1 John 1

Kamba (MBIVILIA ŨVOO MŨSEO)

Jump to: Chapter 2 →

1Twĩmũtavya ĩũlũ wa Ndeto ĩla ĩnenganae thayũ, na yaĩ kw'o kuma mwambĩlĩĩlyonĩ. Ithyĩ nĩtwamĩwie, na twamyona na metho, na twamĩketeea o na twamĩkwata na moko maitũ.

2Yĩla thayũ ũsu waumĩlilw'e, ithyĩ nĩtwawonie na twaũkũsĩĩa, na yu twĩmũtavya ĩũlũ wa thayũ ũsu wa tene na tene, ũla waĩ vamwe na Asa na waumĩlilw'e kwitũ.

3Twĩmũtavya kĩu ithyĩ twonete na twĩw'ĩte, nĩ kana o nenyu mũtonye kwĩthĩwa mũamba naitũ, nthĩnĩ wa mũamba ũla twĩ naw'o na Asa na Mwana wake Yesũ Klĩsto.

4Twĩmũandĩkĩa maũndũ aa nĩ kana ũtanu witũ wĩthĩwe wĩ musũu.

5Ũtũmani ũla twĩw'ĩte kuma kwa Yesũ Klĩsto, na tũũmũtavya nĩw'o ũũ: Ngai nĩ kyeni na nthĩnĩ wake vai kĩvindu o na vanini.

6Ethĩwa twĩasya twĩ mũamba nake na twĩkalaa kĩvindunĩ, nĩtũũkengana na tũyĩkalaa kwĩanana na ũla w'o.

7Ĩndĩ ethĩwa twĩĩkala kyeninĩ o tondũ we wĩ kyeninĩ, twĩ na mũamba katĩ waitũ, na nthakame ya Yesũ Mwana wake nĩtũtheasya naĩ syonthe.

8Ethĩwa twĩasya tũi na naĩ, nĩtũkwĩkenga ithyĩ ene, na ũla w'o ndwĩ nthĩnĩ waitũ.

9Ĩndĩ twaumbũla naĩ sitũ kwa Ngai, we nĩmũĩkĩĩku na ekaa ũla waĩlu, kwoou nũkũtũekea naĩ sitũ na kũtũthesya mothũku onthe.

10Ethĩwa twĩasya tũyĩkĩte naĩ, twĩtw'a Ngai kwĩthĩwa mũkengani, na ndeto yake ndĩ nthĩnĩ waitũ.

Jump to: Chapter 2 →