1 John 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Syana syakwa, nĩmũandĩkĩa maũndũ aa nĩ kana mũikeke naĩ, ĩndĩ ũndũ mũndũ wĩka naĩ, twĩ na ũla ũtwĩsũvanĩaa kũla kwĩ Asa, nake nĩ Yesũ Klĩsto ũla wĩkaa kwenda kwa Ngai.

2Klĩsto nĩwe nthembo ya kũveta naĩ sitũ, na ti sitũ syoka, ĩndĩ o vamwe na naĩ sya andũ onthe ma nthĩ.

3Tũkamanyaa kana kwa w'o nĩtũmwĩsĩ Ngai kwa kwĩkaa ũndũ mĩao yake ĩkwasya.

4Mũndũ ũla waasya, “Nyie nĩnĩmwĩsĩ Ngai,” na ndekaa ũndũ mĩao yake ĩkwasya, nĩ mũkengani na ũla w'o ndwĩ nthĩnĩ wake.

5Ĩndĩ mũndũ ũla ũkwataa ndeto ya Ngai, ũsu nĩwe wĩ na wendo mwĩanĩu kwa Ngai nthĩnĩ wake. Nayo ĩno nĩyo nzĩa ĩla tũkamanyaa kana twĩ vamwe na Ngai:

6Mũndũ ũla waasya atũaa nthĩnĩ wa Ngai, no nginya akaatĩĩa mwĩkalo wa Yesũ Klĩsto.

7Endwa makwa, mwĩao ũũ ngũmũandĩkĩa ti mweũ; nĩ mwĩao mũkũũ mwĩthĩĩtwe naw'o kuma mwambĩlĩĩlyonĩ. Mwĩao ũsu mũkũũ nĩ ũtũmani ũla mũminĩte kwĩw'a.

8Ũu wĩ o vo, mwĩao ũla ngũmũandĩkĩa nĩ mweũ, naw'o ũw'o wa mwĩao ũsu nũkwoneka nthĩnĩ wa Klĩsto na nthĩnĩ wenyu o ta ũu, nũndũ kĩvindu kĩendee kũthela, na kyeni kĩla kya w'o nĩkyambĩĩe kũkena.

9Mũndũ ũla waasya kana e kyeninĩ na nũmenaa mũndũ ũla ũngĩ, mũndũ ũsu e o kĩvindunĩ.

10Mũndũ ũla wendaa mũndũ ũla ũngĩ ekalaa kyeninĩ, na vai kĩndũ nthĩnĩ wake kĩtuma mũndũ ũngĩ asya mũĩkĩĩo.

11Ĩndĩ mũndũ ũla ũmenaa mũndũ ũla ũngĩ e kĩvindunĩ, na aendaa e kĩvindunĩ; ndethĩawa esĩ kũla ũendete nũndũ kĩvindu nĩkĩmũtwĩte kĩlalinda.

12Nĩmũandĩkĩa inyw'ĩ syana syakwa, nũndũ nĩmũekewe naĩ syenyu kwondũ wa Klĩsto.

13Nĩmũandĩkĩa inyw'ĩ aanau, nĩkwĩthĩwa nĩmũmwĩsĩ ũla waĩ kw'o kuma mwambĩlĩĩlyonĩ. Nĩmũandĩkĩa inyw'ĩ anake, nĩkwĩthĩwa nĩmũkĩlĩtye Ũla Mũthũku vinya. Nĩmũandĩkĩa inyw'ĩ syana nini, nĩkwĩthĩwa nĩmũmwĩsĩ Asa.

14Nĩmũandĩkĩa inyw'ĩ aanau, nĩkwĩthĩwa nĩmũmwĩsĩ ũla waĩ kw'o kuma mwambĩlĩĩlyonĩ. Nĩmũandĩkĩa inyw'ĩ anake, nĩkwĩthĩwa mwĩ na vinya; ndeto ya Ngai yĩ nthĩnĩ wenyu, na nĩmũkĩlĩtye Ũla Mũthũku vinya.

