wa Saioni? Nũndũ ũvũthũe waku nĩ mũnene ta ũkanga: ũla ũtonya ũkũvosya nũũ?

14Athani maku nĩmakwonee mawoni ma ũvũngũ na ũtumanu; Na matyaavuũa ũthũku waku, makũtũnge wume kũtavwanĩ kwaku, Ĩndĩ nĩmakwonee mĩio ya ũvũngũ na maũndũ ma ũtuma ũlũngw’a.

15Onthe ala mavĩtaa makũkũnangĩaa mbĩ; Nĩmekũtimba na kũmũthingithĩsya mũtwe mwĩĩtu wa Yelusaleme, makyasya, Ĩno nĩyo ndũa ĩla andũ mamĩtie Wĩanĩu wa wanake, Ũtanu wa nthĩ yonthe?

16Amaitha maku onthe makwathamĩsye makanyw’a moo mũno; Nĩmatimba na kũvevetan’ya maeo; nĩmekwasya, Nĩtũmũmeletye; Vate ndĩi ũmũnthĩ nĩ mũthenya ũla tweteelete; nĩtũwĩlĩte, nĩtũwonete.

17Yeova nĩwĩkĩte ũndũ watw’ĩte; nĩwĩanĩĩtye ndeto yake ĩla weaie mĩthenya ya tene; Nĩwekisye nthĩ, na ndaew’ĩa tei: Na nũtumĩte mũmaitha atana ĩũlũ waku; nũnenevetye ũvya wa nthũ syaku.

18Ngoo syoo nĩsyamwĩkaĩlile Mwĩaĩi: We wako wa mwĩĩtu wa Saioni, methoi matheee ta ũsĩ mũthenya na ũtukũ; Ndũkeenenge ũthũmũo: ndũkaeke kyũma kya itho yaku kĩkilye.

19Ũkila, kaya ũtukũ, wambĩlĩlyonĩ wa mosyaĩĩsyo; Onosya ngoo yaku ta kĩw’ũ mbee wa ũthyũ wa Yeova: Ũmũkĩlĩlye moko maku ũndũ wa thayũ wa syana syaku nini, ila ĩkũnyalĩla nĩ nzaa wambĩlĩlyonĩ wa kĩla nzĩa nene.

20Ona, ame Yeova, na sisya ũla wamwĩkie ũu! Aka makaya ũsyao woo, o syana ila ithakaw’a mokonĩ? Mũthembi na mwathani makooaĩwa vandũ vatheu va Mwĩaĩi?

21Ũla wa ĩika na mũtumĩa nĩmakomaa nthĩ nzĩanĩ nene; Eĩtu makwa atheu na anake makwa nĩmavalũkĩtw’e na ũvyũ: Nũmoaĩte mũthenya wa ũthatu waku; nĩwũaĩte, na ndwaew’ĩa tei.

22Nũmbĩtĩe motĩsyo makwa maume ngalĩ syonthe, o ta mũthenya wa ũmbano ũkilĩtye; Na vatyaĩ ũmwe wavonokie kana kũtiala mũthenya wa ũthatu wa Yeova: Asu ala nathakasya na kũea mũmaitha wakwa nũmaminĩte.

← Chapter 1 Jump to: Chapter 3 →