John 21

Kamba (MBIVILIA ŨVOO MŨSEO)

← Chapter 20 Jump to:

1Ĩtina wa maũndũ asu, Yesũ nĩweeyumĩlilye ĩngĩ kwa amanyĩw'a make me ĩianĩ ya Timbeliasi. Kweethĩiwe ta ũũ:

2Simioni Vetelo, Tomasi ũla wĩtawa Ĩvatha, Nathanieli kuma ndũanĩ ya Kena ĩla yĩ Kalilii, ala ana ma Nzevetii, na amanyĩw'a angĩ elĩ ma Yesũ maĩ vandũ vamwe onthe.

3Nĩvo ĩndĩ Simioni Vetelo weeie ala angĩ atĩĩ, “Nyie nĩngũthi kũtea makũyũ.” Namo mamwĩa, “Nĩtũũthi naku.” Kwoou nĩmaendie malika ĩsiwanĩ, ĩndĩ ũtukũ ũsu w'onthe vai kĩndũ maakwatya.

4Vaa syũa yĩyuma, Yesũ nĩwaũngamie ũtee wa ĩia, ĩndĩ amanyĩw'a make malea kũmanya kana nĩwe.

5Yesũ nĩwamakũlilye atĩĩ, “Anyanyawa, nĩmũkwatisye kĩndũ?” Namo mamũsũngĩa mamwĩa, “Aiee.”

6Nake amea atĩĩ, “Ĩkyai kĩtei kyenyu kĩw'ũnĩ ngalĩko ya kw'oko kwa aũme kwa ĩsiwa, na nĩmũũkwatya amwe vau.” Kwoou mekya kitei kĩw'ũnĩ na makwatya makũyũ maingĩ mũno, kũvika weethĩa maitonya kũkusya kĩtei makakĩtũnga ĩsiwanĩ.

7Mũmanyĩw'a ũla wendetwe nĩ Yesũ nĩwamwĩie Vetelo atĩĩ, “Ũya nĩ Mwĩai!” Yĩla Vetelo weewie kana ũsu nĩ Mwĩai, nĩweesekie ngũa yake ya ĩũlũ, nũndũ nĩwaumĩtye ngũa atethye wĩa, na eeyĩkya kĩw'ũnĩ.

8Amanyĩw'a ala angĩ nĩmaendie mavika ũtee me o ĩsiwanĩ nthĩnĩ, o mang'ang'anĩte na kĩtei kyoo kĩla kyausũĩte makũyũ. Mayaĩ vaasa kuma ũtee; maĩ o ta matambya ĩana yĩmwe.

9Yĩla maumie makinya nthĩ, nĩmoonie makaa me mwaki mailĩĩlwe ĩkũyũ na mũkate.

10Nĩvo ĩndĩ Yesũ wameie atĩĩ, “Etei amwe ma makũyũ ala makwatya.”

11Simioni Vetelo nĩwaendie alika ĩsiwanĩ na akusya kĩla kĩtei akyumya akia nthĩ, kyusũĩte makũyũ ĩana yĩmwe na mĩongo ĩtano na atatũ. O na kau maĩ maingĩ ta ũu, kĩtei kĩu kĩyaatembũka.

12Yesũ nĩwameie atĩĩ, “Ũkai mũye lĩu wa kwakya.” Vai ũmwe wa amanyĩw'a waaĩthĩwa amũkũlya, “Nue ũũ?” Nĩkwĩthĩwa nĩmeesĩ nĩ Mwĩai.

13Yesũ nĩwaendie oosa ũla mũkate amanenga, na eeka o ta ũu na yĩla ĩkũyũ.

14Yĩĩ nĩyo yaĩ ĩvinda ya katatũ ya Yesũ kumĩlĩĩla amanyĩw'a make, ĩtina wa athayũũka kuma kwa akw'ũ.

15Yĩla maminie kũya lĩu wa kwakya, Yesũ nĩwamũkũlilye Simioni Vetelo atĩĩ, “Simioni mwana wa Yoana, we nũmbendete mbee wa aa angĩ?” Amũsũngĩa amwĩa, “Ĩĩ Mwĩai, we nĩwĩsĩ kana nĩngwendete.” Yesũ amwĩa, “Ĩthya tũlondu twakwa.”

16Yesũ nĩwamũkũlilye ya kelĩ, “Simioni mwana wa Yoana, we nũmbendete?” Amũsũngĩa amwĩa, “Mwĩai, we nĩwĩsĩ kana nĩngwendete.” Yesũ amwĩa atĩĩ, “Sũvĩa malondu makwa.”

17Yesũ nĩwamũkũlilye ĩvinda ya katatũ, “Simioni mwana wa Yoana, we nũmbendete?” Vetelo nĩwamakie nũndũ wa Yesũ kũmũkũlya ya katatũ kana nũmwendete, na kwoou amwĩa, “Mwĩai we nĩwĩsĩ maũndũ onthe; nĩwĩsĩ kana nyie nĩngwendete.” Yesũ amwĩa, “Ĩthya malondu makwa.

18Nĩũtavya w'o, yĩla we waĩ mwanake wookĩlaa ũkekĩa ngũa na ũkĩthi o kũla ũkwenda, ĩndĩ yĩla wĩkũa, ũkatambũũkya moko wĩkĩwe ngũa nĩ mũndũ ũngĩ na aikũtwaa kũla ũtekwenda kũthi.”

19Yesũ aneenie ũu onany'e ũndũ kĩkw'ũ kya Vetelo kĩĩthĩwa kĩilyĩ, na kũtuma Ngai akumw'a. Nĩvo ĩndĩ Yesũ wamwĩie Vetelo, “Ngatĩĩe!”

20Vetelo nĩwathyũũkie na oona maumĩtwe ĩtina nĩ mũmanyĩw'a ũla wendetwe nĩ Yesũ. Mũmanyĩw'a ũsu nĩwe weeyaĩĩsye kĩthũinĩ kya Yesũ yĩla maĩsaa Mboka ya Vasaka na wamũkũlilye, “Mwĩai, nũũ ũla ũkũũthoosya?”

21Yĩla Vetelo wamwonie nĩwakũlilye Yesũ atĩĩ, “Mwĩai, kũkeekĩka ata kwa mũndũ ũũ?”

22Yesũ amũsũngĩa amwĩa atĩĩ, “Ngethĩwa ngyenda ekale nginya yĩla nĩũka, ũsu ti thĩna waku. Kwa Ngatĩĩa!”

23Kwoou ndeto nĩsyanyaĩĩkie katĩ wa aatĩĩi ma Yesũ atĩ mũmanyĩw'a ũsu ndakakw'a. Ĩndĩ Yesũ ndaasya kana mũmanyĩw'a ũsu ndakakw'a; aisye, “Ngethĩwa ngyenda ekale nginya yĩla nĩũka, ũsu ti thĩna waku.”

24Mũmanyĩw'a ũsu nĩwe ũneenete maũndũ aa onthe na kũmaandĩka. Ithyĩ nĩtwĩsĩ kana kĩla ũneenete nĩ kya w'o.

25Ve maũndũ angĩ maingĩ mũno vyũ Yesũ weekie. Kethĩwa onthe maĩ ma kũandĩkwa, nĩasya o na nthĩ yonthe ndĩtonya kwĩthĩwa na mwanya wĩanĩa mavuku ala maandĩkwa.

← Chapter 20 Jump to: