Galatians 6

Kamba (MBIVILIA ŨVOO MŨSEO)

← Chapter 5 Jump to:

1Mbaitũ ethĩwa mũndũ nĩwakwatwa na ĩvĩtyo o na yĩva, inyw'ĩ ala mũtongoew'e nĩ Veva mũtetheesyei aeke kwĩka naĩ, ĩndĩ ĩkai ũu mwĩ na veva wa ũuu, na mũyĩsisya mũikalike matatwanĩ o nenyu.

2Tetheanĩsyai kũkua mathĩna ma kĩla ũmwe wenyu, na kwa nzĩa ĩsu mwĩĩthĩwa mweanĩsya mwĩao wa Klĩsto.

3Ethĩwa mũndũ eona we ta mũnene, o yĩla we ti kĩndũ, eĩkenga mwene.

4Kĩla mũndũ nĩaosye meko make mwene. Ethĩwa nĩ maseo nũtonya kwĩkathĩĩa, ĩndĩ ndakamasianĩsye na ma mũndũ ũngĩ.

5Nũndũ kĩla mũndũ no nginya akue mũio ũla wake.

6Mũndũ ũla ũkũmanyĩw'a ndeto ya Ngai, nĩwaĩlwe nĩ kũaĩa mũmanyĩsya wake syĩndũ nzeo syonthe ila wĩ nasyo.

7Mũikakengeke; Ngai ti wa kũvũĩwa ngũĩ. Mũndũ akethaa kĩla wavanda.

8Ethĩwa mũndũ avandaa mawendinĩ ma mwĩĩ, akaketha kĩkw'ũ kuma mawendinĩ asu; ĩndĩ ethĩwa avandaa nthĩnĩ wa Veva, akaketha thayũ wa tene na tene kuma vevanĩ.

9Tũikanoe nĩ kwĩka nesa, nĩkwĩthĩwa twaema kũleela nĩtũkaketha ĩvinda yavika.

10Kwoou o ũndũ twĩ na myanya, nĩtwĩkei andũ onthe nesa, na mũno mũno ana-a-asa ala ma mũĩkĩĩo ũmwe naitũ.

11Kwa sisyai ũndũ ndũmĩĩte ndeto inenevete ngĩmũandĩkĩa yu na kw'oko kwakwa!

12Andũ ala mekwenda kwĩyonany'a kũũ nza kana nĩ aseo nĩmo meũmũthing'ĩĩsya mwaĩkwe. Ĩndĩ meĩka ũu nĩ kana maikathĩnw'e kwondũ wa kũtavany'a ĩũlũ wa kĩkw'ũ kya Klĩsto ngelany'onĩ.

13Asu aĩke o namo ti mo mekaa ũndũ mĩao ĩkwasya; meenda mwaĩkwe nĩ kana mekathĩĩe nũndũ nĩmatuma mwĩtĩkĩla kwaĩkwa.

14Ĩndĩ nyie ndikekathĩĩa ũndũnĩ ũngĩ, eka ĩũlũ wa kĩkw'ũ kya Mwĩai waitũ Yesũ Klĩsto ngelany'onĩ, nĩkwĩthĩwa kwondũ wa kĩkw'ũ kyake ngelany'onĩ maũndũ ma nthĩ nĩ makw'ũ kwakwa nyie, nakwa nĩ mũkw'ũ maũndũnĩ ma nthĩ.

15Kwaĩkwa kana kũlea kwaĩkwa ti ũndũ; kĩla kya vata nĩ mũndũ kwĩthĩwa kyũmbe kyeũ.

16Kwa onthe ala mekalaa maatĩĩe kĩeleelo kĩĩ, mũuo na tei wa Ngai nĩsyĩthĩwe namo, na o ta ũu iyĩthĩwa na andũ ma Ngai onthe.

17Kũminũkĩlya, ndikwenda mũndũ o na wĩva anenge thĩna ĩngĩ, malanga ala nĩ namo mwĩĩnĩ nĩmekwonany'a kana nyie nĩ wa Yesũ.

18Mbaitũ, mumo wa Mwĩai waitũ Yesũ Klĩsto nĩwĩthĩwe nenyu inyw'onthe. Ameni.

← Chapter 5 Jump to: