Micah 1

Kamba (MBIVILIA ŨVOO MŨSEO)

Jump to: Chapter 2 →

1Ũũ nĩw'o ũtũmani ũla Mwĩai Ngai wanengie Mika, ũla watũaa ndũanĩ ya Molesethi, ĩvindanĩ ya kũsumbĩka kwa Yothamu, Aasu na Esekia, asumbĩ ma Yuta. Nĩwamwonisye maũndũ ĩũlũ wa Samalia na Yelũsalemu.

2Ĩthukĩĩsyei inyw'ĩ andũ onthe; nthĩ na syĩndũ syonthe ila syĩ vo, ĩthukĩĩsyei, nĩ kana Mwĩai Ngai Mũsumbĩ, e Ĩkalũnĩ yake ĩtheu akũsĩĩe ĩũlũ wenyu.

3Mwĩai Ngai nĩwũkĩte kuma wĩkalonĩ wake; nũkũtheea na aikinyĩla iĩmanĩ ĩũlũ.

4Nĩvo ĩndĩ iĩma syĩtweka ungu wa nyaĩĩ syake, nayo myanda ĩyatũkanga, ũndũ ĩa yĩtwekaa yathengeew'a mwakinĩ, ũndũ kĩw'ũ kĩvaũũkĩlaa kĩĩmanĩ.

5Maũndũ asu onthe meĩkĩka nũndũ wa ĩvĩtyo ya nzyawa sya Yakovo, na nũndũ wa naĩ sya andũ ma Ĩsilaeli. Nĩkũlya, ũla waĩlĩte kũtũlwa mũtĩ nũndũ wa ĩvĩtyo ya nzyawa sya Yakovo nũũ? Nĩ Samalia! Naĩ sya Yuta sya kũthaitha mĩvw'anano syumanĩte naũ? Na Yelũsalemu!

6Mwĩai Ngai easya atĩĩ, “Ngatuma Samalia ĩtw'ĩka kĩvumbu kĩ vandũ kĩsesinĩ, vala andũ mavandaa mĩsavivũ. Mavia ala makĩte Samalia ngamekya mwandanĩ, na kũvukũa mũsingi wayo.

7Mĩvw'anano ya Samalia ĩkaanangwa, syĩndũ syonthe ila inengetwe malwaya ma kĩ-ũthaithi ikavĩvw'a; ngaananga mĩvw'anano ya ndũa ĩsu yonthe, nũndũ yoombanisye mĩvw'anano ĩsu na ĩtuvi ya ũmalwaya, kwoou ikakuwa ikatũmĩwe ĩngĩ kũĩva ũmalwaya.”

8Nũndũ wa maũndũ asu nĩngũĩa na kwĩthĩwa na kyeva; nĩthi ndekĩĩte iatũ na nĩ mũthei. Nĩngwĩthĩwa na kĩĩo na ngĩamba ta mbĩwa, nĩngwĩthĩwa na kyeva na ngĩĩa ta nyaa.

9Nĩkwĩthĩwa itau sya Samalia iivoaa, na Yuta ĩkilĩlye kwĩthĩwa na thĩna ũilyĩ o ũsu. Wanangĩko nũvikie mũvĩanĩ wa Yelũsalemu, vala andũ makwa mekalaa.

10Mũikatavany'e maũndũ asu Ngathi, o na mũikatate kũĩa. Ala mwĩ Mbethi-le-avila, ĩyiliityei kĩtoonĩ mwonany'e kana mũi na wĩkwatyo.

11Vĩtai mũthi inyw'ĩ ala mũtũaa Savili, vĩtai mwĩ athei na mwĩ na nthoni. Inyw'ĩ ala mũtũaa Nzaanani mũikaume ndũanĩ yenyu, andũ ma Mbethi-eseli nĩmekũĩa, ũtethyo ũla mamũnengae nĩ mũvetange.

12Andũ ala matwĩe Malothi meteelaa me na kĩũũyũ mone ũseo, ĩndĩ ũthũku nũtheete kuma kwa Mwĩai Ngai, ũkoka kũvika mũvĩanĩ wa Yelũsalemu.

13Inyw'ĩ andũ ma Lakisi, ovai mbalasi makasyanĩ ma kaũ. Ninyw'ĩ mwaĩ ma mbee kũtongoesya andũ ma Ĩsilaeli malike naĩnĩ, na kwoou ninyw'ĩ mwatumie andũ ma Yelũsalemu mavĩtya.

14Kwoou nĩmũũnenga andũ ma Molesethi-ngathi mĩthĩnzĩo ya kũtaanĩsya; ndũa ya Akisivu ndĩkatethya asumbĩ ma Ĩsilaeli.

15Inyw'ĩ andũ ma Malesa, Mwĩai Ngai akamũetee mũmaitha ĩngĩ amũkwate, atongoi me ndaĩa ma Ĩsilaeli makathi kwĩvitha ngunganĩ ĩla yĩ Atulamu.

16Inyw'ĩ andũ ma Yuta, ĩyenzei ũvaa na kwenza nzw'ĩĩ, mwĩthĩwe na kyeva nũndũ wa syana syenyu ila mwendete. Nenevyai ũvaa wenyu wĩane ta wa ndei, nũndũ syana syenyu niũkuwa syĩ mbove itwawe nthĩ ya ũeninĩ.

Jump to: Chapter 2 →