Lamentations 1

Kamba (MBIVILIA ŨVOO MŨSEO)

Jump to: Chapter 2 →

1Asi! Ndũa yekalaa yusũĩte andũ, yu ĩtiĩtwe ĩte mũndũ! O na kau yaĩ nguma mũno ĩũlũ wa nthĩ, yu ĩilyĩ kĩveti ndiwa. Ndũa ĩla yailyĩ ta mwĩĩtu wa mũsumbĩ katĩ wa ndũa syonthe, yu ĩtw'ĩkĩte ngombo.

2Ndũa ĩsu nĩ ta kĩveti kĩĩaa ũtukũ w'onthe, methoi makanyũlũlũkĩla mataunĩ makyo. Katĩ wa endwa makyo onthe, vai ũmwe wa kũkĩkiakisya. Anyanyae makyo onthe nĩmakĩnenganĩte vala ve amaitha makyo kwa nzĩa ya ũseleke, na makatw'ĩka amaitha makyo.

3Andũ ma Yuta nĩmaendete nthĩ ya ũeninĩ, nĩmekũthĩnw'a mũno na kũkwatwa ũkombo. Yu mekalaa katĩ wa andũ ma nthĩ ingĩ, na vai vandũ matonya kũthũmũa. Amaitha moo nĩmamakwatie, na mayaĩ na nzĩa ya kũvonoka.

4Nzĩa sya kũthi Saioni nĩ nthei, nũndũ vai mũndũ ũsyĩsĩlaa aendete mbokanĩ ila itw'ĩtwe. Mĩvĩa ya ndũa ĩsu nĩ nthei, athembi mayo nĩmeũluma. Athũkũmi mayo eĩtu nĩmeũnyamaw'a, na yĩ thĩnanĩ mwingĩ mũno.

5Nthũ syayo nĩsyo imĩsumbĩkĩte, amaitha mayo maendee nesa. Mwĩai Ngai nũtumĩte yĩthĩwa na thĩna, nũndũ wa mavĩtyo mayo maingĩ. Syana syayo nikwatĩtwe nĩ mũmaitha, ikatwawa nthĩ ya ũeninĩ.

6Ndaĩa yonthe ya ndũa ya Yelũsalemu nĩ nthelu; asumbĩ mayo mailyĩ ilong'a ite na lĩu wa kũya, ila ite na vinya wa kũsemba ikĩĩte ũla wisyĩmaa.

7Yelũsalemu yĩ thĩnanĩ na woo, nĩlilikanaa maũndũ onthe ma tene maseo ala maĩ mayo. Yĩla andũ mayo masindiwe nĩ amaitha, vayaĩ mũndũ wa kũmĩtetheesya. Amaitha mayo nĩmamĩvũthĩĩisye, na kũthekeea wanangĩko wayo.

8Yelũsalemu nĩyeekie naĩ mũno, na kwoou yeethĩwa yĩ mbuku. Andũ onthe ala mamĩnengae ndaĩa nĩmeũmĩvũthya, nĩkwĩthĩwa nĩmonete nthoni syayo; ndũa ĩsu nĩkũluma na yĩvitha ũthyũ nĩ nthoni.

9Ũvuku wayo nĩwoonekie nesa vyũ, ĩndĩ ndyaasũanĩa ũndũ wa mũminũkĩlyo wayo. Kũvalũka kwayo nĩ kũnene mũno, na vai mũndũ wa kũmĩkiakisya. Yelũsalemu yĩasya atĩĩ, “We Mwĩai Ngai, sisya thĩna ũla nĩ naw'o, nĩkwĩthĩwa mũmaitha nũsindĩte!”

10Mũmaitha nũtambũũkĩtye moko make, nĩ kana ose syĩndũ syayo syonthe ila nzeo. Kwa w'o Yelũsalemu nĩyonete andũ ma nthĩ ingĩ maivithũkĩa Ĩkalũ ya yo, andũ ala Mwĩai Ngai wavatie mayĩthĩwa na ngwatanĩo na andũ make.

