bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
John 18
John 18
Kamba (MBIVILIA ŨVOO MŨSEO)
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 19 →
1
Yesũ amina kũvoya mboya ĩsu, nĩwaumie vau e na amanyĩw'a make, na mainga kalũsĩ ketawa Kĩtilonĩ, mathi vandũ vaĩ mũũnda, vala we na amanyĩw'a make maendie malika.
2
Yutasi ũla wamũthooisye Yesũ nĩweesĩ vandũ vau, nũndũ mavinda maingĩ Yesũ nĩwakomanĩaa vo na amanyĩw'a make.
3
Kwoou Yutasi nĩwaendie vo e na kĩkundi kya asikalĩ ma nthĩ ya Loma, na asikalĩ angĩ masungaa Ĩkalũ, matũmĩtwe nĩ athembi anene na Avalisi. Nĩmakuĩte taa na mũĩ sya mwaki na mĩio ya kaũ.
4
Yesũ nĩweesĩ maũndũ onthe ala mekwĩkĩka kwake, na kwoou nĩweeyumĩlilye amakũlya atĩĩ, “Mwĩmantha ũũ?”
5
Nĩmamũsũngĩie mamwĩa atĩĩ, “Twĩmantha Yesũ kuma Nasaleti.” Yesũ amea, “Ninyie we.” Yutasi ũla wamũthooetye Yesũ aũngamĩte o vau e namo.
6
Yĩla Yesũ wameie atĩĩ, “Ninyie we,” nĩmasyokie na kyamũtete mavalũka nthĩ.
7
Yesũ nĩwamakũlilye o ĩngĩ, “Mwĩmantha ũũ?” Namo mamwĩa atĩĩ, “Twĩmantha Yesũ kuma Nasaleti.”
8
Yesũ amasũngĩa, “Nĩnamũtavya kana ninyie we. Kwoou ethĩwa ninyie mũũmantha, ekanai na aa angĩ mathi.”
9
Aisye ũu nĩ kana kĩla wawetete kĩanĩe: “Nyie ndyaasya o na ũmwe wa ala ũnengete.”
10
Nĩvo ĩndĩ Simioni Vetelo ũla waĩ na ũvyũ, waũkũie na atema mũthũkũmi wa Mũthembi ũla Mũnene amũtila kũtũ kwa kw'oko kwa aũme. Mũthũkũmi ũsu eetawa Malikusi.
11
Yesũ nĩwamwĩie Vetelo atĩĩ, “Tũngĩa ũvyũ waku ndoonĩ yaw'o! Wĩsũanĩa kana no nĩlee kũnyw'a kĩkombe kya thĩna kĩla Ĩthe wakwa ũnengete?”
12
Nĩvo ĩndĩ kĩla kĩkundi kya asikalĩ ma Loma na mũtongoi woo, na ala asikalĩ masungaa Ĩkalũ mamũkwatie Yesũ na mamwovany'a.
13
Mbee vyũ nĩmamũtwaie kwa Anasi, ũla wanengete Kaiava mũka. Kaiava nĩwe waĩ Mũthembi Mũnene mwakanĩ ũsu,
14
na nĩwe wanengete atongoi ma Ayuti ũtao, kana nĩ ũseo mũndũ ũmwe akw'e kwondũ wa andũ onthe.
15
Simioni Vetelo na mũmanyĩw'a ũngĩ nĩmaumie Yesũ ĩtina. Mũmanyĩw'a ũsu ũngĩ nĩweesĩkĩwe nĩ Mũthembi Mũnene, na kwoou nĩwaendanisye na Yesũ malika kĩwanzanĩ kĩla kĩ nza kwa Mũthembi ũsu Mũnene.
16
Vetelo nĩwatiiwe aũngeme naku nza mũomonĩ wa kũlika mũsyĩ ũsu. Nĩvo ĩndĩ mũmanyĩw'a ũsu ũngĩ wasyokie mũomonĩ, aneena na mwĩĩtu ũla wasungaa mũomo ũsu amũlikya Vetelo nthĩnĩ.
17
Mwĩĩtu ũsu mũthũkũmi nĩwakũlilye Vetelo atĩĩ, “We o naku ndwĩ ũmwe wa amanyĩw'a ma mũndũ ũya?” Vetelo amwĩa atĩĩ, “Aiee, nyie ndi ũmwe woo.”
18
Athũkũmi na asikalĩ nĩmakwatĩtye ĩiko ya makaa nũndũ kwaĩ mbevo, na makaũngama mathyũlũlũkĩte ĩiko yĩu mote mwaki. Kwoou Vetelo nĩwaendie aũngama vamwe namo ote mwaki.
19
Mũthembi Mũnene nĩwakũlilye Yesũ makũlyo ĩũlũ wa amanyĩw'a make na momanyĩsyo make.
20
Yesũ nĩwamũsũngĩie amwĩa atĩĩ, “Nĩnaneeneaa mbee wa andũ onthe, na nĩthĩĩtwe ngĩmanyĩsya kĩla ĩvinda nĩ nyũmbanĩ sya Ayuti sya kũthaithĩa na kũmbanĩa, na nĩ Ĩkalũnĩ kũla Ayuti onthe mokaa kũmbanĩa. Vai kĩndũ o na kĩmwe naaneena nĩvithĩte.
