Lamentations 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Mwĩai nũvw'ĩkĩte Saioni na kĩvindu, nũndũ wa ũthatu wake. Nũtheetye nguma ya Ĩsilaeli ĩla yaĩ ĩũlũ akamĩete nthĩ; mũthenyanĩ wa ũthatu wake nĩwatiie Ĩkalũ yake vala wekalaa.

2Mwĩai nĩwaanangie vate tei kũndũ kw'onthe kũla andũ ma Ĩsilaeli mekalaa; ũthatunĩ wake nĩwaanangie kũndũ kũlũmu kwa andũ ma Yuta. Nĩwavalũkilye ũsumbĩ woo na asumbĩ moo vate ndaĩa.

3Ũthatunĩ wake nũmimĩte vinya w'onthe wa Ĩsilaeli; nĩwaleile kũmatetheesya yĩla mavithũkĩiwe nĩ mũmaitha; nĩwakanĩie andũ ma Yakovo ta mwaki na amina syĩndũ syonthe.

4Nũkootete ũta wake ta mũmaitha, na kw'oko kwake kwa aũme nĩkwĩyũmbanĩtye. Nĩwũaĩte andũ onthe ma Saioni ala twonaa me aseo, na akatũthatĩa na ũthatu ũvyũvĩte ta mwaki.

5Mwĩai atw'ĩkĩte ta mũmaitha; nĩwanangĩte Ĩsilaeli. Nĩwanangĩte nyũmba syonthe syayo sya kĩ-ũsumbĩ, na akananga kũndũ kwayo kũlũmu; nĩwongeleele andũ ma Yuta kyeva na kĩĩo.

6Nĩwanangĩte wĩkalo wake ta kasũmba ke mũũndanĩ; nĩwanangĩte vandũ vake vala vatanĩawa mboka syake ila itw'ĩtwe. Mwĩai Ngai nũtumĩte Saioni yũlwa nĩ mboka syayo ila nyuve na Savato syayo; ũthatunĩ wake nũleete mũsumbĩ na mũthembi.

7Mwĩai nũekanĩte na kĩthembeo kyake, na akatia Ĩkalũ yake. Nũnenganĩte ngũta sya nyũmba sya kĩ-ũsumbĩ ũtonyinĩ wa amaitha, namo makokĩlya wasya me nyũmbanĩ ya Mwĩai Ngai ta mũthenyanĩ wa mboka ila nyuve.

8Mwĩai Ngai nĩwavangie kũomboa ũkũta wa ndũa ya Saioni, nĩwaũthimie na atia amanya kana kĩla kĩndũ nĩkyaanangwa. Nĩwatumie myako mĩtũlu na ngũta sya nza iombokanga; syonthe nĩsyaombokie syavalũkanga ta mũndũ wĩna kĩĩo.

9Mĩvĩa ya yo nĩvalũkĩte nthĩ, nũtilangĩte na akananga ivingi sya mĩvĩa ĩsu. Mũsumbĩ wayo na atongoi mayo movewe nthĩ sya ũeninĩ, na momanyĩsyo ma mĩao maivo ĩngĩ; Mwĩai Ngai ndonasya athani ma Saioni mawoni ĩngĩ.

10Atumĩa ma Yelũsalemu mekalĩte nthĩ mavindĩtye, monany'e kana mena kyeva; meyũmbĩte kĩtoo mũtwe, na makekĩa ngũa ngaamu sya makunia. Eĩtu ma Yelũsalemu nĩmakumanĩte makatina nthĩ na ũthyũ.

11Metho makwa nĩmanoetw'e nĩ kũĩa, na thayũ wakwa wĩ thĩnanĩ mwingĩ. Nĩnĩnoetw'e nĩ kyeva nũndũ wa kũminwa kwa andũ makwa, nĩkwĩthĩwa syana nini na tũũkenge twĩvalũkanga nzĩanĩ sya ndũa tũte na vinya.

12Syana isu nikũlasya aainyia masyo atĩĩ, “Lĩu ũĩva na kyaũnyw'a kĩĩva?” Ineenaa ũu iendee kũvalũkanga nzĩanĩ sya ndũa ta andũ aũmĩsye, na iikw'a kavola ikĩkĩtwe nĩ aainyia masyo.

13We Yelũsalemu, nĩasya ata ĩũlũ waku na ndonya kũũvw'anany'a na kyaũ? Ndonya ũkũelekany'a na kyaũ nĩ kana ngũkiakisye, we Saioni ndũa ntheu? Wanangĩko waku ũnenevete ta ũkanga; ũla ũtonya ũkũvosya nũũ?

14Mawoni ma athani maku maĩ ma ũvũngũ na mayaĩ vata, mayaaumĩlya ĩvĩtyo yaku nĩ kana makũtũnge kuma kũtavwanĩ kwaku; mawathani ala makũnengie maĩ ma ũvũngũ na ma ũkwasya.

15Avĩti onthe nĩmakũnanganasya moko ma kĩvũthya, mayĩũthekeea we Yelũsalemu. Nĩmakũthingithĩasya mĩtwe na kĩvũthya mayasya atĩĩ, “Kwa w'o ĩĩ nĩyo ĩla ndũa yeetawa, ‘Wĩanĩu wa wanake,’ ‘Ũtanu wa nthĩ yonthe?’ ”

16Amaitha maku onthe nĩmakũvũthasya, nĩmakũthekeeaa na kũvevetany'a maeo mayasya atĩĩ, “Nĩtũmyanangĩte! Ũũ nĩw'o mũthenya ũla tweeteelete, nayu twĩ naw'o na nĩtwawona.”

17Mwĩai Ngai nĩwĩkĩte ũndũ wavangie; nĩwĩanĩsye ndeto yake ĩla weeaie mĩthenyanĩ ya tene. Nũomboete ndũa ĩsu vate tei, na akatuma amaitha maku makũthekeea, na akaingĩvya ũtonyi wa nthũ syaku.

18We Saioni, eka ngũta syaku syĩkaĩle Mwĩai! Methoi maku nĩmavĩte ta mbũsĩ ũtukũ na mũthenya; ndũkathũmũĩe kũĩa na kwĩthĩwa na kyeva!

19Ũkĩla ĩngĩ na ĩngĩ ũtukũ w'onthe wĩkaĩle Mwĩai, voya ũnenge Mwĩai mathĩna ala me ngoonĩ yaku onthe; mũkĩlĩlye moko ũvoyee syana syaku, syana ila iũkw'ĩĩa nĩ nzaa myambĩlĩĩlyonĩ ya nzĩa nene sya ndũa.

20We Mwĩai Ngai sisya wone! Ve mũndũ waamwĩka ũndũ ũtwĩkĩte? Aka nĩmaĩlĩte kũya syana syoo ila mendete? Athembi na athani nĩmaĩlĩte kũaĩwa Ĩkalũnĩ ya Mwĩai?

21Andũ akũũ na andũ ma mũika, mavalũkĩte nthĩ malelũnĩ me akw'ũ. Anake na eĩtu makwa moaĩwe kaũnĩ; nĩwamoaie mũthenyanĩ wa ũthatu waku; wamoaie vate tei.

22Wathokisye amaitha makwa kuma kĩla vandũ, ta andũ mathoketw'e mbokanĩ. Mũthenyanĩ wa ũthatu waku we Mwĩai Ngai, vai mũndũ waakĩa kana akavonoka. Mũmaitha wakwa nĩwaminie syana syakwa, ila naeie na nasũvĩa.

← Chapter 1 Jump to: Chapter 3 →