Proverbs 2

Kamba (Mbivilia) 1956

← Chapter 1 Jump to: Chapter 3 →

1Mwana wakwa, ethĩwa ũkakwata ndeto syakwa, Na kwiaa mĩao yakwa nthĩnĩ waku,

2O na kũtea kũtũ kwaku wose ũĩ, Na kũnengana ngoo yaku ũmanyinĩ;

3Ĩĩ, ethĩwa ũkaĩĩa kũvathũkan’ya kũseo, Na kũkĩlya wasya waku wone ũmanyi;

4Ethĩwa ũkoomantha ta vetha, Na kũmantha ta syĩndũ mbithe syĩ vata mũno:

5Nĩvo ĩndĩ wĩmanya kũmũkĩa Yeova, Na kwona ũĩ wa Ngai.

6Nũndũ Yeova nũnenganae ũĩ; Kanyw’anĩ wake vaumaa ũmanyĩsyo na ũmanyi:

7Aiaa ũĩ mwĩanĩu kwondũ wa ala alũngalu; Nake nĩ ngao kwa ala maendaa wĩanĩunĩ;

8Kana atonye kũsũvĩa nzĩa sya ũsili wa katĩ, Na kũsũvĩaa mĩendele ya atheu make.

9Nĩvo ĩndĩ wĩmanya ũlũngalu na usili wa w’o, Na katĩ, ĩĩ, kĩla nzĩa nzeo.

10Nũndũ ũĩ ũkalika ngoonĩ yaku, Na ũmanyi ũkendeesya ngoo yaku;

11Kĩlĩko kĩkakũsyaĩĩasya; Ũmanyi ũkakũsũvĩaa:

12Kũũvonokya kuma mĩendelenĩ mĩthũku, Kuma andũnĩ ala maneenaa maũndũ ma ngũlũ;

13Ala matiaa nzĩa sya ũlũngalu, Maendae mĩendelenĩ ya kĩvindu;

14Ala matanaw’a nĩ kwĩka ũthũku, Na kwendeew’a nĩ ngũlũ ya ũla mũthũku;

15Ala athyoekangu mĩendelenĩ yoo, Na me na ngũlũ nzĩanĩ syoo:

16Kũũvonokya kwa mũndũ mũka mũeni, O kwa ũsu wa nthĩ ĩngĩ ũla wendeeasya na ndeto syake sya ũkathĩĩo;

17Ũla wũlawa nĩ mũnyanyae wake wa ũika wake, Na wũlawa nĩ ũtianĩo wa Ngai wake:

18Nũndũ nyũmba yake yangĩe kĩkw’ũnĩ, Na nzĩa syake kwa ala akw’ũ;

19Kũti waasyoka ĩngĩ alika kwake, O na kũvikĩa nzĩa sya thayũ:

20Nĩ kana ũende mũendelenĩ wa andũ aseo, Na kũkwata nzĩa sya alũngalu.

21Nũndũ ala alũngalu makatũa ĩ nthĩ, Na ala eanĩu makamĩkalaa.

22Ĩndĩ ala athũku makavetwa kuma ĩ nthĩ, Na nzeleke ikakũanĩw’a na mĩi syume nthĩnĩ wayo.

← Chapter 1 Jump to: Chapter 3 →