Amos 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Andũ ma Ĩsilaeli ĩthukĩĩsyei ũtũmani ũũ, ũla Mwĩai Ngai ũneenete ĩũlũ wenyu, inyw'ĩ andũ onthe ala Ngai waumisye nthĩ ya Misili.

2“Katĩ wa mbaĩ syonthe ĩũlũ wa nthĩ, no inyw'ĩ nĩsĩ. Kwoou nĩngũmũkany'a nũndũ wa mothũku menyu onthe.”

3Nĩkũlya, andũ elĩ nĩmaendanasya vandũ, matew'anĩte kwĩka ũu?

4Mũnyambũ nũlulumaa wĩ kĩthekanĩ, ũtakwatĩte nyamũ ya kũya? Mũnyambũ wa mũika nũkoomeaa kĩsumonĩ kyaw'o, ũtakwatĩte kĩndũ?

5Nyũnyi nĩtheeaa ĩkakwatw'a nĩ kĩtei, ethĩwa kĩteinĩ vai kĩndũ kya kũtuma yũka vo? Kĩtei nĩkĩvyanyũkaa vala kĩteetwe, kĩtanakwatya kĩndũ o na kĩmwe?

6Soo wa kaũ nũvuvawa ndũanĩ, andũ makalea kũkwatwa nĩ w'ĩa? Ũthũku nũkwataa ndũa, ate o Mwĩai Ngai aũetete?

7Kwa w'o Mwĩai Ngai Mũsumbĩ ndekaa ũndũ, atanamba kũvuanĩsya athũkũmi make athani mũvango wake.

8Yĩla mũnyambũ waluluma, ũla ũtakwatawa nĩ w'ĩa nũũ? Yĩla Mwĩai Ngai Mũsumbĩ waneena, ũla ũlea kũtavany'a ũtũmani wake nũũ?

9Tavyai andũ ala matũaa nyũmbanĩ sya kĩ-ũsumbĩ sya Misili na sya Asitoti mũmee atĩĩ, “Ũmbanĩai iĩmanĩ sya Samalia mwone mothũku ala me kũu, na ũndũ andũ ma kw'o mathĩnaw'a.”

10Mwĩai Ngai easya atĩĩ, “Andũ asu mayĩsĩ kwĩka ũndũ ũla waĩlĩte, mausũasya nyũmba syoo na syĩndũ mosete kwa nzĩa ya ũng'endu na ũng'ei.”

11Kwoou Mwĩai Ngai easya atĩĩ, “Mũmaitha akeelingĩla nthĩ yoo, na kwananga kũndũ kwoo kũlũmu, na ayũya syĩndũ ila syĩ nyũmbanĩ syoo nene.”

12Mwĩai Ngai easya atĩĩ, “O ũndũ mũĩthi ũtangĩĩaa maũũ elĩ, kana kũtũ kwa ĩlondu yaĩwa nĩ mũnyambũ, now'o andũ ma Ĩsilaeli ala mekalaa mĩthyanĩ ya itanda Samalia, na mekalĩlaa ivĩla syoo Ndamasikũ metangĩĩwa.”

13Mwĩai Ngai Mũsumbĩ Mwene Ũtonyi W'onthe easya atĩĩ, “Ĩthukĩĩsyei yu, na mũitavya nzyawa sya Yakovo mũsyĩe

14kana mũthenyanĩ ũla ngakany'a andũ ma Ĩsilaeli nũndũ wa naĩ syoo, ngaananga ithembeo sya Mbethi-eli. Mĩthya ya ithembeo ĩkaanangwa na ĩkavalũka nthĩ.

15Ngaananga nyũmba sya ĩvinda ya mbevo, na sya ĩvinda ya syũa. Nyũmba syanakavĩtw'e na maeo ma nzou ikaanangĩka, na nyũmba ila nene ikaomboangwa. Nĩasya ũu nyie Mwĩai Ngai.”

← Chapter 2 Jump to: Chapter 4 →