Galatians 1

Kamba (MBIVILIA ŨVOO MŨSEO)

Jump to: Chapter 2 →

1Kuma vala nĩĩ nyie Vaũlo, nĩtĩtwe kwĩthĩwa mũtũmwa, na wĩto wakwa ndumĩte kwa andũ kana ũkesĩla kwa mũndũ, ĩndĩ wumĩte kwa Yesũ Klĩsto na Ngai Asa, ũla wamũthayũũkisye Yesũ kuma kwa akw'ũ.

2Valũa ũũ wakwa na ana-a-asa ala me nakwa kũũ, nĩ kwenyu makanisa ma Kalatia.

3Mumo na mũuo nĩsyĩthĩwe nenyu kuma kwa Ngai Asa, na kwa Mwĩai waitũ Yesũ Klĩsto.

4Kwĩanana na kwenda kwa Ngai Asa waitũ, Klĩsto nĩweeyumisye mwene akw'e kwondũ wa naĩ sitũ, nĩ kana atũvonokye kuma nthĩ ĩno nthũku ya ĩvinda yĩĩ.

5Ngai nakathwe tene na tene! Ameni.

6Nĩngũseng'a mũno ũndũ mũendee na kũmũtia Ngai ũla wamwĩtie mumonĩ wa Klĩsto, mũketĩkĩla ũmanyĩsyo ũngĩ ũkwĩtwa ũvoo mũseo.

7Ti atĩ kwĩ ũvoo mũseo ũngĩ, ĩndĩ naneena ũu nũndũ ve andũ maendee na kũmũvũavũany'a, namo meenda kũalyũla Ũvoo Mũseo wa Klĩsto.

8Ĩndĩ o na ethĩwa nithyĩ kana mũlaĩka wumĩte ĩtunĩ, ũkũmũtavya ũvoo mũseo ũngĩ, eka ũla twamũtavisye, ũsu nĩaumanĩwe.

9O tondũ twamina kwasya, yu nĩngũtũngĩlĩĩla: Ethĩwa mũndũ akatavany'a ũvoo mũseo ũngĩ wĩ kĩvathũkany'o na ũla mwĩtĩkĩlĩte, ũsu nĩaumanĩwe.

10Kwa kũneena ũu, nyie ndiũmantha kwendeesya andũ; nĩenda kwendeesya Ngai. Kana ko mũkwona ta ngwendaa kwendeesya andũ? Kethĩwa nĩendeesya andũ, ndyĩthĩwa nĩ mũthũkũmi wa Klĩsto.

11Mbaitũ, nĩenda mũmanye kana Ũvoo Mũseo ũla namũtavisye ti kĩndũ kyumanĩte na mũndũ.

12Nũndũ ndyaaũkwata kuma kwa mũndũ kana ngamanyĩw'a nĩ mũndũ; naũkwatie kwa kũvuanĩw'a nĩ Yesũ Klĩsto mwene.

13Nĩmweewie ũndũ mwĩkalĩle wakwa wa tene wailyĩ, yĩla naatĩĩe ũthaithi wa Kĩyuti, ũndũ nathĩnasya ĩkanisa ya Ngai nde na tei, ndyenda kũyĩmina.

14Nĩnasindĩte Ayuti aingĩ ma ĩika yakwa maũndũnĩ ma mũthaithĩle wa Kĩyuti, na naatĩĩaa na kĩthito kĩnene mokũũ ma aaũmae maitũ.

15Ĩndĩ Ngai kwa ũseo wake, nĩwanyuvie nyie o na nde mũsyae, na ambĩta nĩmũthũkũme. Na yĩla wendie

16kũvuany'a Mwana wake kũla nĩĩ, nĩ kana ndonye kũtavany'a Ũvoo Mũseo ĩũlũ wake kwa Andũ-ma-mbaĩ-ingĩ, ndyaathi kwa mũndũ kũmũkũlya woni,

17kana ngathi Yelũsalemu kwonana na ala matw'ĩkĩte atũmwa mbee wakwa. Vandũ va kwĩka ũu, naendie nthĩ ya Alavia o vau kwa vau, na kuma kũu nasyoka Ndamasikũ.

18Nesie kũthi Yelũsalemu ĩtina wa myaka ĩtatũ ngamanyane na Vetelo, na nekala nake vandũ va syumwa ilĩ.

19Ndyaaona mũtũmwa ũngĩ eka Yakovo, mwana-a-inyia wa Mwĩai.

20Ngai nĩ ngũsĩ kana ũndũ ũũ ngũmũandĩkĩa ti ũvũngũ.

21Ĩtina wa ũu, naendie nthĩ ya Silia na Silisia.

22Ĩvindanĩ yĩu Aklĩsto ma makanisa ma Yutia mayambĩsĩ.

23Meekaa kwĩw'a kũyĩwa, “Ũla mũndũ watũthĩnasya, yu atavanasya ĩũlũ wa mũĩkĩĩo ũla navu tene wendaa kũmina!”

24Na kwoou nĩmamũkumisye Ngai kwondũ wakwa.

Jump to: Chapter 2 →