1 John 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Kwa sisyai ũndũ Asa wĩ na wendo ũnenevete kwitũ atĩ twĩtwe syana sya Ngai, na kwa w'o twĩ syo. Kĩtumi kya andũ ma nthĩ kwĩthĩwa matatwĩsĩ nĩkwĩthĩwa mayaamũmanya Ngai.

2Endwa makwa, oyu twĩ syana sya Ngai, ĩndĩ kĩla tũkatw'ĩka kĩinamba kũvuanw'a. Ĩndĩ nĩtwĩsĩ kana yĩla Klĩsto wĩũka, tũkeethĩwa tũilyĩ take, nũndũ tũkamwona o ũndũ we ũilyĩ.

3Kwoou mũndũ ona wĩva ũla wĩ na wĩkwatyo ũsu, nĩwĩtheasya o tondũ Klĩsto mũtheu.

4Mũndũ ũla wĩkaa naĩ nũvĩtĩtye kwa kũtũla mĩao ya Ngai, nũndũ naĩ nĩkũtũla mĩao.

5Nĩmwĩsĩ kana Klĩsto ookie kũveta naĩ sya andũ, na kana nthĩnĩ wake vai naĩ.

6Kwoou mũndũ ũla wĩkalaa nthĩnĩ wa Klĩsto ndaendeeaa kwĩka naĩ; mũndũ ũla wĩkaa naĩ ndaamwona Klĩsto kana kũmũmanya.

7Syana syakwa, mũiketĩkĩle mũndũ amũkenge. Mũndũ ũla wĩkaa ũla waĩlu nĩ mũlũngalu o tondũ Klĩsto nĩ mũlũngalu.

8Mũndũ ũla ũendeeaa kwĩka naĩ nĩ wa Satani, nũndũ Satani nĩwavĩtisye kuma mwambĩlĩĩlyonĩ. Kĩtumi kya kũka kwa Mwana wa Ngai kyaĩ kwananga mawĩa ma Satani.

9Mũndũ ona wĩva ũla nĩ kana ka Ngai ndaendeeaa kwĩka naĩ, nũndũ e na wũmbo wa Ngai nthĩnĩ wake. Na nũndũ Ngai nĩwe Ĩthe wake, ndatonya kũendeea kwĩka naĩ.

10Kĩvathũkany'o kya syana sya Ngai na syana sya Satani nĩkyo kĩĩ: Mũndũ ũla ũtekaa ũla waĩlu, kana ũtamwendaa mũndũ ũla ũngĩ ti kana ka Ngai.

11Ũtũmani ũla mweewie kuma mwambĩlĩĩlyonĩ nĩ ũũ: No nginya twendane ũmwe kwa ũla ũngĩ.

12Tũyaĩlĩte kwĩkala ta Kaini, ũla wooaie mwana-a-inyia nũndũ wa kũtongoew'a nĩ Ũla Mũthũku. Amũaie nũndũ wa kĩ? Nũndũ meko make maĩ mathũku na ma mwana-a-inyia Aveli maĩ maseo.

13Mũikaseng'e mbaitũ nũndũ wa kwĩthĩwa andũ ma nthĩ nĩmamũmenete.

14Nĩtwĩsĩ kana nĩtumĩte kĩkw'ũnĩ tũkalika thayũnĩ, nũndũ nĩtũmendete andũ ala angĩ. Mũndũ ũte na wendo aendeeaa na kwĩkala ũtonyinĩ wa kĩkw'ũ.

15Mũndũ ũla ũmenaa mwana-a-ĩthe nĩ mũaani, na nĩmwĩsĩ kana vai mũaani wĩ na thayũ wa tene na tene nthĩnĩ wake.

16Ũũ nĩw'o tũmanyaa wendo nĩ mwaũ: Klĩsto nĩwanenganie thayũ wake kwondũ witũ; kwoou o naitũ nĩtwaĩlĩte kwĩnengane kwondũ wa andũ ala angĩ.

17Ethĩwa mũndũ nĩ mũthwii na ayona mwana-a-inyia e na thĩna, ĩndĩ ayũmya ngoo na kũlea kũmũtethya, mũndũ ũsu atonya ata kwasya kana nũmwendete Ngai?

18Syana syakwa, wendo witũ ndũkethĩwe wĩ o wa ndeto nthei, ĩndĩ wĩthĩwe wĩ wendo wa w'o na wa meko.

19Kwa nzĩa ĩsu tũkamanya kana twĩ ma ũla w'o, na wasya witũ wa ngoo ũkausya mbee wa Ngai.

20Nũndũ o na ethĩwa ngoo sitũ niũtũsilĩla, nĩtwĩsĩ kana Ngai nĩ mũnene kwĩ wasya witũ wa ngoo, na nĩwĩsĩ maũndũ onthe.

21Kwoou endwa makwa, ethĩwa ngoo sitũ iiũtũsilĩla tũkeethĩwa na ũkũmbaũ kũka mbee wa Ngai,

22na tũkakwata kuma kwake kyonthe kĩla twĩvoya, nũndũ nĩtwĩkaa ũndũ mĩao yake ĩkwasya na kwĩkaa kĩla kĩmwendeeasya.

23Mwĩao wake naw'o nĩw'o ũũ: Twĩtĩkĩle ĩsyĩtwanĩ ya Mwana wake Yesũ Klĩsto, na kwendana ũmwe kwa ũla ũngĩ o tondũ Klĩsto watwĩaĩie.

24Andũ ala mekaa ũndũ mĩao ya Ngai ĩkwasya mekalaa nthĩnĩ wake, nake ekalaa nthĩnĩ woo. Na tũmanyaa kana Ngai nũtwĩe nthĩnĩ waitũ kwĩsĩla kwa Veva ũla ũtũnengete.

← Chapter 2 Jump to: Chapter 4 →