15Mũikamyende nthĩ kana kĩndũ o na kĩva kya nthĩ. Mũndũ ũla ũmyendaa nthĩ ndamwendete Asa.

16Syĩndũ syonthe sya nthĩ ta wendi mũthũku wa mwĩĩ, wendi wa syĩndũ ila mũndũ woonaa, na mĩyono nũndũ wa kwĩthĩwa na ũthwii iyumaa kwa Asa ĩndĩ nĩ sya kũũ nthĩ.

17Nthĩ ĩno na mawendi mayo nivĩtĩte, ĩndĩ mũndũ ũla wĩkaa kwenda kwa Ngai atũaa tene na tene.

18Syana syakwa, yĩĩ nĩ ĩvinda ya mũminũkĩlyo, na o tondũ mweewie kana Nthũ ya Klĩsto ĩkooka, oyu tũĩ Nthũ mbingĩ sya Klĩsto niminĩte kũka. Kwoou nĩtwĩsĩ kana twĩ ĩvindanĩ ya mũminũkĩlyo.

19Andũ asu maumĩte katĩ waitũ, ĩndĩ kwa w'o mayaĩ ma nguthu yaitũ. Kethĩwa maĩ ma nguthu yaitũ, methĩwa maendeeie kwĩkala naitũ; ĩndĩ kũthi kwoo nĩkwoonanisye kana kwa w'o mayaĩ maitũ.

20Ĩndĩ inyw'ĩ nĩmũnengetwe Veva Mũtheu nĩ Klĩsto, na kwoou inyw'onthe nĩmwĩsĩ ũw'o.

21Ndiũmũandĩkĩa nĩkwĩthĩwa mũyĩsĩ ũla w'o, ĩndĩ nũndũ nĩmũwĩsĩ, na nĩmwĩsĩ kana vai ũvũngũ wumaa nthĩnĩ wa ũw'o.

22Nũũ ĩndĩ mũkengani? Nĩ mũndũ ũla ũkaĩaa kana Yesũ nĩwe Masia. Mũndũ ũsu nĩwe Nthũ ya Klĩsto, ũla ũkaĩaa Asa na Mwana.

23Vai mũndũ ũmũkaĩaa Mwana na ayĩthĩwa e mũamba na Asa; mũndũ ũla ũmwĩtĩkĩlaa Mwana, ethĩawa e mũamba na Asa.

24Inyw'ĩ ĩndĩ, ekai kĩla mweewie kuma mwambĩlĩĩlyonĩ kĩendee kwĩkala nthĩnĩ wenyu. Ethĩwa nĩkĩkũendeea kwĩkala, o nenyu nĩmũkũendeea kwĩkala nthĩnĩ wa Mwana na nthĩnĩ wa Asa.

25Kĩĩ nĩkyo Klĩsto watwathie, nakyo nĩ thayũ ũtathela.

26Nĩmũandĩkĩa maũndũ aa nĩ kana mwĩsũvĩane na andũ ala mekwenda kũmũkenga.

27Klĩsto nũmũnengete Veva Mũtheu, na Veva ũsu wake aendee kwĩkala nthĩnĩ wenyu, mũi na vata wa kũmanyĩw'a nĩ mũndũ. Veva ũsu nũmũmanyĩasya maũndũ onthe, na momanyĩsyo make nĩ ma w'o, ti ma ũvũngũ. Kwoou kwatai momanyĩsyo make na mũyĩkala nthĩnĩ wa Klĩsto.

28Kwoou ĩndĩ syana syakwa, endeeai kwĩkala nthĩnĩ wa Klĩsto, nĩ kana ĩvinda yĩla wĩumĩla, twĩĩthĩwa na ũkũmbaũ na tũteũmwĩvithĩla nĩ nthoni ooka.

29Nĩmwĩsĩ kana Klĩsto nĩ mũlũngalu, na kwoou mũndũ ũla wĩkaa ũla waĩlu nĩ kana ka Ngai.

← Chapter 1 Jump to: Chapter 3 →