Galatians 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Klĩsto nĩwatũthaisye nĩ kana twĩthĩwe na ũthasyo! Kwoou ũngamai na ũlũmu; mũiketĩkĩle kũtw'ĩka ngombo ĩngĩ.

2Kwa mbĩthukĩĩsyei! Nyie Vaũlo nĩmwĩa, ethĩwa nĩmũkwĩtĩkĩla mwaĩkwe, kũu nĩ kwasya kana Klĩsto nde ũtethyo kwenyu.

3O ĩngĩ nĩngũtavya mũndũ ũla wĩtĩkĩlaa aĩkwe, kana aĩlĩtwe nĩ kwĩka ũndũ mĩao yonthe ĩkwasya.

4Inyw'ĩ ala mũkwenda kũtw'ĩkĩthw'a alũngalu kwondũ wa kwĩka ũndũ mĩao ĩkwasya, manyai kana nĩmumĩte vyũ vala ve Klĩsto. Nĩmũvalũkĩte kuma mumonĩ wa Ngai.

5Ithyĩ kwa vinya wa Veva wa Ngai, tweteelaa na wĩkwatyo kũtw'ĩkĩthw'a alũngalu kwondũ wa mũĩkĩĩo.

6Nũndũ wa kwĩthĩwa twĩ nthĩnĩ wa Klĩsto, ngewa ya kwaĩkwa kana kũlea kwaĩkwa ndĩ vata. Kĩla kya vata nĩ mũĩkĩĩo ũla ũtumaa tũmenda andũ ala angĩ.

7Ve ĩvinda mwaendee nesa! Nũũ ũla wamũsiĩĩie mwaeka kũatĩĩa ũla w'o.

8Kũsiĩĩwa kũu kũyumanĩte na Ngai ũla wamwĩtie.

9Kwĩawa kana mbota nini mũno nĩtumaa mũtu mwingĩ mũkime wimba.

10Ĩndĩ nyie nĩ na mũĩkĩĩo nthĩnĩ wa Mwĩai, kana mũyĩosa woni ũngĩ eka ũla wakwa. Mũndũ ũsu ũkũmũvũavũany'a nũkaĩvĩa ĩvĩtyo yake o na ethĩwa nĩwe ũũ.

11Mbaitũ, ethĩwa nyie nĩendee na kwasya andũ nĩmaĩkwe o tondũ kũkwĩwa, nĩkĩ nĩendee na kũthĩnw'a? Ta kethĩwa nĩĩka ũu, ũtavany'a wakwa ĩũlũ wa kĩkw'ũ kya Klĩsto ngelany'onĩ ndũete mathĩna.

12Nenda kethĩwa andũ asu meũmũthokoany'a nĩmathonoka vau va kwaĩkwa, makatila vyũ kũndũ kwoo kwa kĩmbithĩ.

13Inyw'ĩ mbaitũ, mweetiwe mwĩthĩwe na ũthasyo. Ĩndĩ mũikatũmĩe ũthasyo ũsu mwĩtĩkĩle kũsumbĩkwa nĩ mawendi ma mĩĩ yenyu. Vandũ va ũu mũtongoew'e nĩ wendo, tethanasyai ũmwe kwa ũla ũngĩ.

14Nĩkwĩthĩwa mĩao yonthe ĩtũngĩanĩĩtwe mwĩaonĩ ũmwe ũkwasya, “Mwende mũtũi waku o tondũ wĩyendete mwene.”

15Ĩndĩ ethĩwa mwĩ na ngananĩo mbai na kũũmĩany'a, ĩsũvĩei mũikaminane.

16Kwoou nyie nĩmwĩa: Ĩkalaai mũtongoew'e nĩ Veva, na mũikeanĩsya mawendi ma mwĩĩ.

17Nũndũ kĩla mwĩĩ wendaa tikyo Veva wendaa; na kĩla Veva wendaa ti kyo mwĩĩ wendaa. Syĩ syelĩ iyĩw'anaa, na ũu nĩ kwasya kana inyw'ĩ mũitonya kwĩka ũndũ mũkwenda.

18Ĩndĩ ethĩwa mũtongoew'e nĩ Veva, mũi ungu wa mĩao.

19Meko ma mwĩĩ nĩmesĩkĩe nesa, nĩmo aa: Ũlaalai, ũvuku, mĩmeo mĩthũku,

20kũthaitha mĩvw'anano, ũoi, ũmaitha, ĩteta, kĩwĩu, mothatu, kwĩyenda mũndũ we mwene, motilĩkangano, ithokoo,

21mawendi, ũthengi, ũyi na maũndũ angĩ mailyĩ ta asu. Nĩnamũtavisye ĩngĩ, nayu nĩngũtũngĩlĩĩla: Andũ ala mekaa maũndũ asu maikalika ũsumbĩnĩ wa Ngai.

22Ĩndĩ ũsyao wa Veva nĩ wendo, ũtanu, mũuo, wũmĩĩsyo, kwĩka angĩ nesa, ũseo, kũĩkĩĩwa,

23ũuu na wĩting'o. Vai mwĩao ũleanĩte na maũndũ ma mũthemba ũũ.

24Andũ onthe ala ma Klĩsto Yesũ nĩmoaĩte mĩĩ yoo, vamwe na mosũanĩo mayo mathũku na mawendi mayo.

25Veva nũtũnengete thayũ, na kwoou nĩtwĩkalae tũtongoew'e nĩwe.

26Tũikethĩwe na mĩkathĩĩo kana kũthokoana kana kwĩw'anĩa kĩwĩu.

← Chapter 4 Jump to: Chapter 6 →