Micah 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Andũ ma Yelũsalemu, ũmbany'ai asikalĩ menyu nũndũ nĩtwĩlingĩlĩtwe; mekũna mũsumbĩ wa Ĩsilaeli ĩtau na ndata.

2Ĩndĩ we Mbetheleemu ũla wĩ kĩsionĩ kya Evilatha, o na kau wĩ mũnini katĩ wa mbaĩ sya Yuta, kuma andũnĩ maku nyie Mwĩai Ngai, nganyuva ũmwe ũla ũkasumbĩka Ĩsilaeli; wumo wa mũsumbĩ ũsu nĩ wa tene mũno.

3Kwoou Mwĩai Ngai akaekana na andũ ma Ĩsilaeli, nginya ĩvinda yĩla mũndũ mũka ũla wĩ na woo wa kũsyaa wĩsyaa, na andũ ala angĩ ma Ĩsilaeli maisyoka kũla kwĩ andũ moo.

4Mũsumbĩ ũsu ooka akatongoesya andũ make ta mũĩthi, kwa vinya wa Mwĩai Ngai, kwa ũnene wa ĩsyĩtwa ya Mwĩai Ngai, Ngai wake. Andũ asu makekala me ũsũvĩonĩ, nũndũ ĩvindanĩ yĩu ũnene wake ũkeethĩwa ĩũlũ wa nthĩ yonthe.

5Mũsumbĩ ũsu akaete mũuo. Yĩla andũ ma nthĩ ya Asuli mevithũkĩa nthĩ yaitũ, na mayananga kũndũ kwitũ kũlũmu malike nthĩ yaitũ, tũkatũma atongoi maitũ ala me vinya makamokite; tũkatũma atongoi aingĩ.

6Makasumbĩka nthĩ ya Asuli na kaũ, nthĩ ya Nimiloti na kaũ. Ethĩwa Asuli makathengeea mĩvakanĩ yaitũ, na kũvithũkĩa nthĩ yaitũ, atongoi asu makatũtangĩĩa kuma kũla kwĩ Asuli.

7Nĩvo ĩndĩ nzyawa sya Yakovo ila syĩĩthĩwa itialĩte, syĩĩthĩwa syĩ katĩ wa andũ aingĩ, ta ĩmwe kuma kwa Mwĩai Ngai, na ta mbua ĩkuĩa nyeki, ĩla ĩtaetawe nĩ mũndũ, o na ĩtekwatasya mũndũ.

8Nzyawa sya Yakovo ila syĩtiala, ikeethĩwa syĩ katĩ wa mbaĩ sya andũ; katĩ wa andũ aingĩ, ta mũnyambũ wĩ katĩ wa nyamũ sya kĩthekanĩ, na ta mũnyambũ wa mũika wĩ katĩ wa malondu, ũla yĩla wesĩla katĩ wamo ũmakinyangaa na kũmatembũanga na vai wa kũmatangĩĩa.

9Andũ ma Ĩsilaeli makokita amaitha moo mamasinde, na kũmamina onthe.

10Mwĩai Ngai easya atĩĩ, “Mũthenyanĩ ũsu ngavetanga mbalasi syenyu, na kwananga makasya menyu ma kaũ.

11Ngaananga ndũa ila syĩ nthĩ yenyu, na kũng'uthũlanga kũndũ kwenyu kũlũmu.

12Ngavetanga awe kuma nthĩ yenyu, na mũikethĩwa ĩngĩ na andũ ala maaũasya.

13Ngaananga mĩvw'anano yenyu, na ituĩ syenyu sya ũthaithi, na mũikathaitha ĩngĩ syĩndũ ila mũseũvĩtye.

14Ngakũa ituĩ syenyu sya ngai nga ĩla yĩtawa Asela, na ndyananga ndũa syenyu.

15Ngeeyĩĩvanĩsya nĩ mũthatu na nĩ na woo, kũla kwĩ mbaĩ ila itambĩw'aa.”

← Chapter 4 Jump to: Chapter 6 →