Micah 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1Ĩthukĩĩsyei ũndũ Mwĩai Ngai ũkwasya: “Ũkĩla wĩtetee wĩ mbee wa iĩma, na ũieka tũlĩma twĩw'e ũndũ ũkwasya.”

2Inyw'ĩ Iĩma, myambĩlĩĩlyo ya tene na tene ya nthĩ, ĩthukĩĩsyei ũndũ Mwĩai Ngai ũkwasya, ĩũlũ wa ũndũ andũ ma Ĩsilaeli mekĩte; nũndũ Mwĩai Ngai e na ĩkoani na andũ make, na nũkũsikata andũ ma Ĩsilaeli.

3“Inyw'ĩ andũ makwa nĩmwĩkĩte ata? Nĩthĩĩtwe nĩ mũio kwenyu ata? Nzũngĩei!

4Nĩnamumisye nthĩ ya Misili, na namwovosya kuma kũu mwekalaa mwĩ ngombo; nĩnatũmie Mwose amũtongoesye, na o ta ũu natũma Alũni na Miliamu.

5Inyw'ĩ andũ makwa lilikanai maũndũ ala Mũsumbĩ Mbalaki wa Moavi wavangie kũmwĩka, na ũndũ Mbalaamu mwana wa Mbeoli wasũngĩie Mbalaki. Lilikanai maũndũ ala meekĩkie nzĩanĩ, kuma Sitimu kũthi kũvika Ngilikali, nĩ kana mũmanye maũndũ ala neekie nĩmũtangĩĩe.”

6Ngooka nguĩte kyaũ yĩla nĩũka mbee wa Mwĩai Ngai, yĩla nĩkumana nĩthaithe Ngai Ũla wĩ Ĩũlũ Mũno? Nĩkũlya, ngooka mbee wake nĩ na nthembo sya kũvĩvw'a, kana tũsalũ twĩ na ũkũũ wa mwaka ũmwe?

7Nĩkũlya, Mwĩai Ngai akendeew'a namũetee ndũũme ngili mbingĩ, kana nĩ mbũsĩ ngili mbingĩ sya mauta? O ta ũu nĩkũlya, ngathemba mwana wakwa wa mbee nũndũ wa naĩ yakwa, ũsyao wa mwĩĩ wakwa nũndũ wa naĩ ya thayũ wakwa?

8We mũndũ, Mwĩai Ngai nũkwonetye kĩla kĩseo, na kĩla ũkũandũaa nĩ: Kwĩkaa ũla ũlũngalu na kwendaa ũseo, na kwĩkalanasya na Ngai waku wĩ na wĩnyivyo.

9Mwĩai Ngai nũkwĩta andũ ma ndũa ya Yelũsalemu, na nĩ ũndũ wĩ vata kwĩthĩwa na kĩkĩo kyake: “Ĩthukĩĩsyei andũ ma Yuta; ĩthukĩĩsyei inyw'ĩ ala mũmbanĩe ndũanĩ.

10“Nĩkũlya, kwa w'o nĩndonya kũlwa nĩ ũthwii wenyu wosetwe kwa nzĩa nthũku, ũla wĩ nyũmbanĩ ya ũla mũthũku, na ithimi iteanĩe ila ithatasya?

11Kwa w'o, nĩndonya kwasya kana andũ ala matũmĩaa ithimi nthũku, na mavia mathũku ma kũthima, maikwĩka naĩ?

12Athwii ma ndũa ĩsu mausũĩtwe nĩ ũng'endu, andũ mayo nĩ akengani.

13Kwoou yu nĩnambĩĩie kũmũmina, kũmũmina nũndũ wa naĩ syenyu.

14Mũkaĩsaa na mũilea kũvũna; mavu menyu makeethĩawa me o mathei. Mũkaiaa, ĩndĩ mũilea kũsũvĩa kĩndũ, nũndũ ngaanangĩaa kaũnĩ kĩla mwasũvĩa.

15Mũkavandaa, ĩndĩ mũikakethaa, mũkavivaa mauta kuma mĩthatanĩ ĩndĩ mũilea kũmatũmĩa; mũkavivaa nzavivũ, ĩndĩ mũilea kũnyw'a ndivai ĩsu.

16Inyw'ĩ mũatĩĩe motw'ĩo mathũku ma Mũsumbĩ Omili, na ngelekany'o nthũku ya andũ ma mũsyĩ wa Aavu, na mũatĩĩe syĩthĩo syoo; kwoou nĩngũtuma ndũa ĩsu yanangwa, na andũ mayo maivũthw'a, kĩla vandũ andũ nĩmeũmũmonda.”

← Chapter 5 Jump to: Chapter 7 →