Galatians 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Kwa kũendeea nĩasya kana mwana ũla ũkatiĩwa syĩndũ sya ĩthe, e mũnini ndethĩawa e kĩvathũkany'o na ngombo o na kau nĩwe mwene wa syĩndũ syonthe.

2Ethĩawa ungu wa asũvĩi make na asyaĩĩsya ma syĩndũ syake, kũvika ĩvinda yĩla yĩtw'ĩtwe nĩ ĩthe wake.

3Ithyĩ naitũ twailyĩ oou: Yĩla twaĩ syana kĩ-veva, twaĩ ngombo sya maveva ala masumbĩkĩte nthĩ ĩno.

4Ĩndĩ ĩvinda yĩla yatw'ĩtwe yavika, Ngai nĩwatũmie Mwana wake, asyawa nĩ mũndũ mũka. Asyaiwe ethĩwe ungu wa ĩla mĩao,

5nĩ kana atwovosye ithyonthe ala twaĩ ungu wa mĩao, tũtw'ĩkĩthw'e syana sya Ngai.

6Nayu nũndũ twĩ syana sya Ngai, Ngai nũtũmĩte Veva wa Mwana wake alike ngoonĩ sitũ. Veva ũsu nĩwe ũtumaa twĩta Ngai, “Nau, Asa.”

7Kwoou we ndwĩ ngombo ĩngĩ, ĩndĩ wĩ mwana. Na nũndũ wĩ mwana, ũkakwata kĩla Ngai wathanie.

8Navu tene yĩla mũtamwĩsĩ Ngai, mwaĩ ngombo sya ngai itaĩ ngai sya w'o.

9Ĩndĩ yu nũndũ nĩmũmwĩsĩ Ngai, kana eka twasye, Ngai nũmwĩsĩ, mũtonya ata kwenda kũsyokea ĩngĩ maveva asu mataĩ na ũtonyi na maĩ ma mana? Mwĩenda kũtw'ĩka ngombo sya mo o ĩngĩ?

10O nayu mwosaa mĩthenya ĩmwe kwĩthĩwa ya mwanya, o na myei mĩna, o na mavinda mana, o na myaka mĩna.

11Nĩna w'ĩa! Wĩa w'onthe ũla natethisye kwondũ wenyu nũtonya kũtw'ĩka wa mana.

12Nĩngũmwĩsũva mbaitũ mwĩkale takwa, nĩkwĩthĩwa nyie o nakwa nĩnekalile tenyu. Mũyaambĩka naĩ.

13Nĩmwĩsĩ kana kwĩw'a naĩ kwakwa, nĩkwatumie ngwata mwanya wa kũtavany'a Ũvoo Mũseo katĩ wenyu.

14Ĩndĩ o na kau kũwaa kwakwa kwaĩ ũtato mũnene kwenyu, mũiaambony'a kĩvũthya kana mũkandũngya. Vandũ va ũu, mwanthokisye ta naĩ mũlaĩka kuma kwa Ngai, kana ta inyie Klĩsto Yesũ.

15Ũtanu ũla mwaĩ naw'o waendie kũ? Nyie no numye ũkũsĩ kana kethĩwa kwaĩ kũtonyeka, mwĩthĩwa mwanumĩisye metho menyu mũkanenga.

16Nĩmũkũlya, yu nĩtw'ĩkĩte mũmaitha wenyu nũndũ wa kũmũtavya ũla w'o?

17Andũ asu angĩ meendeew'a mũno ninyw'ĩ, ĩndĩ ti kwa kĩtumi kĩseo. Mo meenda mamũtaanany'e nakwa, nĩ kana nenyu mwendeew'e nĩmo.

18Nĩ ũndũ ũseo kwendeew'a nĩ andũ angĩ ethĩwa nĩ kwa kĩtumi kĩseo, na ũu waĩlĩte kwĩthĩwa kĩla ĩvinda, tyo yĩla nĩ nenyu.

19Syana syakwa mbendwa, o ta woo ũla mũndũ mũka wĩw'aa aisyaa, nyie nakwa nĩĩw'a ngĩũmwa ĩngĩ kwondũ wenyu, nginya mwĩkalo wa Klĩsto woneke nthĩnĩ wenyu.

20Nenda mũno kethĩwa yu nĩnĩthĩwa nenyu nĩ kana ngaeka kũneena ũu ngũneena. Nĩngũsaanĩw'a mũno nĩ inyw'ĩ.

21Kwa ekai nĩkũlye ala katĩ wenyu mekwenda kũatĩĩa ũndũ mĩao ĩkwasya: Inyw'ĩ nĩmwĩsĩ nesa ũndũ Mĩao ĩkwasya?

22Maandĩko Matheu maĩtye kana Avalaamu aĩ na ana elĩ; ũmwe aĩ wa mũndũ mũka ngombo, na ũla ũngĩ aĩ wa mũndũ mũka ũtaĩ ngombo.

23Mwana wake ũla waĩ wa mũndũ mũka ngombo asyaiwe o ũndũ syana iitavawa ikasyawa, ĩndĩ mwana wake ũla wa mũndũ mũka ũtaĩ ngombo eekie kwathanwa nĩ Ngai.

24Maũndũ asu nĩkwoswa ta ngelekany'o: Aka asu me elĩ nĩ ta motianĩo elĩ. Ũtianĩo ũmwe nĩ ũla waseũvĩiw'e Kĩĩmanĩ kya Sinaĩ, na ũsyao wa w'o ũtw'ĩkaa ngombo. Akali nĩwe ũũngamĩte vandũ va ũtianĩo ũsu.

25Nayu Akali ũla ũũngamĩte vandũ va Kĩĩma kya Sinaĩ, kĩla kĩ nthĩ ya Aalavu no avw'ananw'e na Yelũsalemu ya ĩvinda yĩĩ, nĩkwĩthĩwa yo yĩ ũkombonĩ vamwe na andũ mayo onthe.

26Ĩndĩ Yelũsalemu ya ĩũlũ ĩtunĩ ti ngombo, na ĩsu nĩyo inyia waitũ.

27Nĩkwĩthĩwa Maandĩko Matheu maĩtye, “Tana we mũndũ mũka ngũngũ ũtaasyaa, sĩĩlĩla na wasya mũnene, we ũtaatemwa nĩ woo wa mwana! Nũndũ mũndũ mũka watiiwe nĩ mũũme, e na syana mbingĩ kũte ũla wĩ na mũũme.”

28Kwoou yu mbaitũ, mwĩ syana sya Ngai o ta Isaka kumana na watho wa Ngai.

29Ĩvindanĩ yĩu mwana ũla wasyaĩtwe o ũndũ syana iitavawa ikasyawa, nĩwambĩĩie kũthĩny'a mwana ũla wasyaĩtwe kwa vinya wa Veva wa Ngai. Na ũu now'o kũilyĩ yu.

30Ĩndĩ Maandĩko Matheu maĩtye ata? Maĩtye, “Lũngya ũla mũndũ mũka ngombo na mwana wake, nĩkwĩthĩwa mwana ũsu wa mũndũ mũka ngombo ndakaaĩwa ũtiĩwa wa ũla mwana wa mũndũ mũka ũte ngombo.”

31Kwoou mbaitũ, ithyĩ tũi syana sya mũndũ mũka ngombo, ĩndĩ twĩ syana sya mũndũ mũka ũte ngombo.

← Chapter 3 Jump to: Chapter 5 →