Song of Solomon 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Nyie nĩ ĩlaa ya losi kuma Saloni, ĩlaa ya lili ya myandanĩ.

2Ta ĩlaa ya lili katĩ wa mĩw'a, now'o mwendwa wakwa ũilyĩ katĩ wa eĩtu.

3O tondũ mũtĩ wa mũevo ũilyĩ wĩ katĩ wa mĩtĩ ya kĩthekanĩ, now'o mwendwa wakwa ũilyĩ e katĩ wa aũme ma mũika. Nĩnekalile ungu wa muunyĩ wa mũtĩ ũsu nĩ na ũtanu mwingĩ, na ĩtunda yaw'o yaĩ mũyo kwakwa.

4Nĩwandwaie nyũmbanĩ ya mboka, na kĩvevelo kyake ĩũlũ wakwa kyaĩ wendo.

5Mbĩkĩai vinya na nzavivũ mbovu, mbuũkyei na matunda ma mũevo, nũndũ nĩnĩwaĩtw'e nĩ wendo!

6Kw'oko kwake kwa aka kwĩ ungu wa mũtwe wakwa, kw'oko kwake kwa aũme nĩkũngumbatĩlye.

7Inyw'ĩ eĩtu ma Yelũsalemu, ĩvĩtei na nthwaia kana na ndaatai sya kĩthekanĩ, kana mũiambĩĩsya kana kũamũkya wendo, nginya yĩla ĩvinda yaw'o yĩvika.

8Ĩw'a! Wasya wa mwendwa wakwa! Nũũya okĩte; atũlĩlangĩle iĩmanĩ, athaanyũkangĩle tũlĩmanĩ.

9Mwendwa wakwa ailyĩ nthwaia, kana ndaatai nũme ya mũika. Nũũya aũngamĩte ĩtina wa ũkũta witũ, aikunĩkĩla nthĩnĩ kwĩsĩla ndĩlĩsyanĩ, na kũsisya kwĩsĩla syũmanĩ sya ndĩlĩsya.

10Mwendwa wakwa nĩwaneenie nakwa ambĩa atĩĩ, “Ũkĩla mwendwa wakwa, ũla ũmbendeeasya, ũka twĩyĩendee,

11nũndũ nĩw'o mbua nĩ nthelu, na ĩvinda ya mbevo nĩ ĩthelu na ĩkathi.

12Malaa nĩmalaũku kĩla vandũ, na ĩvinda ya kwina nĩ ĩviku, na wasya wa ĩvũĩ nũkwĩw'ĩka kũũ nthĩ yaitũ.

13Mĩkũyũ nĩyambĩĩe kumya mosyao, na mĩsavivũ nĩ mĩlaũku, yĩumya mũuke mũseo. Ũkĩla mwendwa wakwa ũla ũmbendeeasya, ũka twĩyĩendee.”

14We ĩvũĩ yakwa, wĩ mũvatĩnĩ wa ĩvia, ũvithĩtwe nĩ ũvai, kwaeka none ũthyũ waku, kwaeka nĩw'e wasya waku, nũndũ wasya waku nĩ wa kwendeesya, na ũthyũ waku nĩ mwanake.

15Tũkwatĩei mbĩwa, mbĩwa ila nini, ila syanangaa mĩũnda ya mĩsavivũ, nũndũ mĩũnda yaitũ ya mĩsavivũ nĩ mĩlaũku.

16Mwendwa wakwa nĩ wakwa, nakwa nĩ wake, aĩthasya ndĩthya yake ya mbũi na malondu malaanĩ ma lili,

17kũvika syũa yausya, na myuunyĩ ĩithela. Mwendwa wakwa, syoka ũsembete ta nthwaia, kana ta ndaatai nũme ya mũika iĩmanĩ sya Mbethi-eli.

← Chapter 1 Jump to: Chapter 3 →