Amos 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Ĩthukĩĩsyei inyw'ĩ iveti sya Samalia, inyw'ĩ ala mũnoete ta ng'ombe nga iĩthĩtw'e nesa sya Mbasani, na mũthĩnasya ngya na athĩni; inyw'ĩ ala mwĩaa aũme menyu, “Tũeteei ũkĩ tũnyw'e!”

2Mwĩai Ngai Mũsumbĩ nĩwĩvĩtĩte ũtheunĩ wake akasya atĩĩ, “Kwa w'o ĩvinda nĩyũkĩte yĩla mwĩkusw'a mwĩkĩĩtwe mboloi; kĩla ũmwe wenyu akakuwa ekĩĩtwe ndoano ya ũkwatya ĩkũyũ.

3Mũkaumaalw'a mwĩsĩle ngũtanĩ mbomboku; kĩla ũmwe esĩle mwanyanĩ ũla wĩ vakuvĩ nake, na mũkekw'a Kĩĩmanĩ kya Alimoni. Nĩasya ũu nyie Mwĩai Ngai.”

4Mwĩai Ngai Mũsumbĩ easya atĩĩ, “Inyw'ĩ andũ ma Ĩsilaeli, endai vandũnĩ vatheu Mbethi-eli mũkeke naĩ! Endai Ngilikali mũkeke naĩ ingĩ mbingĩ. Etei nthembo syenyu kĩla kwakya na kũete ilungu syenyu sya ĩkũmi kĩla mũthenyanĩ wa katatũ.

5Umyai mĩkate yĩ mbota yĩthĩwe nthembo ya kũtũnga mũvea, na mũinyaĩĩkya ũvoo ĩũlũ wa nthembo ila mumĩtye na ngoo ya kwenda. Ĩkathĩĩei nũndũ wasyo inyw'ĩ andũ ma Ĩsilaeli. Ũu nĩw'o mwendete kwĩka. Nĩasya ũu nyie Mwĩai Ngai Mũsumbĩ.

6“Ninyie naetie yũa ndũanĩ syenyu syonthe weethĩa ndũanĩ isu vai lĩu. Ũu wĩ o vo, mũyaanzyokea. Nĩasya ũu nyie Mwĩai Ngai.

7“O ta ũu nĩnatumie mbua ĩtaua vatialĩte myei ĩtatũ ĩvinda ya ngetha yĩvike. Nĩnauisye mbua ndũanĩ ĩmwe, na nalea kusya ndũanĩ ĩngĩ. Mbua nĩyauie mũũndanĩ ũmwe, na yalea kua mũũndanĩ ũngĩ syĩndũ syooma.

8Andũ nĩmangangie kuma ndũanĩ ĩmwe kũthi ĩla ĩngĩ maimantha kĩw'ũ, ĩndĩ mayaakwata kĩw'ũ kĩanĩe kya kũnyw'a. Ĩndĩ ũu wĩ o vo, mũyaanzyokea. Nĩasya ũu nyie Mwĩai Ngai.

9“Nĩnaetie kĩseve kĩvĩvasya na mbuka syatuma mĩũnda yenyu ya mĩsavivũ na syĩndũ syenyu ila syĩ mĩũndanĩ syũma. Ngie nĩsyaĩe mĩkũyũ yenyu na mĩtĩ ya mĩthata. Ĩndĩ ũu wĩ o vo, mũyaanzyokea. Nĩasya ũu nyie Mwĩai Ngai.

10“Nĩnamũeteie ũwau mũthũku o tondũ neekie Misili. Nĩnooaĩie anake menyu kaũnĩ, na natuma mbalasi syenyu itavwa. Nĩnatumie mũnyungĩĩwa nĩ mũuke mũthũku wa andũ akw'ũ maeemanĩ menyu. Ĩndĩ ũu wĩ o vo, mũyaanzyokea. Nĩasya ũu nyie Mwĩai Ngai.

11“Nĩnaminie amwe menyu, o ũndũ naanangie Sondomu na Ngomola. Ala menyu mavonokie mavĩtĩie vanini o tondũ mũndũ ũvulasya kĩsinga kuma mwakinĩ. Ĩndĩ ũu wĩ o vo, mũyaanzyokea. Nĩasya ũu nyie Mwĩai Ngai.

12Kwoou ĩndĩ, andũ ma Ĩsilaeli, ũu nĩw'o ngũmwĩka, na nũndũ nĩngũmwĩka ũu, ĩyũmbany'ei kũũngama mbee wakwa nyie Ngai wenyu nĩmũsilĩle!”

13Ngai nĩwe woombie iĩma, na oomba kĩseve. Nũtumaa andũ mamanya mesilya make, na nũtumaa mũthenya ũtw'ĩka ũtukũ. Nĩwĩsĩlaa kũndũnĩ kũtũlu ĩũlũ wa nthĩ. Ĩsyĩtwa yake nĩ Mwĩai Ngai, Ngai Mwene Ũtonyi W'onthe!

← Chapter 3 Jump to: Chapter 5 →