Lamentations 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Thaavu ũla mũtheu nũtukĩte, kwa w'o thaavu nĩ mũalyũku! Mavia matheu manyaĩĩkĩe myambĩlĩĩlyonĩ ya nzĩa nene sya ndũa.

2Ana ma Saioni ala maĩ vata mũno ta thaavu, yu mailyĩ ta mbisũ sya yũmba, wĩa wa moko ma mũmbi wa mbisũ!

3O na mbĩwa nĩsyongasya tũswii twasyo, nitũnengae nondo tũkonga; ĩndĩ andũ makwa mai na tei, mailyĩ ta nyaa ila syĩ weũnĩ.

4Syana syĩ na waũni mwingĩ nginya nĩmĩ syasyo ikalũma kakaa. Syana nini nivoyaa lĩu, ĩndĩ vai mũndũ winengae.

5Ala maĩsaa lĩu mũseo, yu mekw'a nĩ nzaa me kũũ nzĩanĩ; ala maeiwe na syĩndũ nzeo, yu memantha lĩu mavutinĩ.

6Ũkany'o wa andũ makwa nĩ mũnene kwĩ wa andũ ma Sondomu, ĩla yaminiwe mĩtũkĩ, vate mũndũ wa kũmĩtetheesya.

7Atongoi ma Saioni maĩ ombe nesa, maĩ atheu mbee wa ĩa, na maĩ eũ mbee wa ĩia. Mĩĩ yoo mĩseo yaĩ mĩtune mbee wa tũvila tũseo twa ũkanganĩ, na yaĩ mĩseo mbee wa mavia ma thooa mũnene metawa savaya.

8Ĩndĩ yu nĩ aiũ mbee wa mbisũ; maimanyĩka yĩla mesĩlĩte malelũnĩ. Kĩkonde kyoo kĩlũmanĩte na mavĩndĩ, na kyũmĩte ta ũkũ.

9Ala moaĩwe kaũnĩ me kavaa, kwĩ ala moaĩtwe nĩ nzaa, ala makwatiwe nĩ nzaa mamosa nginya makw'a, vate lĩu wa kũmekalya thayũ.

10Aka ala meethĩawa na tei mwingĩ, nĩmauie syana syoo na moko moo ene, syatw'ĩka lĩu woo ĩvindanĩ yĩla andũ makwa maminiwe.

11Mwĩai Ngai nĩwoonanisye ũndũ ũthatu wake waingĩvĩte, nĩwoonoisye ũthatu wake mwai, na akwatya Saioni mwaki, ũla wamĩvĩvisye nginya mĩsingi ya yo.

12Asumbĩ ma nthĩ mayaaĩkĩĩa, o na vai mũndũ ĩũlũ wa nthĩ waaĩkĩĩa, kana amaitha kana nthũ nitonya kũlikĩla mĩvĩanĩ ya Yelũsalemu.

13Maũndũ asu meekĩkie nũndũ wa naĩ sya athani mayo, na mavĩtyo ma athembi mayo, ala mooaĩie andũ alũngalu ndũanĩ ĩsu.

14Mangangaa nzĩanĩ ta ilalinda, mavukĩtw'e nĩ nthakame ũkethĩa vai mũndũ ũkiita ngũa syoo.

15Andũ nĩmeeaa athani na athembi asu atĩĩ, “Endai! Mwĩ avuku!” “Endai! Endai! Mũikatũkiite!” Kwoou nĩmakĩie na mambĩĩa kwanganga, andũ ma nthĩ ingĩ maneenaa makasya atĩĩ, “Maikaendee kwĩkala naitũ.”

16Mwĩai Ngai mwene nũmanyaĩĩkĩtye; ndakamasũvĩa ĩngĩ. Athembi mainengawe ndaĩa, na atongoi mayĩkawa nesa.

17Metho maitũ nĩmanoie nĩ kũsyaĩĩsya ũtethyo ũtevo, nĩtwasyaĩĩisye twĩ itaanĩ sitũ sya kũsyaĩĩsya, tũkwate ũtethyo kuma kwa nthĩ ĩtaĩ ĩtonya kũtũtethya.

18Andũ nĩmatũsyĩmaa kũndũ kw'onthe kũla twaendaa, kwoou tũyaĩ tũtonya kwĩsĩla malelũnĩ maitũ. Mũminũkĩlyo witũ waĩ vakuvĩ, mĩthenya yaitũ yaĩ mĩtale, nĩkwĩthĩwa mũminũkĩlyo witũ waĩ mũviku.

19Ala matũatĩĩe maĩ mĩtũkĩ mbee wa ndiũ ĩũlũkĩte; matũsembanisye iĩmanĩ na matwoveesya weũnĩ.

20Nĩmakwatie mũndũ ũla thayũ witũ weekwatasya, mũsumbĩ, mwĩtĩkĩw'a mauta wa Mwĩai Ngai, ũla twaneenete ĩũlũ wake tũkasya atĩĩ, “Tũkekalaa ungu wa ũsũvĩo wake twĩ andũnĩ ma nthĩ ingĩ.”

21Inyw'ĩ andũ ma Etomu, tanai na kwĩw'a mũyo, ĩĩ, inyw'ĩ ala mũtũaa nthĩ ya Usi. Ĩndĩ o nenyu mũkakwata kĩkombe kĩĩ kya ũthatu; mũkakĩnyw'a mũmilwe nginya mumye ngũa syenyu!

22Ũkany'o nũndũ wa ũthũku waku we Saioni nĩ mwĩanĩsye; Mwĩai Ngai ndakaeka mũendee kwĩkala nthĩ ya ũeninĩ. Ĩndĩ inyw'ĩ andũ ma Etomu nũkũmũkany'a nũndũ wa ũthũku wenyu, akaumĩlya naĩ syenyu ũtheinĩ.

← Chapter 3 Jump to: Chapter 5 →