Song of Solomon 6

Kamba (MBIVILIA ŨVOO MŨSEO)

← Chapter 5 Jump to: Chapter 7 →

1We ũla mwanake kwĩ aka onthe, mwendwa waku aendie nakũ? Mwendwa waku esĩla va, nĩ kana tũkũtetheesye kũmũmantha?

2Mwendwa wakwa athi mũũndanĩ wake, vala ve ivũĩo sya mĩtĩ ĩla ĩseũvasya mauta me mũuke mũseo, kũĩthya indo syake mĩũndanĩ, na kũmbany'a malaa ma lili.

3Mwendwa wakwa nĩ wakwa, nakwa nĩ wake, aĩthasya ndĩthya yake ya mbũi na malondu malaanĩ ma lili.

4Mwendwa wakwa, wanakavĩte ta ndũa ya Tilisa, wĩ wa kwendeesya ta Yelũsalemu, wĩ wa kũtĩsya ta nguthu ya asikalĩ me na ivevelo.

5Mwa thyũũa metho maku maikanzisye, nũndũ wanzisya nĩmeũnthĩny'a. Nzw'ĩĩ yaku ĩilyĩ ta ndĩthya ya mbũi, itheete Kĩĩmanĩ kya Ngileati.

6Maeo maku meũvĩte ta malondu maka, maumĩte kũthambw'a, ala onthe masyaa mavatha, na vai yĩmwe yamo yĩkw'ĩĩwe nĩ katena.

7Matau maku mailyĩ ta nyusu ya ĩkũngũmanga, me ungu wa suka waku mũvũthũ wa kũvw'ĩka ũthyũ.

8Nĩvatonya kwĩthĩwa na iveti sya mũsumbĩ mĩongo thanthatũ, na iveti ingĩ sya ndũsyo mĩongo nyanya, na eĩtu matatalĩka,

9ĩndĩ ĩvũĩ yakwa, ũla wakwa mũseo, no ũmwe tũ, nowe mwĩĩtu e weka wa nyinyia, mwana ũla wendetwe vyũ nĩ nyinyia. Eĩtu nĩmamwonaa na kũmwĩta mũathime; o ta ũu iveti sya mũsumbĩ na iveti syake sya ndũsyo nimũtaĩaa.

10Nũũ ũyũ wonekaa ta kyeni kya kũikya, mũseo ta mwei, na mũtheu ta syũa, wa kũtĩsya ta nguthu ya asikalĩ mena ivevelo?

11Nĩnatheeie mũũndanĩ wa mĩtĩ ya matunda ya mũlosi, kũsisya mĩmea ĩla ĩmeete mwandanĩ, kũsisya kana mĩsavivũ nĩ mĩlaũku, na kana mĩkũngũmanga nĩyumĩtye malaa.

12Nyie ndataĩĩe, wendi wa ngoo yakwa nĩwatumie nĩlĩsa ĩkasyanĩ ya kaũ ya mũnene wakwa.

13Syoka, syoka, we mwĩĩtu Mũsulami, Syoka, syoka, nĩ kana tũkũsisye. Mwĩenda kũnzisya nyie Mũsulami nĩkĩ, ta mũũnzisya ngĩsũnga nĩ mbee wa nguthu ilĩ sya asikalĩ?

← Chapter 5 Jump to: Chapter 7 →