bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
John 12
John 12
Kamba (MBIVILIA ŨVOO MŨSEO)
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 13 →
1
Mĩthenya thanthatũ mbee wa Mboka ya Vasaka, Yesũ nĩwaendie Mbethani mũsyĩ kwa Lasalo, ũla Yesũ wathayũũkĩtye kuma kwa akw'ũ.
2
Yesũ nĩwaseũvĩiw'e lĩu wa wĩoo kũu. Matha nĩwanenganae lĩu, nake Lasalo aĩ ũmwe wa ala maathĩaw'a me vamwe na Yesũ.
3
Nĩvo ĩndĩ Meli woosie nyusu lita ya mauta matheu ma mbesa mbingĩ metawa nando, etĩkĩsya Yesũ maũũ na amũvangũlanga na nzw'ĩĩ yake. Nyũmba ĩsu yonthe nĩyakomanie mũuke mũseo wa mauta asu.
4
Nĩvo ĩndĩ Yutasi Ĩsikalioti, ũmwe wa amanyĩw'a ma Yesũ, ũla wesie kũmũthoosya waisye atĩĩ,
5
“Nĩkĩ mauta aa mateĩ matewa ndinalĩ maana atatũ na mbesa isu iinengwa ngya?”
6
Yutasi ndaasya ũu nĩkwĩthĩwa nĩwathĩnĩkaa kwondũ wa ala ngya, ĩndĩ nĩ kwĩthĩwa aĩ kĩng'ei. Nĩwe waĩ mwii wa kĩnandũ na mavinda kwa mavinda nĩwooyaa kĩla kyeekĩawa vo.
7
Ĩndĩ Yesũ asya atĩĩ, “Ekanai nake! Mũekei ambũmbany'e na kĩla wĩ nakyo kwondũ wa mũthenya wa mathiko makwa.
8
Mũkekalaa na ngya mavinda onthe, ĩndĩ nyie ndyĩkalaa nenyu mavinda onthe.”
9
Yĩla andũ mamanyie kana Yesũ e Mbethani, nĩmaendie kw'o kwa wingĩ, tyo kwondũ wa Yesũ e weka, ĩndĩ o ta ũu, nĩmaendie kwona Lasalo ũla Yesũ wathayũũkĩtye kuma kwa akw'ũ.
10
Kwoou athembi anene nĩmamũsamĩie Lasalo o nake mamũae,
11
nĩkwĩthĩwa Lasalo nĩwe watumaa Ayuti aingĩ mamatia na kũĩkĩĩa Yesũ.
12
Ũnĩ ũsu ĩkomano ĩnene ya andũ ala maĩ manooka mbokanĩ ya Vasaka, nĩmeewie kana Yesũ aĩ nzĩanĩ okĩte Yelũsalemu.
13
Nĩmakuie mbonge sya mĩtĩ yĩtawa mĩkĩndũ na mathi kũmũthaũa makĩneena na wasya mũnene mayasya atĩĩ, “Hosana! Nĩ mũathime ũla wũkĩte ĩsyĩtwanĩ ya Mwĩai! Nĩ mũathime Mũsumbĩ wa Ĩsilaeli!”
14
Yesũ nĩwoonie ndena ĩmwe ya ĩng'oi na amĩtũla o tondũ kũandĩkĩtwe nthĩnĩ wa Maandĩko Matheu:
15
“Mũikakĩe andũ ma Yelũsalemu! Mũsumbĩ wenyu nũũ wũkĩte, akuĩtwe nĩ ndena ya ĩng'oi.”
16
Ĩvindanĩ yĩu amanyĩw'a ma Yesũ mayaaelewa nĩ ũndũ ũsu, ĩndĩ yĩla Yesũ wathayũũkiw'e na alikw'a ũkumyonĩ, nĩw'o malilikanile kana Maandĩko Matheu nĩmawetete ũu ĩũlũ wa Yesũ, na kana andũ meekaa ũu kwondũ wake.
