Amos 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Kyeva nĩ kwenyu inyw'ĩ ala mwĩ eanĩe Saioni, na kwenyu ala mũkwĩw'a mwĩ ũsũvĩonĩ Kĩĩmanĩ kya Samalia, inyw'ĩ atongoi anene ma nthĩ nene ya Ĩsilaeli ala andũ mokaa vala mũĩ mũmanenge ũtethyo!

2Endai mũkasisye ndũa ya Kalene. Kuma vau endai ndũanĩ nene ya Amathi na mũiendeea nginya ndũanĩ ya Avilisiti ĩla yĩtawa Ngathi. Isu nĩsyo nzeo mbee wa ũsumbĩ wa Yuta na wa Ĩsilaeli? Nthĩ yoo nĩyo nene mbee wa yenyu?

3Nĩmũleaa kwĩtĩkĩla kana mũthenya wa mathĩna nĩwũkĩte, ĩndĩ meko menyu nĩmo meũtuma mũthenya ũsu ũthengeea.

4Kyeva nĩ kwenyu inyw'ĩ ala mũkomeaa mokomo ma maeo ma nzou na kwĩkootea itandanĩ syenyu, na kũya tũtena twa malondu kuma ndĩthyanĩ na tũsalũ tũnou.

5Mwinaa mbathi sya mana mũkũnĩte ngitaa nene, na kũseũvya mĩio ĩngĩ ya mbathi ũndũ Ndeviti weekaa.

6Mũnyusaa ndivai yĩ mbakũlinĩ na kwĩvaka mauta ala maseo vyũ, ĩndĩ mũi na kĩĩo nũndũ wa kwanangwa kwa Ĩsilaeli.

7Kwoou mũkeethĩwa mwĩ ma mbee kũtwawa nthĩ ya ũeninĩ; mboka syenyu na kwĩkoota kwenyu kũkathela.

8Mwĩai Ngai Mũsumbĩ Mwene Ũtonyi W'onthe nĩwĩvĩtĩte na Ĩsyĩtwa yake akasya atĩĩ, “Nĩnĩmenete mĩkathĩĩo ya andũ ma Ĩsilaeli, na kũmena nyũmba syoo ndũmu. Nganengane ndũa yoo nene vamwe na syĩndũ syonthe ila syĩ nthĩnĩ wayo kũla kwĩ amaitha moo.”

9O na vatiala andũ ĩkũmi nyũmbanĩ ĩmwe, o namo makakw'a.

10Ethĩwa mũndũ ũileny'e ũndũ na ũla wakw'a akooka kwosa mwĩĩ wa ũla mũkw'ũ akaũvĩvye, na aikũlya mũndũ ũngĩ wĩ vau nyũmba atĩĩ, “Ve mũndũ ũngĩ mũtialĩte ĩmwe?” Mũndũ ũsu wĩ nyũmba nthĩnĩ akamũsũngĩa amwĩe, “Aiee vaiĩ!” Nake akasũngĩa asye, “Kilya ki! Tũikawete ĩsyĩtwa ya Mwĩai Ngai.”

11Yĩla Mwĩai Ngai wĩumya mwĩao, nyũmba nene na ila nini ikaanangwa itw'ĩke ilungu.

12Mbalasi syaasemba mavianĩ? Ve mũndũ waaĩma ũkanganĩ na nzaũ? Ĩndĩ inyw'ĩ nĩmũtw'ĩkĩthĩtye sila wa katĩ kwĩthĩwa sumu, na mũkatw'ĩkĩthya ũlũngalu kwĩthĩwa kĩndũ kĩ wũũ.

13Nĩmũtanaa nũndũ wa kũsindwa kwa ndũa ya Londevali. Mwĩkathĩĩaa mũyasya, “Tũnaĩ na ũtonyi nginya twoosa ndũa ya Kalinaimu.”

14Mwĩai Ngai Mwene Ũtonyi W'onthe easya atĩĩ, “Inyw'ĩ andũ ma Ĩsilaeli, nĩngũtũma andũ ma nthĩ ĩngĩ moke kũtũa nthĩ yenyu. Andũ asu nĩmekũmũvinyĩĩa kuma ũlikĩlonĩ wa Amathi ngalĩkonĩ ya ĩũlũ, nginya Kalũsĩnĩ ka Alava.”

← Chapter 5 Jump to: Chapter 7 →