Song of Solomon 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Ũtukũ nĩ ũkomonĩ wakwa, nĩnaotie ngĩmantha ũla ngoo yakwa yendete; nĩnamũmanthie ĩndĩ ndyaamwona.

2Nĩnaisye atĩĩ, “Nĩngũamũka yu na ngĩthi ngangange ndũanĩ, nzĩanĩ syayo, o na tũsĩlanĩ twayo, nĩmũmanthe ũla ngoo yakwa yendete.” Nĩnamũmanthie ĩndĩ ndyaamwona.

3Asyaĩĩsya nĩmambonie, maendee kwanganga maisyaĩĩsya ndũa. Nĩnamakũlilye atĩĩ, “Mũũmbonea ũla ngoo yakwa yendete?”

4Nataanĩsya namo oou, nĩnoonie ũla ngoo yakwa yendete. Nĩnamũkwatie, na ndyaĩ nĩmũeka athi, nginya yĩla namũtwaie nyũmba kwa mwaitũ, nginya kasũmbanĩ ka ũla wanzyaie.

5Inyw'ĩ eĩtu ma Yelũsalemu, ĩvĩtei na nthwaia kana na ndaatai, kana mũiambĩĩsya kana kũamũkya wendo, nginya yĩla ĩvinda yaw'o yĩvika.

6Nũũ ũya wũkĩte kuma weũnĩ ailyĩ ta kĩlingi, anyungĩthĩtw'e nesa na mauta ma manemane kana ũvani wa thooa mũnene wĩtawa ũvumba, na mauta onthe me mũuke mũseo ma mũthoosya?

7Kaĩ nĩ kĩvĩla kĩla Solomoni ũkuawa nakyo, kĩthyũlũlũkĩtwe nĩ ngũmbaũ mĩongo thanthatũ, katĩ wa ngũmbaũ sya Ĩsilaeli.

8Kĩla ũmwe akwete ũvyũ, na nĩwĩsĩ kũkita nesa, kĩla ũmwe ovee ũvyũ wake kĩnyunyunĩ, eyũmbanĩsye mĩisyo ya ũtukũ.

9Mũsumbĩ Solomoni nĩweeseũvĩisye kĩvĩla kya kũmũkuaa, akĩseũvisye na mbwaũ kuma Levanoni.

10Ituĩ syakyo aiseũvisye na silĩva, vandũ va kwaĩĩa avaseũvisye na thaavu; vala kĩkalĩlawa avaseũvya na itambaa sya langi wa langi wa nzambalaũ, itumĩtwe na wendo nĩ eĩtu ma Yelũsalemu.

11Umaalai inyw'ĩ eĩtu ma Saioni, na mũyona mũsumbĩ Solomoni; ekĩĩte ngovia ya mũtwaani ĩla weekĩiwe nĩ inyia wake mũthenya ũla watwaanaa, ĩĩ, mũthenya ũla ngoo yake yaĩ na ũtanu.

← Chapter 2 Jump to: Chapter 4 →