21
Wĩngũlya nyie nĩkĩ? Ndũkũlye ala mew'ĩte kĩla nĩmatavĩtye; nĩmesĩ kĩla nĩneenete.”
22
Yesũ amina kũneena ũu, ũmwe wa asikalĩ ala masungaa Ĩkalũ nĩwamũmandũlile na amwĩa atĩĩ, “Ũu nĩw'o waĩlĩte kũneena na Mũthembi Mũnene!”
23
Yesũ amũsũngĩa amwĩa atĩĩ, “Ethĩwa naneena naĩ, weta ĩvĩtyo yakwa. Ĩndĩ ethĩwa ũu nasya nĩ wa w'o, wangũnĩa kĩ?”
24
Nĩvo ĩndĩ Anasi wamũnenganie Yesũ e o mwovany'e atwawa kwa Kaiava, Mũthembi ũla Mũnene.
25
Simioni Vetelo nĩwaũngyĩ o aendee na kwota mwaki. Andũ ala maĩ vau nĩmamũkũlilye atĩĩ, “We o naku ndwĩ o ũmwe wa amanyĩw'a ma mũndũ ũya?”
26
Vetelo nĩwakaĩie asya atĩĩ, “Aiee, nyie ndi ũmwe woo.” Ũmwe wa athũkũmi ma Mũthembi Mũnene, waileny'e ũndũ na ũla mũndũ Vetelo watemete akamũtila kũtũ amũkũlya atĩĩ, “Nyie ndikwonie wĩ nake kũya mũũndanĩ?”
27
Vetelo nĩwakaĩie o ĩngĩ, na kavindanĩ o kau nzamba yasya.
28
Kwakya kĩoko tene, atongoi ma Ayuti nĩmamumisye Yesũ nyũmba kwa Kaiava mamũtwaa nyũmba kwa ngavana. Atongoi asu ma Ayuti mayaaĩtĩkĩla kũlika nyũmbanĩ ĩsu, nũndũ nĩmendaa kwĩyĩkalya me atheu nĩ kana matonye kũya Mboka ya Vasaka.
29
Kwoou Vilato nĩwaumaalile nza kũla maĩ na amakũlya atĩĩ, “Nĩ kyaũ mũsikatĩe mũndũ ũũ?”
30
Nĩmamũsũngĩie mamwĩa atĩĩ, “Kethĩwa mũndũ ũũ ti mũvĩtany'a tũyĩthĩwa twamũete kwaku.”
31
Vilato amea, “Mwosei e inyw'ĩ mũkamũsilĩle kwĩanana na mĩao yenyu.” Ayuti asu namo masũngĩa mamwĩa atĩĩ, “Tũyĩtĩkĩlĩtw'e kũaa mũndũ o na ũmwe.”
32
Ũu weekĩkie nĩ kana wĩanĩsye ndeto sya Yesũ, ila waneenete ayonany'a ũndũ kĩkw'ũ kĩla wĩkw'a kĩilyĩ.
33
Vilato nĩwasyokie nyũmba na eeta Yesũ amũkũlya atĩĩ, “We nue mũsumbĩ wa Ayuti?”
34
Yesũ amũkũlya, “Isu nĩ ndeto syaku mwene kana nĩ mũndũ ũngĩ ũkũtavisye ũu ĩũlũ wakwa?”
35
Nake Vilato amũkũlya atĩĩ, “We wĩona nyie ta nĩ Mũyuti? Andũ ma mbaĩ yaku na athembi anene nĩmo makũete kũla nĩĩ; nĩ ũndũ mwaũ wĩkĩte?”
36
Yesũ amũsũngĩa amwĩa atĩĩ, “Ũsumbĩ wakwa ti wa nthĩ ĩno; kethĩwa ũsumbĩ wakwa nĩ wa nthĩ ĩno, aatĩĩi makwa methĩwa mokitie nĩ kana ndikanenganwe mokonĩ ma atongoi ma Ayuti. Ĩndĩ ũsumbĩ wakwa ndumĩte nthĩ ĩno.”
37
Nĩvo ĩndĩ Vilato wamũkũlilye atĩĩ, “Kwoou we wĩ mũsumbĩ?” Yesũ nĩwamũsũngĩie amwĩa, “We nĩwasya nĩ mũsumbĩ. Nyie nasyaiwe na nooka kũũ ĩũlũ wa nthĩ kwondũ wa kĩtumi o kĩĩ kĩmwe: Kũneena ĩũlũ wa ũw'o. Mũndũ ũla ũatĩĩaa ũw'o nũmbĩthukĩĩasya.”
38
Vilato amũkũlya Yesũ atĩĩ, “Kĩu kĩtawa ũw'o nĩ kyaũ?” Vilato nĩwaumaalile ĩngĩ athi nza kũla kwĩ andũ na amea atĩĩ, “Nyie ndikwona ĩvĩtyo ya mũndũ ũũ.
39
Ĩndĩ nũndũ mwĩ kĩmanyĩo kya kũthaĩaw'a mwovwa ũmwe ĩvinda ya Mboka ya Vasaka, nĩmũkwenda nĩmũthaĩsye mũsumbĩ wa Ayuti?”
40
Nĩmasũngĩie na wasya mũnene masya atĩĩ, “Aiee, ndũkatũthaĩsye mũndũ ũsu! Tũthaĩsye Valava.” Valava aĩ kĩng'endilĩ.
← Chapter 17
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 19 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21