Song of Solomon 5

Kamba (MBIVILIA ŨVOO MŨSEO)

← Chapter 4 Jump to: Chapter 6 →

1Nĩnooka mũũndanĩ wakwa, mwĩĩtu-a-ia, mũtwawa wakwa; nĩũmbany'a manemane na mĩtĩ yakwa yĩ mũuke mũseo, nĩtanyuka ĩwa yakwa na kũya ũkĩ wakwa wa nzũkĩ, nĩngũnyw'a ndivai yakwa na kũnyw'a ĩia yakwa. Yai, inyw'ĩ anyanyawa, na mũinyw'a, nyw'ai mũno endwa makwa.

2Nĩnakomete, ĩndĩ ngoo yakwa nĩyaamũkĩte. Ĩw'a! Wasya wa mwendwa wakwa aikũnanga mũomo ayasya atĩĩ, “Mbingũĩe, mwĩĩtu-a-ia, mwendwa wakwa, ĩvũĩ yakwa, ũla wakwa ũte ũthũku o na ũmwe; mũtwe wakwa wusĩe ĩmwe, nzw'ĩĩ yakwa nĩ mbĩũ nũndũ wa mũumbĩ wa ũtukũ.”

3Nĩnĩminie kumya ngũa syakwa, nĩsyĩkĩa ĩngĩ ata? Nĩnĩminie kũthamba maũũ makwa, yu nĩmathokaoany'a ĩngĩ ata?

4Mwendwa wakwa nĩwakwatie kĩvulĩ avingũe mũomo, na ngoo yakwa nĩyausũie ũtanu.

5Nĩnookĩlile mbingũĩe mwendwa wakwa, moko makwa mausĩe mauta ma manemane, syaa syakwa syalovotangasya mauta ma manemane, yĩla nakwatie konzi mbingũe mũomo.

6Nĩnavingũĩie mwendwa wakwa, ĩndĩ mwendwa wakwa aĩ anavĩndũka na akathi. Ngoo yakwa nĩyathelile vinya yĩla waneenie; nĩnamũmanthie ĩndĩ ndyaamwona, nĩnamwĩtie ĩndĩ ndaambĩtĩka.

7Asyaĩĩsya nĩmambonie, maendee kwanganga maisyaĩĩsya ndũa; nĩmangũnie, nĩmambũmĩisye, nĩmoosie suka wakwa, asyaĩĩsya asu ma ngũta sya ndũa.

8Inyw'ĩ eĩtu ma Yelũsalemu, nĩngũmũkũlya mwĩvĩte, kana mwoona mwendwa wakwa mwĩmwĩa, nĩnĩwaĩtw'e nĩ wendo.

9We ũla mwanake kwĩ aka onthe, mwendwa waku e kĩvathũkany'o kyaũ na endwa ala angĩ, nĩ kana ũtwĩe twĩvĩte ũu?

10Mwendwa wakwa nĩ mwaĩlu na e na mwĩĩ mũseo, nĩ wa ndaĩa katĩ wa aũme ngili ĩkũmi.

11Mũtwe wake nĩ ta thaavu ũla mũseo vyũ, nzw'ĩĩ syake nĩ syĩkũnzĩte, na nĩ nziũ ta ngũngũũ.

12Metho make mailyĩ mavũĩ me ũtee wa tũlũsĩ, nĩ ta mavũĩ meũ ta ĩia me ũtee wa tũlũsĩ.

13Matau make nĩ ta ivũĩo sya mĩtĩ ĩla ĩseũvasya mauta ala me mũuke mũseo, mauta meũnyunga nesa. Ilomo syake iilyĩ ta malaa ma lili, iimeny'a mauta matweku ma manemane.

14Moko make nĩ ta ngome sya thaavu, ilũmanĩtw'e na mavia ma thooa mũnene. Mwĩĩ wake nĩ ta ũseũvĩtw'e na maeo ma nzou, manakavĩtw'e na mavia ma thooa mũnene metawa savaya.

15Maũũ make mailyĩ ta ituĩ iseũvĩtw'e na mavia manake, iũngamĩtw'e matinanĩ ma thaavu. Wũmbo wake nĩ ta Iĩma sya Levanoni, nĩ mũseo ta mĩtĩ ya mĩkũũ.

16Ũneeni wake wĩ mũyo mũno, na wũmbo wake w'onthe nĩ wa kwendeesya. Eĩtu ma Yelũsalemu, ũu nĩw'o mwendwa wakwa, mũnyanyawa ũilyĩ.

← Chapter 4 Jump to: Chapter 6 →