Amos 8

Kamba (MBIVILIA ŨVOO MŨSEO)

← Chapter 7 Jump to: Chapter 9 →

1Mwĩai Ngai Mũsumbĩ nĩwambonisye woni ũngĩ: Nĩnoonie kĩkavũ kĩ matunda meu.

2Nĩwangũlilye atĩĩ, “Amosi, wĩona kyaũ?” Nĩnamũsũngĩie namwĩa atĩĩ, “Nĩona kĩkavũ kĩ matunda meu.” Nĩvo ĩndĩ Mwĩai Ngai wambĩie atĩĩ, “Mũminũkĩlyo wa andũ makwa Ĩsilaeli nĩwooka. Ndimaeka ĩngĩ.

3Mũthenyanĩ ũsu mbathi ila sinawa Ĩkalũnĩ ikatw'ĩka mbathi sya kĩĩo. Kĩla vandũ vakeethĩwa mĩĩ mingĩ ya andũ akw'ũ, yĩkangĩtw'e vakilĩtw'e ki! Nĩasya ũu nyie Mwĩai Ngai”

4Ĩthukĩĩsyei inyw'ĩ ala mwendaa kũkinyangĩa athĩni nthĩ, na kũmina ngya.

5Mũneenaa mũkasya atĩĩ, “Mboka ya Kũtisa kwa Mwei ĩkathela ĩndĩĩ nĩ kana tũthoosye lĩu wa ngetha ya mbaa mbeke; Savato nayo ĩkathela ĩndĩĩ nĩ kana twambĩĩe kũthoosya nganũ? Nĩvo ĩndĩ twĩĩthĩwa tũtonya kũthoosya na thooa wĩ ĩũlũ, tũtũmĩe ithimi nthũku na tũikenga ala matũthooeaa.

6Tũkeethĩwa tũtonya kũthooa ngya na mbesa, na kũthooa athĩni na thooa wa iatũ, na o ta ũu tũithoosya nganũ ĩla ĩte nzeo.”

7Mwĩai Ngai, Ngai wa Ĩsilaeli nĩwĩvĩtĩte ayasya atĩĩ, “Ndikolwa nongi nĩ ũmwe wa meko moo mathũku.

8Kwoou nthĩ ĩkathingitha na kĩla mũndũ ĩũlũ wa nthĩ akeethĩwa na kyeva. Nthĩ yonthe ĩkauluanw'a ta Ũsĩ wa Naeli. Ĩkathokoana na kũusya ĩngĩ ta ũsĩ ũsu wa nthĩ ya Misili.

9Mũthenya ũsu, ngatuma syũa yĩthũa mũthenya katĩ, na ngĩete kĩvindu ĩũlũ wa nthĩ mũthenya.

10Nyie Mwĩai Ngai Mũsumbĩ ngatuma mboka syenyu sya ũtanu itw'ĩka sya kĩĩo, na mbathi syenyu sya ũtanu itw'ĩka sya kĩmako. Ngatuma mwĩkĩa ngũa ngaamu sya makunia na mũyenza mĩtwe yenyu, na ngatuma mũthenya ũsu wĩkala ta wa mũndũ ũkũĩa nũndũ wa kĩkw'ũ kya mwana wake e o ũmwe. Mũthenya ũsu w'onthe ũkeethĩwa wĩ wa woo.

11“Vate nzika ĩvinda nĩyũkĩte, yĩla ngaete yũa nthĩ ĩno. Andũ makeew'a nzaa na ti nzaa ya lĩu, makeew'a waũni na ti waũni wa kĩw'ũ. Ĩndĩ makeethĩwa na nzaa na waũni wa kwĩw'a ndeto syakwa nyie Mwĩai Ngai. Nĩasya ũu nyie Mwĩai Ngai.

12“Makanganga kuma ũkanga kũthi ũngĩ, kuma ngalĩko ya ĩũlũ kũthi ngalĩko ya wumĩlonĩ wa syũa; makasemba kũũ na kũũ maimantha ndeto yakwa nyie Mwĩai Ngai, ĩndĩ maikamĩw'a.

13Mũthenyanĩ ũsu, eĩtu anake ma mũika na anake ma mũika makang'athũka nĩ waũni.

14Ala mevĩtaa na mũvw'anano wa ngai ya Samalia ĩla yĩtawa Asima mayasya, ‘O tondũ ngai yaku yĩ thayũ we Ndani,’ kana, ‘O tondũ nzĩa ya Mbeeli-sieva yĩ thayũ,’ onthe makavalũka na maikokĩla ĩngĩ.”

← Chapter 7 Jump to: Chapter 9 →