Song of Solomon 8

Kamba (MBIVILIA ŨVOO MŨSEO)

← Chapter 7 Jump to:

1Kethĩwa we wĩ mwana-a-ia, ũla woongie nondo sya mwaitũ! Ngakomanĩa naku nza, ngũkethya na ngethi ya wendo, na ũyĩthĩa vai mũndũ ũmbũthya.

2Ngũtongoesya ngaũete nyũmba kwa mwaitũ, kasũmbanĩ ka ũla wanzyaie. Ngũnenga ndivai mbulany'e, ngũnenga ndivai ya makũngũmanga makwa.

3Kw'oko kwake kwa aka kwĩ ungu wa mũtwe wakwa, kw'oko kwake kwa aũme nĩkũngumbatĩlye.

4Inyw'ĩ eĩtu ma Yelũsalemu, nĩngũmũkũlya mwĩvĩte, kana mũiambĩĩsya kana kũamũkya wendo, nginya yĩla ĩvinda yaw'o yĩvika.

5Nũũ ũũ wambatĩte kuma weũnĩ, eyaĩĩsye mwendwa wake? Nyie nĩnakũamũkisye ungu wa mũtĩ wa mũevo, vau nĩvo inyia waku wakwaũnyĩie, vau nĩvo ũla wakũsyaie waũnyĩie.

6Mbĩkĩe ta mũulĩ ngoonĩ yaku, ĩĩ, ta mũulĩ kw'okonĩ kwaku, nũndũ wendo wĩ vinya ta kĩkw'ũ, nakyo kĩwĩu kyaw'o nĩ kyathe ta mbũa. Wakanaa ta mwaki, wakanaa ta ũlĩlĩnzĩ mũnene.

7Kĩw'ũ kingĩ kĩitonya kũvosya wendo, o na kĩw'ũ kingĩ kĩitonya kũũvw'ĩka. O na mũndũ akanengane syĩndũ syonthe sya nyũmba yake athooe wendo, akwata o kĩvũthya kĩthei.

8Twĩ na mwĩĩtu-a-ia mũnini, na ndanamba kumya nondo. Tũkeekana na mwĩĩtu-a-ia waitũ ata, mũthenya ũla wĩĩvaw'a?

9Kethĩwa mwĩĩtu-a-ia nĩ ũkũta, tũmwakĩĩa mwako mũtũlu wa silĩva; kethĩwa nĩ mũomo, tũmũsiĩĩa na mbwaũ sya mũkũũ.

10Nyie naĩ ũkũta, na nondo syakwa syaĩ ta myako mĩtũlu. Kwoou nĩ mbee wake, nailyĩ ta mũndũ ũla ũetae mũuo.

11Solomoni aĩ na mũũnda wa mĩsavivũ waĩ Mbaali-amoni; nĩwakomboethisye aĩmi mũũnda ũsu, kĩla ũmwe aĩvaa mbesa sya silĩva ngili ĩmwe.

12Mũũnda wakwa wa mĩsavivũ nĩ wakwa mwene, na nĩ kwondũ wakwa mwene; we Solomoni osa ngili syaku sya silĩva, na kĩla mũsũvĩi wa matunda ayosa maana elĩ make.

13We ũla wĩkalaa mĩũndanĩ, anyanyawa meĩthukĩĩsya wasya waku; eka nĩwĩw'e!

14Ĩkalaate mwendwa wakwa, ĩthĩwa ũilyĩ ta nthwaia kana ta ndaatai nũme ya mũika, yĩ iĩmanĩ sya mĩtĩ yĩ mũuke mũseo.

← Chapter 7 Jump to: