Lamentations 5

Kamba (MBIVILIA ŨVOO MŨSEO)

← Chapter 4 Jump to:

1Ame Mwĩai Ngai lilikana maũndũ ala matũkwatĩte; tũsisye wone ũndũ tũvũthĩtw'e.

2Nthĩ yaitũ nĩnengetwe aeni; andũ ma nthĩ ingĩ nĩmanengetwe mĩsyĩ yaitũ.

3Tũtw'ĩkĩte syana ndiwa, andũ makw'ĩĩwe nĩ aaĩthe; aainyia maitũ no ta ndiwa.

4No nginya tũthooe kĩw'ũ kya ũnyw'a, no nginya tũthooe ngũ.

5Nĩtũthũkũmĩthaw'a wĩa mũmũ ta mang'oi, twĩ na mĩnoo ĩndĩ tũinengawe mwanya wa kũthũmũa.

6Nĩtweenenganie kũla kwĩ andũ ma Misili na ma Asuli, nĩ kana tũkwate lĩu ũtwĩanĩe.

7Aaĩthe maitũ nĩmeekie naĩ na yu mai vo; naitũ twĩthĩna nũndũ wa mavĩtyo moo.

8Tũsumbĩkĩtwe nĩ ngombo, na vai mũndũ wa kũtũvonokya kuma ũtonyinĩ woo.

9Tũlikasya mathayũ maitũ mũisyonĩ nĩ kana tũkwate lĩu witũ, nũndũ wa oaani ala me isesinĩ.

10Ikonde sitũ ivyũvĩte ta mwaki wa ndumbĩa, nũndũ wa nzaa mbingĩ ĩla ĩtũkwatĩte.

11Iveti sitũ nikwatĩwe na vinya ndũanĩ ya Saioni, na eĩtu maitũ mataamanyana kĩ-mwĩĩ na mũndũ-ũme nĩmakwatĩwe ndũanĩ sya Yuta.

12Atongoi maitũ nĩmasũĩtw'e na moko moo; atumĩa mainengawe ndaĩa.

13Anake maitũ nĩmalasimĩthaw'a kũthia na ĩvia; imwana sitũ syĩthi ilũĩte nĩ kũkua mĩio mĩito ya ngũ.

14Atumĩa nĩmaekete kũmbanĩa mĩvĩanĩ ya ndũa; anake nĩmaekete kwina.

15Ũtanu wa ngoo sitũ nũthelete; kũsũnga kwitũ kũalyũlĩtwe kũkatw'ĩka kyeva.

16Ndaĩa ĩla tweekathĩĩaa nayo nĩ nthelu; kyeva nĩ kwitũ nũndũ nĩtwĩkĩte naĩ.

17Nũndũ wa ũu nĩtũkw'ĩte ngoo, na nũndũ wa maũndũ asu, nĩtũekete kwona nthĩ nesa.

18Nũndũ Kĩĩma kya Saioni kĩtiĩtwe kĩ kĩthei kĩte andũ; mbĩwa nosyo syĩkalaa maũombokunĩ makyo.

19Ĩndĩ we Mwĩai Ngai ũsumbĩkaa tene na tene; kĩvĩla kyaku kya ũsumbĩ kĩkalaa nzyawanĩ syonthe.

20Wũlawa nĩ ithyĩ kĩla ĩvinda nĩkĩ? Ũtũtiĩte ĩvinda yĩasavĩte ũu nĩkĩ?

21Ame Mwĩai Ngai, tũtũnge kũla ũĩ nĩ kana tũkũsyokee, tũnenge kwĩkala nesa o tondũ twailyĩ vau mbeenĩ.

22Kana ko ũtũleete vyũ? Ko ũtũthatĩe mũno?

← Chapter 4 Jump to: