1 John 5

Kamba (MBIVILIA ŨVOO MŨSEO)

← Chapter 4 Jump to:

1Mũndũ ũla wĩtĩkĩlaa kana Yesũ nĩwe Klĩsto, ũsu nĩ kana ka Ngai. Mũndũ o na wĩva ũla wendete ĩthe wa syana, nĩwendete syana sya mũsyai ũsu o nasyo.

2Kĩĩ nĩkyo kĩtũmanyĩthasya kana nĩtũsyendete syana sya Ngai: Kũmwenda Ngai na kwĩkaa ũndũ mĩao yake ĩkwasya.

3Kũmwenda Ngai nĩ kwĩkaa ũndũ mĩao yake ĩkwasya, na ti ũndũ wĩ vinya kũmĩatĩĩa.

4Kĩla ũmwe ũsyaĩtwe nĩ Ngai nũtonya kũsinda maũndũ ma nthĩ, na nĩ kwa nzĩa ya mũĩkĩĩo twĩ na ũsindi ĩũlũ wa maũndũ ma nthĩ.

5Nĩ mũndũ wĩva ũtonya kũsinda maũndũ ma nthĩ? No ũla wĩtĩkĩlaa kana Yesũ nĩ Mwana wa Ngai.

6Ũũ nĩ we ũla wookie na kĩw'ũ kya ũvatiso wake na nthakame ya kĩkw'ũ kyake, nake nĩ Klĩsto Yesũ. Ndaaũka na kĩw'ũ kĩ kyoka, ĩndĩ ookie na kĩw'ũ o vamwe na nthakame. Veva mwene nũkũsĩĩaa kana ũu nĩ wa w'o, nũndũ Veva nĩ we ũw'o.

7Kwa w'o ngũsĩ nĩ itatũ:

8Veva, kĩw'ũ na nthakame; na syonthe syĩ itatũ, inenganae ũkũsĩ o ũmwe.

9Nĩtwĩtĩkĩlaa ũkũsĩ wa andũ, ĩndĩ ũkũsĩ wa Ngai nĩ mũnene mbeange, na Ngai nĩ we ũnenganĩte ũkũsĩ ĩũlũ wa Mwana wake.

10Kwoou mũndũ ũla ũmwĩtĩkĩlaa Mwana wa Ngai e na ũkũsĩ ũsu ngoonĩ yake. Ĩndĩ ũla ũtekwĩtĩkĩla ũkũsĩ ũla Ngai ũnenganĩte ĩũlũ wa Mwana wake, emwosa Ngai ta mũkengani, nĩkwĩthĩwa ndekwĩtĩkĩla ũndũ Ngai ũneenete ĩũlũ wa Mwana wake.

11Ũũ nĩw'o ũkũsĩ: Ngai nũtũnengete thayũ ũtathela, na thayũ ũsu wumaa vala ve Mwana wake.

12Kwoou mũndũ ũla wĩ na Mwana wa Ngai ngoonĩ yake e na thayũ ũsu, ĩndĩ ũla ũte na Mwana wa Ngai ngoonĩ yake nde na thayũ ũsu.

13Nĩmũandĩkĩa maũndũ aa inyw'ĩ ala mũĩkĩĩa Mwana wa Ngai, nĩ kana mũmanye mwĩ na thayũ ũtathela.

14Twĩ na ũkũmbaũ wa kũthi mbee wa Ngai, na nĩtwĩsĩ vyũ kana nũtwĩw'aa ethĩwa twĩmũvoya kwĩanana na kwenda kwake.

15Ethĩwa nĩtwĩsĩ kana Ngai nũtwĩw'aa yĩla tũũvoya, nĩtwĩsĩ vyũ kana twĩthĩawa twakwata kĩla twamwĩtya.

16Ethĩwa mũndũ nĩwoona ũngĩ ayĩka naĩ ĩla ĩtatonya kũlikya mũndũ kĩkw'ũnĩ, nĩwaĩlĩte kũvoya Ngai, nake Ngai akanenga mũndũ ũsu thayũ. Ũu no kwa mũndũ ũla naĩ yake ĩtatuma alika kĩkw'ũnĩ. Ĩndĩ ve naĩ ĩlikasya andũ kĩkw'ũnĩ, na nyie ndiũmwĩa mũvoye Ngai kwondũ wa mũndũ ũla wĩkĩte naĩ ĩsu.

17Kwĩka ũndũ o na wĩva ũte mwaĩlu nĩ naĩ, ĩndĩ ve naĩ ĩtatonya kũlikya mũndũ kĩkw'ũnĩ.

18Nĩtwĩsĩ kana vai ũmwe wa syana sya Ngai wĩ kĩmanyĩo kya kwĩkaa naĩ, nũndũ Mwana wa Ngai nũmasũvĩaa, na Ũla Mũthũku ndatonya kũmeka naĩ.

19Nĩtwĩsĩ kana ithyĩ twĩ ma Ngai, o na kau nthĩ yonthe nĩsumbĩkĩtwe nĩ Ũla Mũthũku.

20O ta ũu nĩtwĩsĩ kana Mwana wa Ngai nĩwookie na nũtũnengete ũmanyi, nĩ kana tũvikĩe kũmũmanya Ngai ũla wa w'o. Ithyĩ tũtũaa nthĩnĩ wa Ngai ũla wa w'o, na nthĩnĩ wa Mwana wake Yesũ Klĩsto; ũũ nĩwe Ngai ũla wa w'o, na ũsu nĩw'o thayũ ũtathela.

21Atĩĩ syana, ĩkalaai mwĩsũvĩanĩte na ngai sya mĩvw'anano!

← Chapter 4 Jump to: