bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
John 13
John 13
Kamba (MBIVILIA ŨVOO MŨSEO)
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 14 →
1
Mboka ya Vasaka ĩtanavika, Yesũ nĩweesĩ kana saa wake waĩ mũviku aume kũũ nthĩ athi kwa Asa. Mavinda onthe nĩwamendete ala maĩ make kũũ nthĩ, na amendie kũvika mũminũkĩlyo.
2
Yesũ na amanyĩw'a make nĩmekalĩte nthĩ maiya lĩu wa wĩoo, nake Satani aĩ aminie kũlikya ngoonĩ ya Yutasi Ĩsikalioti, mwana wa Simioni kĩsũanĩo kya kũmũthoosya Yesũ.
3
Yesũ nĩweesĩ kana Asa nũmũnengete ũtonyi w'onthe, na nĩweesĩ kana we aumie kwa Ngai na asyokete kwa Ngai.
4
Kwoou nĩwookĩlile mesanĩ, aumya ngũa ĩla weekĩĩte ĩũlũ na eeyova taũlo kĩnyunyunĩ.
5
Nĩvo ĩndĩ weekĩie kĩw'ũ kalaĩnĩ na ambĩĩa kũthambya amanyĩw'a make maũũ, na kũmavangũla na taũlo ĩsu weeyovete.
6
Nĩwavikie vala ve Simioni Vetelo, na Vetelo amũkũlya atĩĩ, “Mwĩai, we nũũnthambya maũũ?”
7
Yesũ amũsũngĩa amwĩa, “Yu ndũmanya ũndũ ngwĩka, ĩndĩ ĩtina ũkaũmanya.”
8
Vetelo amwĩa atĩĩ, “Aiee! We ndwĩsa kũnthambya maũũ!” Yesũ amũsũngĩa amwĩa, “Naema ũkũthambya, ndwĩendeea kwĩthĩwa mũmanyĩw'a wakwa.”
9
Simioni Vetelo amwĩa atĩĩ, “Mwĩai, o na ndũkanthambye maũũ me oka; nthambanĩsye vamwe na moko na mũtwe!”
10
Yesũ amũsũngĩa amwĩa, “Mũndũ ũla ũthambĩte mwĩĩ ndena vata wa kũthamba eka o maũũ; nĩ mũtheu kĩla vandũ. Inyw'ĩ o nenyu mwĩ atheu, o na kau ti inyw'onthe.”
11
Yesũ nĩweesĩ ũla ũkũmũthoosya, na kĩu nĩkyo kyatũmie asya atĩĩ, “O na kau ti inyw'onthe atheu.”
12
Yesũ amina kũthambya amanyĩw'a make maũũ, nĩweekĩie ngũa yake ya ĩũlũ ĩngĩ na asyoka mesanĩ vala wailyĩ. Nĩvo ĩndĩ wamakũlilye atĩĩ, “Nĩmwaelewa nĩ ũndũ ũsu namwĩka?
13
Inyw'ĩ mũmbĩtaa, ‘Mũmanyĩsya,’ na, ‘Mwĩai,’ na nĩmwĩkaa nesa nũndũ kwa w'o ninyie we.
14
Ethĩwa nyie ĩndĩ nĩ Mwĩai na Mũmanyĩsya wenyu nĩnathambya maũũ menyu, inyw'ĩ o nenyu nĩmwaĩlĩte kũthambanasya maũũ ũmwe kwa ũla ũngĩ.
15
Nũndũ nyie nĩnamwony'a ngelekany'o, nĩ kana o nenyu mwĩkanae ũndũ namwĩka.
16
Nĩmũtavya w'o, vai mũthũkũmi wĩthĩawa e mũnene kwĩ mũnene wake, kana mũndũ ũtũmĩtwe akethĩwa e mũnene kwĩ ũla ũmũtũmĩte.
17
Yu nũndũ nĩmwamanya ũu, mũkeethĩwa mwĩ aathime ethĩwa mũkeekaa ũu.
18
“Nyie ndiũweta ĩũlũ wenyu inyw'onthe; nĩnĩsĩ ala nĩnyuvĩte. Ĩndĩ no nginya Maandĩko Matheu meanĩe ala maĩtye, ‘Mũndũ ũkũĩsanĩa nakwa nũtw'ĩkĩte mũmaitha wakwa.’
19
Nĩmũtavya ũndũ ũsu oyu ũtanamba kwĩkĩka, nĩ kana weekĩka inyw'ĩ mwĩĩtĩkĩla kana, ‘Ninyie Ũla Ninyie.’
20
Nĩmũtavya w'o, ũla ũthokasya ũmwe wa ala ndũmĩte ethĩawa anthokya nyie, na ũla ũnthokasya ethĩawa athokya ũla ũndũmĩte.”
21
Yesũ amina kũneena maũndũ asu, nĩwakwatiwe nĩ kĩũũyũ kingĩ ngoonĩ na amea amanyĩw'a make atĩĩ, “Nĩmũtavya w'o, ũmwe wenyu nũkũnthoosya kwa amaitha makwa.”
22
Amanyĩw'a nĩmasianisye mateũmanya nũũ ũla ũkũwetwa.
23
Ũmwe wa amanyĩw'a asu, nake nĩ ũla Yesũ wendete mũno, ailyĩ nthĩ amwĩyaĩĩsye Yesũ,
24
na kwoou Simioni Vetelo amũvenesya amwĩa atĩĩ, “Kwa mũkũlye eneena ĩũlũ waũ?”
25
Mũmanyĩw'a ũsu, eyaĩĩsye kĩthũinĩ kya Yesũ nĩwamũkũlilye atĩĩ, “Mwĩai, nũũ ũsu?”
26
Yesũ asũngĩa asya atĩĩ, “Nĩ ũla ngũvokethya kalungu ka mũkate na ngĩmũnenga.” Kwoou yĩla wavokethisye kalungu ka mũkate, akanengie Yutasi mwana wa Simioni Ĩsikalioti.
27
Nĩvo ĩndĩ Yutasi amina kwosa kamũkate kau walikilwe nĩ Satani. Yesũ nĩwamwĩie atĩĩ, “Kĩla ũkwenda kwĩka, ĩka kwa mĩtũkĩ!”
28
Vai ũmwe wa ala maĩ vau mesanĩ waamanya amwĩa ũu nĩkĩ.
29
Amwe masũanĩaa kana nũndũ Yutasi nĩwe mwii wa kĩnandũ, Yesũ emwĩa nĩathi akathooe kĩla kĩkwendekana kwondũ wa mboka, kana nĩathi akanenge ngya kĩndũ.
30
Yutasi amina kwosa kala kalungu ka mũkate nĩwaumaalile o vau kwa vau. Kwaĩ ũtukũ.
31
Ĩtina wa Yutasi kumaala, Yesũ nĩwaisye atĩĩ, “Mwana wa Mũndũ nũkwatĩte ũkumyo, na Ngai nũkwatĩte ũkumyo kwĩsĩla kwa Mwana.
32
Ethĩwa Ngai akwatĩte ũkumyo kwĩsĩla kwa Mwana, Ngai akamũnenga Mwana wake ũkumyo kwĩsĩla kwake na mĩtũkĩ mũno.
33
Syana syakwa, vatiele kavinda kanini kakwa kwĩthĩwa nenyu. Nĩvo ĩndĩ mwĩmantha, na o ũndũ natavisye atongoi ma Ayuti, now'o ngũmũtavya o nenyu yu, ‘Mũitonya kũthi vala nĩendete.’
34
Ĩndĩ nĩngũmũnenga mwĩao mweũ: Endanaai inyw'ĩ kwa inyw'ĩ. O tondũ namwendie inyw'ĩ, no nginya nenyu mwendanae o w'o.
35
Nĩ kwa kwendana inyw'ĩ kwa inyw'ĩ andũ onthe makamanya kana mwĩ amanyĩw'a makwa.”
36
Simioni Vetelo amũkũlya atĩĩ, “Mwĩai, wĩthi va?” Yesũ amũsũngĩa amwĩa, “Vala ngũthi we ndũtonya kũngatĩĩa oyu, ĩndĩ ũkangatĩĩa ĩtina.”
37
Vetelo amũkũlya atĩĩ, “Mwĩai, nĩema ũkũatĩĩa oyu nĩkĩ? Nyie nĩnĩyũmbanĩtye kũkw'a kwondũ waku!”
38
Yesũ amũkũlya atĩĩ, “Atĩ nĩwĩyũmbanĩtye kũkw'a kwondũ wakwa? Nĩkũtavya w'o, mbee wa nzamba ĩtanasya nũũkaĩa katatũ wasye ndũmbĩsĩ!”
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 14 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21