Amos 9

Kamba (MBIVILIA ŨVOO MŨSEO)

← Chapter 8 Jump to:

1Nĩnoonie Mwĩai Ngai aũngyĩ ũtee wa kĩthembeo. Nĩwaneenie asya atĩĩ, “Kũna mĩthya ya ituĩ sya kĩthembeo mũno nginya ituĩ sya mĩomo ithingithe. Itũlange na ũieka ĩtumbe andũ mĩtwe. Andũ ala meũtiala nĩngũmoaĩa kaũnĩ. Vai ũmwe woo wĩkĩa o na vai ũmwe wĩvonoka.

2O na meeyĩnzĩa mathi vala maveva ma ala akw'ũ mekalaa, nĩmakwata me vau, o na mambata mathi kũvika ĩtunĩ, nĩmatũnga nthĩ kuma vo.

3O na meevitha Kĩĩmanĩ kya Kalimeli mũthya, nĩmamantha na ngĩmaumya vo. O na meevitha ũkanganĩ vala valiku vyũ, ngeeaĩa mĩkũnga mĩnene ya ũkanganĩ ĩmaũme.

4O na vala makatwawa nthĩ ya ũeninĩ nĩ amaitha moo, ngameaĩa mamoae. Nĩnĩyũmbanĩtye kũmamina na ti kũmatetheesya.”

5Mwĩai Ngai Mũsumbĩ Mwene Ũtonyi W'onthe nũkiitaa nthĩ ĩkathingitha; onthe ala matũaa ĩũlũ wayo makaĩa; nthĩ yonthe ĩkookĩla na kũusya ta Ũsĩ wa Naeli ũla wĩ nthĩ ya Misili.

6Nĩwe wakaa nyũmba syake matunĩ, na kũũngamya mĩsingi yasyo ĩũlũ wa nthĩ. Nũtavaa kĩw'ũ kya ũkanga, na kũkĩtulũla ĩũlũ wa nthĩ, ĩsyĩtwa yake nĩ Mwĩai Ngai.

7Mwĩai Ngai ekũlya atĩĩ, “Andũ ma Ĩsilaeli, inyw'ĩ mũi o andũ makwa o ta andũ ma Ethiovia? Ndyaaumya andũ ma Ĩsilaeli nthĩ ya Misili na ngaumya Avilisiti Kĩlete na Asilia kuma Kili?

8Nyie Mwĩai Ngai Mũsumbĩ nĩnonete ũsumbĩ ũũ wa Ĩsilaeli wusũĩte naĩ. Nĩngũwananga na kũũveta ĩũlũ wa nthĩ. Ĩndĩ ndiananga nzyawa sya Yakovo syonthe.

9“Ngeeyĩaa na ngathũngũthangya andũ ma Ĩsilaeli me mbaĩnĩ ila ingĩ, ũndũ mũndũ ũthũngũthangasya ngetha ya mbaa mbeke yĩ kĩsunginĩ, na ngavula onthe ala athũku.

10Eki ma naĩ onthe katĩ wa andũ makwa makooaĩwa kaũnĩ, namo nĩ onthe ala maneenaa makasya atĩĩ, ‘Ngai ndaketĩkĩlya ũthũku o na wĩva ũtũkwate.’ ”

11Mwĩai Ngai easya atĩĩ, “Mũthenya nĩwũkĩte yĩla ngaka ĩngĩ ũsumbĩ wa Ndeviti, ũla ũilyĩ ta nyũmba mbomboku. Ngaseũvya ĩngĩ ngũta syaw'o na ngĩwũũngamya. Ngawaka ĩngĩ na kũwĩkalya ũndũ wailyĩ mbeenĩ.

12Kwoou andũ ma Ĩsilaeli makoosa kũla kũtiele kwa ndũa ya Etomu, na mbaĩ syonthe ila syaĩ syakwa. Nyie Mwĩai Ngai nĩnaneena na ngeeka maũndũ asu.”

13Mwĩai Ngai easya atĩĩ, “Vate nzika ĩvinda nĩyũkĩte, yĩla ũla ũkũĩma wĩvĩtũka ũla ũkũketha, na ũla ũkũviva nzavivũ wĩvĩtũka ũla ũkũvanda mbeũ. Iĩma ikalovotangya ndivai yĩ mũyo, ndivai ĩkanyũlũlũka tũlĩmanĩ tw'onthe.

14Ngatũnga andũ makwa Ĩsilaeli ala mathamiw'e, namo makaaka ĩngĩ ndũa ila syatiiwe syĩ mbanange na maitũa nthĩnĩ wasyo; makavanda mĩsavivũ na mainyw'a ndivai ya yo, makaseũvya mĩũnda na maiya mosyao mayo.

15Ngavanda andũ makwa nthĩ ĩla namanengie na maikakũwa vo ingĩ. Nĩasya ũu nyie Mwĩai Ngai, Ngai wenyu”

← Chapter 8 Jump to: