Revelation 1

kumaoni

Jump to: Chapter 2 →

1यो किताब उन बातुन का बारिमें बतूछी जो परमेश्वरेले यीशु मसीह स दिखाछ। परमेश्वरेले ऊस दिखाछ ताकि उ अपून सेवकून उन घटनानका बारिमें बता सको जो जल्दी होला। यीशु ले अपून स्वर्गदूत स उ संदेशा का दगाड़ म्यारा पास मतलब अपून दास यहूना का पास भेजछ्य।

2येक कारण, मैं यहूना ले उ सब कुछ लिखछ्य जो मैंले देखछ्य। मैंले यो किताब में परमेश्वरा का बचन और उ सच्ची शिक्षा लिखभेरन बताईना की छै जिनरी जानकारी यीशु मसीह ले मैंस दीईना की छी।

3परमेश्वर हर उ आदिमीस आशीष द्योलो जो यो भविष्यवाणी स दुसरान पढ़भेरन सुणूछो, और उ हर उ आदिमीस आशीष द्योलो जो येस सुणछो और येस मानछो। किलैकी इन बात जल्दी होला।

4मैं, यहूना, यो चिठ्ठी उन सातों विश्वासीन की मण्डलीन खिन लिखून मरैयू जो आसिया प्रदेश में छन। मैं प्रार्थना करछूँ कि तुमून परमेश्वरै की तरफ भटे अनुग्रह और शान्ति मिलो, और उ उई परमेश्वर छै जो छै जो हमेशा छ्यो और जो ऊँनवालो छै। और उन सात आत्मान का तरफ भटे, जो परमेश्वरा का सिंहासन का सामुनि छन।

5और यीशु मसीह का तरफ भटे जैका बचन में भरोसा करि जा सकछो उई छै जो मरिना में भटे पैलो छै और उ यो संसाराक सबै राजान में राज करछो। तुमून अनुग्रह और शान्ति मिलनै रो। उ हमून प्रेम करछो और हमून बचाछ, उ अपून खूनाक द्वारा हमून हमार पापून भटे छुड़ूछो। उले हमून इसो बना दीछ, जिनोरो परमेश्वर राजा छै और उले हमून अपून पिता परमेश्वर खिन याजक बना दीछ। ऊस आदर और अधिकार हमेशा और हर बखत मिलनै रौ। आमीन।

7सुणा, उ बादलून का दगाड़ ऊँनवालो छै; और हरेक आदिमी ऊस देखाला, जो लोग उकी मौत खिन जिम्मेदार छ्या, उन ले ऊस ऊँन देखाला। संसारा का सब लोग जोरले रोला जब उन ऊस देखाला। होई, इसो होलो! आमीन।

8प्रभु परमेश्वर कुंछो, “मैं अल्फा और ओमेगा छूँ, जैको मतलब छै पैलो और आखरी। मैं उई परमेश्वर छूँ जो छै, जो हमेशा भटे छयो, और जो ऊँनवाला छै, और सर्वशक्तिमान छै।”

9मैं, यहूना, जो मसीह में तुमोरो दगड़िया छूँ, तुमार नियाती सताई जाछूँ। मैं परमेश्वर क राज्यो को एक नागरिक छूँ जसकैं तुम छा, और मैंस ले अपूनी परेशानीन उसीकैं धैर्य दगाड़ सहन करूनो चैछो जसकैं तुम करछा। मैं परमेश्वरा का बचन को प्रचार करून और यीशु का बारिमें बतूना का कारण पतमुस टापू में भेज दी गैछ्यू।

10मैं प्रभु की अराधना का दिन पवित्र आत्मा मैंमें आछ, मैंले अपून पछिल है कैसे बोलूनो सुणछ्य यो आवाज तुरी आवाज की नियाती ऊची और साफ आवाज में बोलून मरैछ्यो।

11उले मैंथैं क्योछ, “जो कुछ तै देखछै, ऊस किताब में लिखभेरन येस उन सातों विश्वासीन की मण्डली स भेज जो इन शैहरून में छन; मतलब इफिसुस, स्मुरना, पिरगमुन, थुआतीरा, सरदीस, फिलदिलफिया और लौदीकिया स।”

12मैं यो देखून खिन पछिल कै मुड़ियो कि को मैंथैं बात करून मरैछ्यो। जब मैं मुड़ियू, त मैंले सात सूना का दीपदान देख्यान;

13और उन दीपदानून क बीच में एक प्राणी ठाड़ छ्यो, जो एक आदिमी का नियाती दिखाई दीन मरैछ्यो, उले एक लम्बो कपाड़ा पैनिन को छ्यो जो उक खुटान तक पुजिना को छ्यो, और अपूनी छाती में सूना को पट्टा पैनिना को छ्यो।

14उक ख्वारा का बाल सफेद ऊना का जसा और हियू जसा चमकून मरैछ्या। और उक आँखा आगा का लपटून की नियाती छ्या।

15उक खुटा पीतल का नियाती चमकून मरैछ्या जो तेज गर्म आग में चमकछो। जब उ बोलछ्य त उकी आवाज इसी छी जसकैं एक ठूला पानि झरना की आवाज छै।

16उ अपून दैना हात में सात तारा लीईना को छ्यो, और उक मुख भटे तेज द्वी धारी तलवार निकलछी। उको मुख छकाला का सूरज की नियाती चमकून मरैछ्यो।

17जब मैंले ऊस देखछ्य त मैं तुरन्त उक खुटान में खिती पड़ियू। मैं एक मरिनाका आदिमी को जसो होग्यू लेकिन उले मैंमें अपूनो दैन हात राखभेरन यो क्योछ, जन डर; मैं आदि और अन्त छूँ, मैं उ छूँ जो हमेशा ज्यूनो छूँ।

18मैं एक बार मर गैछ्यू। लेकिन अब मैं ज्यूनो छूँ और मैं हमेशा ज्यूनो रूलो। म्यारा पास उ चाँबी छन जो मैंस उ जाग स खोलना की ताकत दीछी जाँ मरिनाका लोग छन और उनून दुबारा है ज्यूना करना की ताकत छै।

19येक कारण जो तैले देखछ्य, उ लिख ले, मतलब उन द्वीवै चीजून जो एल तक होर्यान और जो बाद में होला।

20अब मैं बतुलो कि म्यारा दैन हात में सात तारान को कि मतलब छै और उ सात सूना का दीपदान सात को कि मतलब छै जो कि पैलि मालूम नी छ्यो। येको मतलब यो छै सात तारान उन स्वर्गदूतून दिखूछो जो विश्वासीन की मण्डली की रखवाली करछी, और उ सात सूना का दीपदान सात विश्वासीन की मण्डली देखूछी।

Jump to: Chapter 2 →