Micah 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Kyeva nĩ kwa ala mavangaa kwĩka ũthũku; me mokomonĩ moo mavangaa kwĩka ũthũku! Kwamina kũkya, nĩmekaa ũthũku ũsu, nũndũ me na ũtonyi wa kũwĩka.

2Mew'ĩaa itheka syeene ĩtomo, na kũsyosa; mew'ĩaa nyũmba syeene ĩtomo na kũsyosa; nĩmavenaa andũ mĩsyĩ yoo, na kũvena andũ ũtiĩwa woo.

3Kwoou Mwĩai Ngai easya atĩĩ, “Yu, nĩmbangĩte kũetee andũ asu ũthũku, ũla mũtatonya kwĩtangĩĩa mũkauma. Mũikekala ĩngĩ mwĩ na ngathĩĩo, nĩkwĩthĩwa yĩkeethĩwa yĩ ĩvinda ya thĩna.

4Mũthenyanĩ ũsu andũ makamwinĩa mbathi sya kĩvũthya, makaina wathi wa kyeva mayasya atĩĩ, ‘Nĩtũminĩtwe vyũ. Nũaanĩtye ũtiĩwa wa andũ maitũ; nũwosete kuma vala tũĩ na ũkaũnenga andũ athũku.’ ”

5Kwoou vaikethĩwa mũndũ wũmbanonĩ wa Mwĩai Ngai, wa kũaany'a itheka kwa kũkũna kũla.

6Athani moo maasya atĩĩ, “Mũikathane; mũikathane ĩũlũ wa maũndũ aa; tũikwatwa nĩ nthoni.”

7Inyw'ĩ nzyawa sya Yakovo, mwĩsũanĩa kana ũndũ ũũ nĩwaĩlĩte kũneenwa? Mwĩai Ngai nũekete kwĩthĩwa ate na wũmĩĩsyo? Nĩwe wĩkĩte maũndũ asu? Ndeto syake iyĩkaa nesa ũla wĩkaa ũla waĩlu?

8Mwĩai Ngai nĩwasũngĩie asya atĩĩ, “Inyw'ĩ nĩmũvithũkĩaa andũ makwa ta mwĩ amaitha; nĩmũvenaa andũ mauĩtye ngũa syoo ndaasa; andũ mavĩtĩte maendete maũndũnĩ moo, matena thĩna, na mateũsũanĩa ĩũlũ wa kaũ.

9Nĩmũlũngasya Iveti sya andũ makwa kuma nyũmbanĩ syoo nzeo; nĩmũvenaa syana syoo ndaĩa yakwa tene na tene.

10“Ũkĩlai mũthi, nĩkwĩthĩwa vaa ti vandũ va kũthũmũa, nũndũ nĩmũvavukĩtye na vaitonya kũseũvw'a ĩngĩ.

11Ethĩwa mũndũ nũtonya kũthi aneenete ndeto sya mana na sya ũvũngũ ayasya atĩĩ, ‘Nĩmũkwĩthĩwa na ndivai na ũkĩ mwingĩ,’ ũsu nĩwe wĩthĩwa e mwathani ũla andũ mekwenda.

12“Inyw'ĩ andũ ma Ĩsilaeli nĩngũmũmbany'a vamwe; nĩngũmũmbany'a inyw'ĩ andũ ma Ĩsilaeli ala mũtialĩte. Nĩngũmũete vamwe ta malondu matwaĩtwe kĩtũũnĩ, ta ndĩthya yĩ kĩsesinĩ, nenyu mũkeethĩwa mwĩ nguthu ya andũ aingĩ.”

13Ũla wĩvingũa nzĩa akamatongoesya, namo makaananga mũvĩa wa ndũa na mayumaala. Mũsumbĩ woo akamatongoesya; Mwĩai Ngai mwene akamatongoesya.

← Chapter 1 Jump to: Chapter 3 →