17
Andũ ala maĩ na Yesũ ĩvinda yĩla weetie Lasalo kuma mbũanĩ, amũsyũkya kuma kwa akw'ũ, nĩmatavanĩtye maũndũ ala meekĩkĩte.
18
Kĩu nĩkyo kĩtumi andũ aingĩ maendie kũmũthaũa Yesũ, nĩkwĩthĩwa nĩmeew'ĩte kana nĩweekĩte kyama kĩu.
19
Nĩvo ĩndĩ Avalisi meeanie atĩĩ, “Inyw'ĩ nomwene kana vai ũndũ twĩka! Kwa sisyai ũndũ nthĩ yonthe ĩatĩanĩie nake!”
20
Vaĩ Akiliki amwe katĩ wa andũ ala maendete Yelũsalemu kũthaitha ĩvindanĩ ya mboka ĩsu.
21
Nĩmaendie vala ve Vilivũ ũla waumĩte Mbethisaita nthĩ ya Kalilii mamwĩa atĩĩ, “Mũnene, twĩenda kwona Yesũ.”
22
Vilivũ nĩwaendie amũtavya Endelea, na me elĩ mathi mamũtavya Yesũ.
23
Yesũ nĩwameie atĩĩ, “Saa nĩwavika wa Mwana wa Mũndũ kũkumw'a.
24
Nĩmũtavya w'o, mbeke ya nganũ ĩtesĩte kũvalũka ĩkalika mũthanganĩ ĩkakw'a, yĩkalaa yĩ o yoka; ĩndĩ yakw'a, nĩsyaa mbeke ingĩ mbingĩ.
25
Mũndũ ũla ũsũvĩaa thayũ wake e we mwene, akawasya; ũla ũmenete maũndũ ma nthĩ ala thayũ wake wendaa akekala thayũ tene na tene.
26
Mũndũ ayenda kũnthũkũma, no nginya angatĩĩe; vala nĩĩ nyie, mũthũkũmi wakwa o nake ethĩawa vo. Ethĩwa mũndũ nũkũnthũkũma, Asa akamũtaĩa mũndũ ũsu.
27
“Yu ngoo yakwa yĩna kĩũũyũ, na nĩasya ata ĩndĩ? Nĩĩsa kwasya, ‘Asa, ndũketĩkĩlye ĩsaa yĩĩ yũke ĩũlũ wakwa?’ Aiee, nũndũ nyie nookie nĩ kana nĩvĩtĩle ĩsaanĩ yĩĩ ya mathĩna.
28
Asa, taĩa ĩsyĩtwa yaku!” Nĩvo ĩndĩ wasya waneenie kuma ĩtunĩ wasya atĩĩ, “Nĩnayĩtaĩa na ngayĩtaĩa ĩngĩ.”
29
Andũ ala maũngyĩ vau nĩmeewie wasya ũsu; amwe moo maisye nĩ kĩtandalĩki, na angĩ masya, “Nĩ mũlaĩka waneena nake!”
30
Ĩndĩ Yesũ amea atĩĩ, “Wasya ũsu ndwĩĩ kwondũ wakwa nyie; wĩĩ kwondũ wenyu.
31
Yĩĩ nĩyo ĩvinda ya nthĩ ĩno kũsilĩlwa; mũsumbĩ wa nthĩ ĩno akilĩlye kwanangĩwa ũtonyi wake wa kũsumbĩka.
32
Ĩndĩ nyie nakwa nookĩlw'a kuma nthĩ, ngaete andũ onthe kwakwa.”
33
Yesũ aneenie ũu onany'e kĩkw'ũ kĩla wĩkw'a ũndũ kĩĩthĩwa kĩilyĩ.
34
Ĩkomano ya andũ nĩyasũngĩie yasya atĩĩ, “Mĩao yaitũ yaasya kana Klĩsto akekala thayũ tene na tene. Ũtonya ata we ĩndĩ kwasya, ‘Mwana wa Mũndũ no nginya okĩlw'e ĩũlũ?’ Mwana ũsu wa Mũndũ nĩ wĩva?”
