Lamentations 5

Kamba (Mbivilia) 1956

← Chapter 4 Jump to:

1Lilikana, ame Yeova, ũndũ ũla wũkie ĩũlũ waitũ: Sisya, noiona kũvũthw’a kwitũ.

2Ũtiĩwa witũ nũalyũlitwe wĩthĩwe wa aeni, Nyũmba sitũ syĩthĩwe sya andũ ma nthĩ ĩngĩ.

3Twĩ atiwa ala makw’ĩĩwe nĩ aaĩthe; Aainyia maitũ no ta ndiwa.

4Nĩtũnyw’ĩte manzĩ maitũ kwondũ wa mbesa; Ngũ sitũ nĩ sya thooa.

5Ala matũatĩĩaa me ngingonĩ sitũ: Twĩ na mĩnoo, na tũti na ũthũmũo.

6Nĩtũmanengete Amisili kw’oko, O na Aasuli, tũvũnw’e nĩ imũtũ.

7Aaĩthe maitũ nĩmeekie naĩ, na ti vo maĩ; Na ithyĩ nĩtũkuĩte mothũku moo.

8Athũkũmi nĩmatũsumbĩkaa: Vati ũmwe wa kũtũvonokya mokonĩ moo.

9Nĩtũkwona lĩu witũ mũisyonĩ wa mathayũ maitũ, Nũndũ wa ũvyũ wa waũni.

10Kĩkonde kitũ nĩ kiũ ta iko. Nũndũ wa ĩvyũvĩ ya muutĩa wa yũa.

11Nĩmakindie aka ma Saioni, Eĩtu atheu ma ndũanĩ sya Yuta.

12Anene me mbee ũsumbĩnĩ masũw’a na moko moo: Mothyũ ma atumĩa matyaataĩwa.

13Anake nĩmakuĩe mavia ma ũthia; Na syana nĩsyalulutĩkile ĩkuĩte ngũ.

14Atumia nĩmaekie kwĩkala mbingĩlonĩ, Na anake wini woo.

15Ũtanu wa ngoo sitũ nũthelete; Kũsunga kwitũ nĩkũalyũkĩte kũtw’ĩke kũmeta.

16Ngovia ya ũsumbĩ nĩ mbalũku kuma mũtwenĩ witũ: Woo nĩ witũ! Nũndũ nĩtwĩkĩte naĩ.

17Nũndũ wa ũu ngoo sitũ nĩ ndevu; Nũndũ wa maũndũ asu metho maitũ me na mbindu;

18Nũndũ wa kĩĩma kya Saioni, kĩla kĩthei: Mbĩwa nikinyaa ĩũlũ wakyo.

19We, ame Yeova, nĩwĩkalaa tene na tene; Kĩvĩla kyaku kya ũsumbĩ nĩkĩkalaa kuma nzyawa na nzyawa.

20Nũndũ wa kĩ woolilwe nĩ ithyĩ tene na tene, Na kũtũtia ĩvinda yĩasavĩte ũu?

21Tũthyũũe ithyĩ kwaku, ame Yeova, na tũkathyũũĩka; Eũvya mĩthenya yaitũ o ta tene.

22Ĩndĩ nũtũleete vyũ; Nũtũthilĩkĩle mũno.

← Chapter 4 Jump to: