Proverbs 21

Kamba (Mbivilia) 1956

← Chapter 20 Jump to: Chapter 22 →

1Ngoo ya mũsumbĩ yĩ kwiokonĩ kwa Yeova ta mokinyĩlo ma manzĩ: Nake amĩthyũũaa o vala ũnũkwenda.

2Kĩla mũendele wa mũndũ nĩ mũlũngalu methonĩ make mwene; Ĩndĩ Yeova athimaa ngoo.

3Kwĩka ũlũngalu na ũsili wa katĩ Nĩkwĩtĩkĩlawa nĩ Yeova kwĩ nthembo.

4Mũsyaĩlye wa mĩng’athĩlĩlyo, na ngoo ya ngathĩĩo, O taa wa ũla mũthũku, nĩ naĩ.

5Mosũanĩo ma ala athingu maelete wingĩnĩ wa syĩndũ; Ĩndĩ kĩla mũndũ ũla wĩkalaataa ekalaataa kũvika akaĩwe tũ.

6Kwosa mothwĩĩ kwondũ wa ĩũmĩ ũla ũneenaa ũvũngũ Nĩ mũki ũtwaawa kũũ na kũũ nĩ ala mamanthaa kĩkw’ũ.

7Ũng’endu wa ala athũku ũkamatwaa kũasa, Nĩkwĩthĩwa nĩmaleaa kũsila katĩ.

8Mũendele wa ũla ũitavĩwe nĩ naĩ nĩ mũthyoeku mũno; Ĩndĩ ũndũ wa ũla mũtheu, wĩa wake nĩ mũlũngalu.

9Nĩ kavaa kwĩkalaa kĩkotonĩ kya nyũmba ĩũlũ, Kwĩ kwĩkalaa na mũndũ mũka wĩ ĩteta nyũmbanĩ nthanthau.

10Ngoo ya ũla mũthũku nĩyendaa ũthũku: Mũtũi wake ndonaa ũseo methonĩ make.

11Yĩla mũkaakaan’ya wakũnwa, ũla ũte ũmanyi nũtw’ĩkaa mũĩ; Na yĩla ũla mũĩ wamanyĩw’a, nĩwosaa ũmanyi.

12Mũndũ mũlũngalu nũsũanĩaa ũndũ wa nyũmba ya ũla mũthũku, Ũndũ athũku mavalũkaw’a manangĩke.

13O ũla ũkunĩkaa matũ matikew’e kĩĩo kya ngya, Nake akaĩa, ĩndĩ ndakew’ĩka.

14Mũthĩnzĩo kĩmbithĩnĩ nũvoovasya ũthatu; Na mũthĩnzĩo kĩthũinĩ nũvoovasya ũthilĩku mwai.

15Nĩ ũtanu kwa ala alũngalu kũsila katĩ; Ĩndĩ nĩ wanangiko kwa eki ma ũthũku.

16Mũndũ ũla wangangaa kuma nzĩanĩ ya ũmanyi Akathũmũa ũmbanonĩ wa akw’ũ.

17Ũla wendaa motanu akeethĩwa mũndũ ngya: Ũla wendaa mbinyu na mauta ndakethĩwa mũthwii.

18Ũla mũthũku nĩ mbovosya kwondũ wa ũla mũlũngalu; Na nzeleke nĩyũkaa vandũ va ũla mũlũngalu.

19Nĩ kavaa kũtũaa nthĩ yĩ yalata, Kwĩ kũtũaa na mũndũ mũka wĩ ngananĩo na mũnyungunyĩsyo.

20Ve syĩndũ syĩ vata mũno o na mauta ũtũonĩ wa ala oĩ; Ĩndĩ mũndũ mũtumanu nĩwimelasya.

21Ũla ũatĩĩaa ũlũngalu na ũseo Nĩwonaa thayũ, na ũlũngalu, na ndaĩa.

22Mũndũ mũĩ nũlĩsaa alike ndũanĩ ya ala me na ũtonyi, Na aitheeesya vinya wa wĩkwatyo wayo.

23Ũla ũsũvĩaa kanyw’a wake na ũĩmĩ wake Nũsũvĩaa ngoo yake mathĩna.

24Mũndũ e na ngathĩĩo na wĩng’athĩlĩlyo, syĩtwa yake nĩ mũkaakaan’ya; Nũtethasya wĩa wĩnenevyonĩ wa ngathĩĩo.

25Kwenda kwa ũla mũtulu nĩkũmũaaa; Nũndũ moko make nĩmaleaa kũtethya wĩa.

26Kwĩ ũla wĩw’aa ĩtomo na ũtoonu mũthenya w’onthe; Ĩndĩ ũla mũlũngalu nũnenganae na ndaimaa.

27Nthembo ya ũla mũthũku nĩ ũthatyo: Nĩ mbee veana ata, yĩla wĩete na kĩlilikano kĩthũku!

28Ngũsĩ ya ũvũngũ ĩkaaa; Ĩndĩ mũndũ ũla wĩw’aa akaneenaa ĩndĩ yonthe.

29Mũndũ mũthũku nĩwetasya ũthyũ wake; Ĩndĩ ũndũ wa ũla mũlũngalu, nake nũlũlũmĩlasya mĩendele yake.

30Vati ũĩ kana ũmanyi Kana ũtao ũtonya kũkita na Yeova.

31Mbalasi nĩyũmbanĩtw’e ũndũ wa mũthenya wa kaũ; Ĩndĩ ũkĩlyo nĩ wa Yeova.

← Chapter 20 Jump to: Chapter 22 →

Recommended Reading

Commentary Proverbs Commentaries → Devotional Proverbs Devotional Guide → Get This Bible Mbivilia Study Bible →