35
Nĩvo ĩndĩ Yesũ wameie atĩĩ, “Kyeni kĩendeea kwĩthĩwa katĩ wenyu vandũ va kavinda kanini. Endaai yĩla kwĩ kyeni, nĩ kana kĩvindu kĩikamũkwate. Mũndũ ũla ũendaa na kĩvindu ndesĩ kũla ũendete.
36
Ĩthĩwai na mũĩkĩĩo nthĩnĩ wa kyeni yĩla mwĩ nakyo, nĩ kana nenyu mũtonye kũtw'ĩka andũ ma kyeni.” Yesũ amina kũneena ũu, nĩwaumie vau na athi eevithĩla andũ asu.
37
O na ĩtina wa Yesũ kwĩka syama mbingĩ mũno katĩ woo, andũ asu mayaamũĩkĩĩa.
38
Ũu weekĩkie nĩ kana wĩanĩsye kĩla mwathani Ĩsaia wawetaa ayasya: “Mwĩai, nũũ ũla waĩkĩĩie ũtũmani ũla tũtavanĩtye, na nũũ ũla wavuanĩiw'e ũtonyi wa Mwĩai?”
39
Kwoou mayaĩ matonya kũĩkĩĩa, nũndũ Ĩsaia o ĩngĩ nĩwaneenie asya:
40
“Ngai nũlindĩte metho moo, na akatumany'a ilĩko syoo, nĩ kana metho moo maikese kwona nthĩ, na ilĩko syoo ikĩelewa, maikese kũnzyokea nyie Ngai na ngĩmavosya.”
41
Ĩsaia aneenie ũu nũndũ nĩwoonete ũkumyo wa Yesũ, na aneena ĩũlũ wake.
42
Ũu wĩ o vo, atongoi aingĩ ma Ayuti nĩmamũĩkĩĩie Yesũ, ĩndĩ nũndũ wa kũkĩa Avalisi, mayaaneena ũndũ ũsu ũtheinĩ, maikalũngw'e kuma nyũmbanĩ ya Ayuti ya kũthaithĩa na kũmbanĩa.
43
Atongoi asu mendaa mũno kũkathĩĩwa nĩ andũ mbee wa kũkathĩĩwa nĩ Ngai.
44
Nĩvo ĩndĩ Yesũ waneenie na wasya mũnene asya atĩĩ, “Mũndũ ũla ũndĩkĩĩaa, ti inyie wĩthĩawa aiĩkĩĩa, ĩndĩ ethĩawa aiĩkĩĩa ũla ũndũmĩte.
45
Mũndũ ũla ũmbonete nĩwonete ũla ũndũmĩte.
46
Nyie nĩ kyeni. Nookie kũũ nthĩ nĩ kana mũndũ ũla ũndĩkĩĩaa ndakaendee kwĩkala kĩvindunĩ.
47
Ethĩwa mũndũ nĩwĩw'aa ndeto syakwa na ndekaa ũndũ ikwasya, nyie nditonya kũmũsilĩla nũndũ nyie ndyaaũka kũsilĩla nthĩ, ĩndĩ nookie kũmĩtangĩĩa.
48
Ala matambĩtĩkĩlaa na matetĩkĩlaa ndeto syakwa, me na ũla wĩmasilĩla. Ndeto ila nĩneenete nĩsyo ikethĩwa mũsili woo mũthenya wa mũminũkĩlyo.
49
Nyie ndineenaa na ũkũmũ wakwa, ĩndĩ Asa ũla ũndũmĩte nĩwe ũndavĩtye kĩla naĩlĩte kũweta na kĩla naĩlĩte kũneena.
50
Nĩnĩsĩ kana kĩla wĩaĩte kĩetae thayũ ũtathela. Kwoou kĩla nĩneenaa no kĩla Asa ũndavĩtye nĩneene.”
← Chapter 11
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 13 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21