1 John 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Endwa makwa, mũikaĩkĩĩe kĩla mũndũ ũkwasya e na Veva, ĩndĩ mekuũei mũsisye kana veva ũla mũndũ wĩ naw'o wumĩte kwa Ngai, nũndũ athani aingĩ ma ũvũngũ nĩmaumĩlĩte kĩla vandũ ĩũlũ wa nthĩ.

2Mũkamanyaa kana Veva nĩ wa Ngai kwa nzĩa ĩno: Mũndũ o na wĩva ũla ũkũsĩĩaa kana Yesũ Klĩsto ookie atw'ĩka mũndũ e na Veva wa Ngai.

3Ĩndĩ mũndũ ũla ũtakũsĩĩa ũu ĩũlũ wa Yesũ, ũsu nde na Veva wa Ngai. Veva ũla wĩ naw'o nĩ wa nthũ ya Klĩsto, ũla mweewie ũkoka na oyu tũĩ wĩ kw'o kũũ nthĩ.

4Syana syakwa, mwĩ ma Ngai na nĩmũkĩlĩtye athani ma ũvũngũ vinya, nĩkwĩthĩwa Veva ũla wĩ nthĩnĩ wenyu e vinya kwĩ ũsu wĩ andũnĩ ma nthĩ.

5Athani asu ma ũvũngũ nĩ andũ ma nthĩ, na kwoou maneenaa maũndũ ma nthĩ, nayo nthĩ ĩimethukĩĩsya.

6Ĩndĩ ithyĩ twĩ ma Ngai. Mũndũ ũla ũmwĩsĩ Ngai nũtwĩthukĩĩasya, ĩndĩ ũla ũte wa Ngai ndatwĩthukĩĩasya. Ũu nĩw'o tũmanyaa kĩvathũkany'o katĩ wa Veva ũla wa w'o na veva wa ũvũngũ.

7Endwa makwa, nĩtwendanei ũmwe kwa ũla ũngĩ, nũndũ wendo wumaa kwa Ngai. Mũndũ ũla wĩthĩawa na wendo nĩ kana ka Ngai na nũmwĩsĩ Ngai.

8Mũndũ ũla ũtethĩawa na wendo ndamwĩsĩ Ngai, nũndũ Ngai nĩ wendo.

9Ngai atwonisye wendo wake kwa kũmũtũma Mwana wake e ũmwe kũũ nthĩ, nĩ kana twĩthĩwe na thayũ kwĩsĩla kwake.

10Naw'o ũũ nĩw'o wendo: Ti ithyĩ twamwendie Ngai, ĩndĩ nĩwe watwendie na atũma Mwana wake atw'ĩke nthembo ya kũveta naĩ sitũ.

11Endwa makwa, ethĩwa Ngai atwendie mũno wĩana ũu, o naitũ nĩtwaĩlĩte kwendana ũmwe kwa ũla ũngĩ.

12Vai mũndũ waamwona Ngai, ĩndĩ ethĩwa nĩtũkwendana ũmwe kwa ũla ũngĩ, Ngai ekalaa nthĩnĩ waitũ, na wendo wake nĩwĩanĩw'e nthĩnĩ waitũ.

13Tũmanyaa kana nĩtũtwĩe nthĩnĩ wa Ngai, nake akatũa nthĩnĩ waitũ nũndũ nũtũnengete Veva wake.

14Ithyĩ nĩtwonete na nĩtũũkũsĩĩa kana Asa nĩwatũmie Mwana wake atw'ĩke Mũtangĩĩi wa nthĩ.

15Mũndũ ũla ũkũsĩĩaa kana Yesũ nĩ Mwana wa Ngai, Ngai nũtwĩe nthĩnĩ wake, nake nũtwĩe nthĩnĩ wa Ngai.

16Kwoou ithyĩ nĩtwĩsĩ na nĩtũĩkĩĩaa kana Ngai nũtwendete. Ngai nĩ wendo, na mũndũ ũla ũtũaa nthĩnĩ wa wendo atũũaa nthĩnĩ wa Ngai, na Ngai atũaa nthĩnĩ wake.

17Kwa nzĩa ĩsu wendo nĩwĩanĩw'e nthĩnĩ waitũ nĩ kana twĩĩthĩwa na ũkũmbaũ Mũthenyanĩ wa Ũsilĩlo, nũndũ mwĩkalo witũ kũũ nthĩ ũilyĩ ta ũla wa Klĩsto.

18Vala ve wendo vai w'ĩa; wendo mwĩanĩu nũlũngasya w'ĩa vyũ. Kwoou mũndũ ũla wĩthĩawa na w'ĩa ethĩawa ate mwĩanĩu nthĩnĩ wa wendo, nũndũ w'ĩa ũkonanĩtye na maũndũ ma ũsilĩlo.

19Twendanaa nũndũ Ngai nĩwambie kũtwenda.

20Mũndũ ũla waasya, “Nyie nĩnĩmwendete Ngai,” na aimena mũndũ ũla ũngĩ, nĩ mũkengani, nũndũ mũndũ ũla ũtamwendaa mũndũ ũla ũmwonaa na metho, ndatonya kũmwenda Ngai ũla ũtaamwona.

21Kwoou mwĩao ũla Klĩsto watũnengie nĩ ũũ: Mũndũ ũla ũmwendaa Ngai, o ta ũu no nginya amwende mũndũ ũla ũngĩ.

← Chapter 3 Jump to: Chapter 5 →