11Andũ onthe mayo nĩmeũthĩnĩka maimantha lĩu; mekũany'a syĩndũ syoo sya thooa mũnene makwate lĩu, nĩ kana mekale thayũ. Ndũa ĩsu yĩasya, “Nzisye ame Mwĩai Ngai wone ũndũ nĩvũthĩtw'e.

12“Nĩkũlya, inyw'ĩ ala mũvĩtĩte na nzĩa no mũkwona ta ũndũ? Mwaaona mũndũ e na thĩna wĩana ũla nĩ naw'o, thĩna ũla naeteiwe nĩ Mwĩai Ngai mũthenya ũla wathatĩte mũno?

13“Nĩwatheeisye mwaki kuma ĩũlũ, wambĩvya nginya mavĩndĩnĩ; nĩwataambũũkisye neti yake angwatya, na andũnga na ĩtina. Nĩwandiie nĩmũsaanĩsye, na nĩ na kyalya mũthenya mũima.

14“Nĩwatalile naĩ syakwa syonthe, na asyũmbanĩsya vandũ vamwe; nĩwasyoveeie ngingonĩ yakwa ta ĩsoki, na atuma nĩthĩwa nde na vinya. Mwĩai nĩwanenganie mokonĩ ma andũ, andũ ndaĩ ndonya kũmĩanĩsya namo.

15“Mwĩai nĩwaleile asikalĩ ala manzũvĩaa; nĩwatũmie asikalĩ moke kũmbũkita, na maimina anake makwa. Nĩwakinyangie andũ makwa ma Yuta, ũndũ nzavivũ ikinyangĩawa kĩvivĩonĩ.

16“Nũndũ wa maũndũ asu nĩngũĩa, methoi makwa nĩmetĩkĩte mũno, na vai mũndũ wa kũngiakisya. Vai mũndũ wa kũnthangaasya, na syana syakwa itiĩtwe ite na kĩndũ, nũndũ mũmaitha wakwa nũnzindĩte.

17“Saioni nĩ ta kĩveti kĩtambũũkĩtye kw'oko kĩikũlya ũtethyo, ĩndĩ vai mũndũ wa kũkĩkiakisya. Mwĩai Ngai nĩwĩaĩĩte atũi ma nzyawa sya Yakovo matw'ĩke amaitha masyo. Yelũsalemu ĩtw'ĩkĩte kĩndũ kĩvuku kũla kwĩ atũi mayo.

18“Ĩndĩ Mwĩai Ngai ekĩte ũla waĩlĩte, nĩkwĩthĩwa nĩnĩng'endeete ndeto yake. Inyw'ĩ andũ onthe ĩthukĩĩsyei, na mũyona thĩna wakwa. Anake makwa na eĩtu makwa nĩmatavĩtwe, na makatwawa nthĩ ya ũeninĩ.

19“Nĩneetie endwa makwa ĩndĩ nĩmangengie. Athembi na atumĩa makwa nĩmakw'ĩĩie ndũanĩ, maendee kwĩmanthĩa lĩu wa kũtuma mekala thayũ.

20“We Mwĩai Ngai, sisya ũndũ nĩ thĩnanĩ wĩana, thayũ wakwa wĩ na kyeva kingĩ, ngoo yakwa nĩkũthĩnĩka mũno, nĩkwĩthĩwa nĩthĩĩtwe nĩ mũng'endu mũno. Andũ maendee kũaĩwa nzĩanĩ, na nyũmba nthĩnĩ o nakw'o kwĩ kĩkw'ũ.

21“Andũ nĩmew'ĩte ũndũ ngũluma mũno wĩana, ĩndĩ kũlumanĩ kwakwa vai mũndũ wa kũngiakisya. Amaitha makwa onthe nĩmamanyĩte ĩũlũ wa thĩna wakwa, matanaa nũndũ nue wĩkĩte maũndũ asu. Ete mũthenya ũla wathanie, na ũituma o namo mathĩna o takwa.

22“Matalĩle kwĩthĩwa na mavĩtyo, nũndũ wa mothũku moo onthe; meke ũndũ ũmbĩkĩte, nũndũ wa naĩ syoo syonthe. Maluma makwa nĩ maingĩ, na thayũ wakwa ndwĩ na vinya.”

Jump to: Chapter 2 →