Galatians 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Ĩtina wa myaka ĩkũmi na ĩna, nĩnaendie ĩngĩ Yelũsalemu nĩ na Valanava. O ta ũu nĩnaendanisye na Tito.

2Naendie kũu nũndũ Ngai nĩwambuanĩisye ambony'a kana nĩnaĩlĩte kũthi kw'o. Nĩnoombanie na atongoi ma ĩkanisa vate andũ angĩ, namaelesya Ũvoo Mũseo ũla natavanasya kwa Andũ-ma-mbaĩ-ingĩ. Neekie ũu nũndũ ndyendaa wĩa ũla nĩendee na kũtethya, kana ũla natethetye navu mbeenĩ waa mana.

3Ĩndĩ o na Tito ũla naĩ nake, o na kau aĩ Mũkiliki, ndaaing'ĩĩw'a kwaĩkwa,

4o na kau vaĩ ana-a-asa ma ũvũngũ ala mendaa aĩkwe. Andũ asu meeyĩkalĩtye ta aĩkĩĩi nĩmeelikilye kĩkundinĩ kitũ, nĩ kana mamanye kwa kĩmbithĩ ĩũlũ wa ũthasyo witũ, ũla twaĩ naw'o nthĩnĩ wa Klĩsto Yesũ, nĩ kana matũtw'ĩkĩthye ngombo syoo.

5Ĩndĩ tũyaaĩtĩkĩlana namo o na vanini, nĩ kana ũw'o wa Ũvoo Mũseo ũtonye kũtũaa nenyu mavinda onthe.

6Namo andũ ala moonekaa kwĩthĩwa atongoi, (nĩasya ũu nũndũ me atongoi kana mate atongoi kwakwa no ũndũ ũmwe; Ngai ndasiasya wũmbe wa mũndũ) andũ asu vai kĩndũ maambongeleela ĩũlũ wa kĩla natavanasya.

7Vandũ va ũu, nĩmamanyie kana nĩndũmĩtwe ngatavany'e Ũvoo Mũseo kwa Andũ-ma-mbaĩ-ingĩ, o ũndũ Vetelo ũtũmĩtwe akatavany'e Ũvoo Mũseo kwa Ayuti.

8Ngai ũla wamũtwie Vetelo kwĩthĩwa mũtũmwa kwa Ayuti, nowe wandw'ĩkĩthisye mũtũmwa kwa Andũ-ma-mbaĩ-ingĩ.

9Yakovo, Vetelo na Yoana, ala moonekaa kwĩthĩwa atongoi, nĩmamanyie kana Ngai nũnengete ũthũkũmi ũũ wa mwanya. Kwoou nĩmatũkethisye na moko nyie na Valanava kwonany'a kana twĩ mũamba. Nĩtweetĩkĩlanile ithyĩ tũthi kwa Andũ-ma-mbaĩ-ingĩ, namo maithi kwa Ayuti.

10Ũndũ ũla matũkũlilye no ũmwe: Kũlilikana ngya ila syĩ katĩ woo, naw'o ũsu nĩ ũndũ nthangaaĩe mũno kwĩka.

11Yĩla Vetelo wookie Andiokia, nĩnamũkananĩisye mbee wa kĩla mũndũ, nũndũ nĩweekĩte ũndũ ũtaĩ mwaĩlu.

12Vau mbeenĩ, andũ matũmĩtwe nĩ Yakovo matanamba kũvika, Vetelo nĩwaĩsanĩaa na Andũ-ma-mbaĩ-ingĩ. Ĩndĩ yĩla andũ asu mavikie, nĩwambĩĩie kwĩvathũla na aeka kũĩsanĩa na Andũ-ma-mbaĩ-ingĩ, nũndũ wa kũkĩa kĩkundi kĩla kyaasya kana Andũ-ma-mbaĩ-ingĩ nĩmaĩlĩte kwaĩkwa.

13Ayuti ala angĩ aĩkĩĩi nĩmakwatanie na Vetelo mwĩkalonĩ ũsu wa mĩseũvyo, weethĩa o nake Valanava nĩwakusw'a ambĩĩa kwĩkala ta mo.

14Yĩla noonie kana mwĩkalo woo ndũendanĩtye na ũw'o wa Ũvoo Mũseo, nĩnamũtavisye Vetelo mbee wa kĩla mũndũ namwĩa atĩĩ, “We, o na kau wĩ Mũyuti wĩkaa maũndũ ala Andũ-ma-mbaĩ-ingĩ mekaa, na ti ala Ayuti mekaa. Ũtonya ata ĩndĩ kũthing'ĩĩsya Andũ-ma-mbaĩ-ingĩ meke maũndũ ala Ayuti mekaa?”

15Ithyĩ kwa w'o twĩ Ayuti, tũi, “Andũ-ma-mbaĩ-ingĩ alei,” o tondũ metawa.

16Ĩndĩ nĩtwĩsĩ kana mũndũ atw'ĩkĩthaw'a mũlũngalu kwa kwĩthĩwa na mũĩkĩĩo nthĩnĩ wa Yesũ Klĩsto, na ti kwondũ wa kwĩka ũndũ mĩao ĩkwasya. Ithyĩ o naitũ nĩtũĩkĩĩte Klĩsto Yesũ nĩ kana tũtw'ĩkĩthw'e alũngalu kwondũ wa mũĩkĩĩo witũ nthĩnĩ wa Klĩsto, na ti kwondũ wa kwĩka ũndũ mĩao ĩkwasya. Nĩkwĩthĩwa vai mũndũ ũtw'ĩkĩthaw'a mũlũngalu kwondũ wa kwĩka ũndũ mĩao ĩkwasya.

17Ethĩwa ĩndĩ ithyĩ ala tũũmantha kũtw'ĩkĩthw'a alũngalu kwa kwĩthĩwa nthĩnĩ wa Klĩsto tũtw'ĩkĩte avĩtany'a, nĩkũlya, kũu nĩ kwasya kana Klĩsto athangaasya andũ meke naĩ?

18Ethĩwa nĩaka ĩngĩ kĩla naminie kũomboanga, nĩonany'a kana nĩ mũvĩtany'a.

19Kwĩsĩla mĩaonĩ nĩnakwie maũndũnĩ ma mĩao, nĩ kana nĩkale thayũ kwondũ wa Ngai. Nĩnakwie vamwe na Klĩsto ngelany'onĩ,

20nayu nĩ thayũ, ĩndĩ ti inyie nĩ thayũ ĩngĩ, nĩ Klĩsto wĩ thayũ nthĩnĩ wakwa. Thayũ ũla nĩ naw'o yu nĩwĩkalaa kwa mũĩkĩĩo, mũĩkĩĩo nthĩnĩ wa Mwana wa Ngai, ũla ũmbendete na weenenganie akw'a kwondũ wakwa.

21Nyie ndyĩtĩkĩla kũleana na mumo wa Ngai. Kethĩwa andũ matw'ĩkĩthaw'a alũngalu nũndũ wa kwĩka ũndũ mĩao ĩkwasya, kũu kwĩthĩwa kwĩ kwasya kana kĩkw'ũ kya Klĩsto kyaĩ kya mana.

← Chapter 1 Jump to: Chapter 3 →