Micah 4

Kamba (MBIVILIA ŨVOO MŨSEO)

← Chapter 3 Jump to: Chapter 5 →

1Mĩthenya nĩ yũkĩte, kĩĩma kĩla Ĩkalũ ya Mwĩai Ngai yakĩtwe, kĩkeethĩwa kĩ kĩnene mbee wa iĩma ila ingĩ syonthe. Kĩkeethĩwa kĩ kĩtũlu kwĩ tũlĩma tw'onthe, na mbaĩ syonthe ikambata vo.

2Andũ ma mbaĩ mbingĩ makooka na kwasya atĩĩ, “Ũkai twambate kĩĩmanĩ kya Mwĩai Ngai, tũendei nyũmbanĩ ya Ngai wa Yakovo, nĩ kana atũmanyĩsye nzĩa syake, naitũ tũyĩkala kwĩanana na ũndũ ũkũtũtongoesya.” Nĩkwĩthĩwa mwĩao ũkooka kuma Saioni, ndeto ya Mwĩai Ngai ĩkooka kuma Yelũsalemu.

3Mwĩai Ngai akasilany'a andũ ma mbaĩ mbingĩ, na akatusaa makoani ma nthĩ syĩ vinya syĩ kũasa. Andũ makavũa mbyũ syoo itw'ĩke mĩthya ya mĩlaũ, na matumo moo matw'ĩke tũvyũ twĩ ngoto twa kũsea. Mbaĩ ndĩkokĩla yũkite na ĩngĩ, na mbaĩ iikemanyĩsya ĩngĩ kũkita.

4Kĩla mũndũ akekalaa ungu wa mũsavivũ wake, na ungu wa mũkũyũ wake. Vai mũndũ ũkatuma makĩa, nũndũ Mwĩai Ngai Mwene Ũtonyi W'onthe nĩwaneena.

5Andũ ma kuma nthĩ ingĩ nĩmathaithaa, na kwĩka kwenda kwa ngai syoo; ĩndĩ ithyĩ tũkathaithaa na kwĩka kwenda kwa Mwĩai Ngai, Ngai waitũ tene na tene.

6Mwĩai Ngai easya atĩĩ, “Mũthenya ũsu ngoombany'a vamwe ala me na maũũ mathũku, na kũmbany'a ala mataviwe, na ala natumie methĩwa na kyeva;

7ala me na maũũ mathũku nĩmo ngatialya me thayũ, na ala malũngilw'e ngamatw'ĩkĩthya mbaĩ yĩ vinya. Nyie Mwĩai Ngai ngamasumbĩka nĩ Kĩĩmanĩ kya Saioni, kuma mũthenya ũsu kũvika tene na tene.”

8Naku we kĩĩma kya Yelũsalemu, we vandũ valũmu va Saioni, vala Ngai ũsyaĩĩasya andũ make, o tondũ mũĩthi ũsyaĩĩasya malondu make, ũkeethĩwa ĩngĩ ndũa yĩ nguma ũndũ wailyĩ mbeenĩ, we Yelũsalemu ũkatw'ĩka ĩngĩ ndũa nene vala mũsumbĩ wĩkalaa.

9Yu wĩkaya na wasya mũnene nĩkĩ? Nũndũ ũte na mũsumbĩ? Atai maku ko akw'ũ, nĩ kana ũkwatwe nĩ woo ta wa mũndũ mũka ũkwaũnya?

10Inyw'ĩ andũ ma Yelũsalemu ĩthĩwai na woo, na mũikaya ta mũndũ mũka ũkwaũnya, nũndũ yu nĩmũkuma ndũanĩ na mũĩthi kũtũa kũndũ kũtatwĩe andũ. Yu no nginya mũthi Mbavilonĩ; mwĩ vau mũkatangĩĩwa; Mwĩai Ngai akamũvonokya kuma ũtonyinĩ wa amaitha menyu.

11Ĩndĩ yu andũ ma nthĩ mbingĩ, nĩmombanĩte makũvithũkĩe. Measya atĩĩ, “Saioni no nginya ĩvukw'e, na tũyona Saioni yĩ mbanange.”

12Ĩndĩ mayĩsĩ mosũanĩo ma Mwĩai Ngai; maikũmanya mũvango wake, kana amombanĩtye ta iia kĩvũĩonĩ.

13Mwĩai Ngai easya atĩĩ, “Inyw'ĩ andũ ma Yelũsalemu ũkĩlai mũthi mũkakany'e amaitha menyu, nũndũ nĩngũmũnenga vinya ta wa nzaũ syĩ na mbya sya kyũma, na syĩ na mavũngũ ma mbulonzi. Nĩmũũsinda andũ ma nthĩ mbingĩ, na kũmbumĩsya nyie Mwĩai Ngai syĩndũ syoo ila moosie na vinya; mũkambumĩasya ũthwii woo, nyie Mwĩai wa nthĩ yonthe.”

← Chapter 3 Jump to: Chapter 5 →