Proverbs 1

Kamba (Mbivilia) 1956

Jump to: Chapter 2 →

1Nthimo sya Solomoni mwana wa Ndaviti, mũsumbĩ wa Isilaeli:

2Kũmanya ũĩ na ũmanyĩsyo; Kũvathũkan’ya ndeto sya ũmanyi;

3Kwosa ũmanyĩsyo wa kwĩka ũĩ, Na wa ũlũngalu na wa ũsili wa w’o na katĩ;

4Kũmũnenga ũla ũte ũmanyi kĩlĩko, Na mwanake ũmanyi na kĩlĩko:

5Nĩ kana mũndũ ũla mũĩ ew’e, na kwongeleka kwosa momanyĩsyo; Na nĩ kana mũndũ wa ũmanyi akwate motao meanĩu:

6Kũmanya nthimo, na ũalyũlo wayo, Ndeto sya andũ oĩ, na ndaĩ syoo.

7Kũmũkĩa Yeova nĩ wambĩlĩlyo wa ũmanyi; Ĩndĩ ala atumanu mavũthasya ũĩ na ũmanyĩsyo.

8Mwana wakwa, ĩw’a ũmanyĩsyo wa ĩthe waku, Na ndũkaatie mĩao ya inyia waku:

9Nũndũ makeethĩwa ta ngovia ya mumo mũtwenĩ waku, Na mĩnyoo ngingonĩ yaku.

10Mwana wakwa, ethĩwa andũ athe nĩmeũkũsengasenga, Ndũketĩkĩle.

11Ethĩwa makakwĩa, Ũka tũendan’ye, Twoveesye twĩtĩkye nthakame; Twoveesye kĩmbithĩnĩ ala mate na ĩvĩtyo vate kĩtumi;

12Tũmamelye me thayũ ta Seoli, Na me aima, ta ala matheeaa yĩla iĩmanĩ;

13Tũkoona syĩndũ syonthe syĩ vata mũno; Tũkausũsya nyũmba sitũ na mũtavo:

14Ũkekye mũlimano waku vamwe naitũ; Ithyonthe tũkeethĩwa na ngusu ĩmwe:

15Mwana wakwa, ndũkaendan’ye nzĩanĩ wĩ namo, Siĩĩa kũũ kwaku nzĩanĩ syoo:

16Nũndũ maũũ moo masembaa meke ũthũku, Na mekalaataa metĩkye nthakame.

17Nũndũ nĩ mana kũtambũũkya kĩtei Nyũnyi yene:

18Na asu moveeasya nthakame yoo ene; Moveeasya na kĩmbithĩ mathayũ moo ene.

19Nĩ w’o itilyĩ nzĩa sya kĩla ũmwe wĩ na ĩtomo ya ũtandĩthyo; Nĩyĩvetaa thayũ wa ene mayo.

20Ũĩ nũkayĩaa na wasya mũnene nzĩanĩ nene; Nĩumĩasya wasya waw’o kũndũnĩ kwaamu;

21Nũkayĩaa vandũ va ndaĩa va kũmbanĩa; Ũlikĩlonĩ wa mbingĩlo, Nthĩnĩ wa ndũa, nĩumĩasya ndeto syaw’o:

22Inyw’ĩ mũte ũmanyi, mũkenda kũtamanya kwenyu kũvika ĩndĩĩ? Na akaakaan’ya matanĩa kũkaakaasyanĩ kwoo, Na ndia kũmena ũmanyi?

23Ĩthyũũe kwondũ wa kũkanw’a ninyie: Sisyai, ngoonosya veva wakwa ĩũlũ wenyu; Ngamũmanyĩthya ndeto syakwa.

24Nĩkwĩthĩwa nĩnĩtanĩte, na nĩmũleete; Nĩnĩtambũũkĩtye kw’oko kwakwa, na vati mũndũ ũsisya;

25Ĩndĩ nĩmũtw’ĩte motao makwa onthe mana, Na mũtikwĩtĩkĩla mokan’yo makwa:

26O nakwa ngatheka mũthenyanĩ wa wanangĩko wenyu mũnene; Ngavũa ngũĩ yĩla w’ĩa wenyu wĩũka;

27Yĩla w’ĩa wenyu wĩũka ta kĩlingi, Na wanangĩko wenyu mũnene wĩũka ta kĩlingi; Yĩla monyamao na woo mũnene meũka ĩũlũ wenyu.

28Nĩvo ĩndĩ makengaĩla, ĩndĩ ndikasũngĩa; Makamantha na kĩthing’ĩĩsyo, ĩndĩ matikambona.

29Nũndũ nĩmamenie ũmanyi, Na matyaanyuva kũkĩa Yeova,

30Matyaaĩtĩkĩla motao makwa, Nĩmavũthisye mokan’yo makwa onthe.

31Kwondũ wa ũu makaya ũsyao wa mĩendele yoo ene, Na kusũwa nĩ mĩtavyo yoo ene.

32Nũndũ kũsyoka na ĩtina kwa ala mate ũmanyi kũkamoaa, Na kalengo ka ndia kakasyananga.

33Ĩndĩ o ũla ũmbĩthukĩĩsya akatũaa eyelelye, Na akekala athũmũĩte vate w’ĩa wa ũthũku.

Jump to: Chapter 2 →