Revelation 3

kumaoni

← Chapter 2 Jump to: Chapter 4 →

1सरदीस शैहरा का विश्वासीन की मण्डली का स्वर्गदूत स लिख “मैं उई छू जैका पास परमेश्वरै की सात आत्मा और सात तारा छन, उ यो कुंछो कि मैं जाणछूँ कि तै कि करछै, तै कसी मेहनत करछै और कभै हार नै माननै, तै विश्वासयोग्य त छै, लेकिन सच्ची में तै मेरि बात नै करनै।”

2येक कारण सतरक हो ज्या कि, जो त्यारा भितर मैंखिन थ्वाड़ा विश्वास बचिना को छै ऊस मजबूत कर ताकि यो पुरी तरीका ले खत्म नै जो ज्यो। मैं जाणछूँ कि त्यारा भितर भौत ठूली कमी छै किलैकी जो तै करून मरेछै परमेश्वर उहै खुश नाहातिन।

3उ शिक्षा स याद कर जो तैले भौत पैलि सुणिना की छी और उमें विश्वास करछ्य। जो तैंस सिखाईना को छ्यो ऊस मान, अपून गलत कामून है पश्चाताप कर। अगर तै लापरवाही करनै रौले त मैं अचानक आ जियूलो, जसकैं रात में एक चोर ऊँछो, और तै उ बखत जाण ले नी सकले जब मैं तैंस दण्ड दीन खिन ऊँलो।

4लेकिन सरदीस शैहरा का विश्वासीन की मण्डली में तुमार बीच थ्वाड़ाई लोग छन, जिनूनले विश्वासी का होभेरन साफ जीवन जीछ। उन साफ सफेद कपाड़ा पैन भेरन म्यारा दगाड़ रोला, किलैकी उन इसा लायक छन।

5जो आदिमी शैतानी ताकतून हरा द्योलो, उले इनारा नियाती सफेद कपाड़ा पैनोलो। मैं उ आदिमी को नाम उ किताब में है नी मिटूलो जैमें उन लोगून का नाम लिखीना का छन जिनारा पास सच्चो जीवन छै। जब कि मैं अपून पिता और स्वर्गदूतून का सामुनि ठाड़ हुलो जो उकी सेवा करनान, त मैं घोषणा करूलो कि उन म्यारा छन।

6जो कोई यो बात स सुण सकछो जो मैं कुंन मरैयू, उ यो समझना की कोशिश करो कि, पवित्र आत्मा विश्वासीन की मण्डली थैं कि कुंछो।

7फिलदिलफिया शैहरा का विश्वासीन की मण्डली का स्वर्गदूत स यो लिख: “मैंई उ छूँ जो पवित्र और सच्चो, जैका पास उ चाबी छन जो राजा दाऊद का छन।” जब मैं उ चाबी स लीभेरन एक द्वार स खोलछूँ त कोई ले ऊस बंद नै कर सकनो, और जब मैं चाबी लीभेरन ऊस बंद कर दीछूँ त कोई ले ऊस खोल नै सकनो, उ योई कुंछो कि,

8मैं जाणछूँ कि तै कि करछै, तै कसी मेहनत करछै और कभै हार नै माननै, सुण मैं यो ले जाणछूँ कि तैमें सिर्फ थ्वाड़ा क्षमता छै, लेकिन फिरले तैंले मेरि कईना की बातुन में विश्वास करछ्य और तैले इन बात भटे मना नै कर्यो कि तै मैंमें विश्वास करछै। येक कारण इसो के छै जो एक इसो द्वार जसो छै जैस मैंले तैखिन खोल दीछ, जैस कोई ले बंद नै कर सकूनो।

9येक कारण सुण, मैं उन लोगून का बारिमें जाणछूँ जो दावा करनान कि उन परमेश्वरा का चुनिना का लोग छन मतलब यहूदी, लेकिन छन नै। उन त्यारा बारिमें झूठ्ठी बात बोलनान, लेकिन सच्ची में उन उ दल का सदस्य छन जो शैतान का छन मैं इसो करूलो, कि उन आभेरन त्यारा सामुनि दण्डवत् कराला, और यो जाण ल्याला, कि मैं तैंस प्रेम करछूँ।

10तैले म्यारा संदेश मानछ्य ताकि जब तै दुख उठालै त ऊस बड़ा धैर्य का दगाड़ सहन कर सके। योई कारण, मैं उ ठूली परीक्षा का बखत तेरि रक्षा करूलो। जो यो संसाराक सब लोगून में आलो।

11मैं जल्दी ऊँनवाला छूँ; येक कारण जो विश्वास तेरो मैंमें छै, ऊस कभै जन छोड़े, ताकि कोई ले तेरो मुकुट छड़ा नै ले।

12जो आदिमी शैतानी ताकतून हरा द्योलो, उ परमेश्वरा का मन्दिर में एक खम्भाक जसो होलो, जैकी मैं सेवा करछूँ और उनून ऊस कभै ले छोड़ून नी पड़ोलो। मैं उमें अपूनो परमेश्वरो को नाम लिखलो, यो दिखाभेरन कि उन उक छन और परमेश्वरो को शैहरो को नाम लिखूलो, यो उई छै जैस नय्या यरूशलम शैहर कयी जाछो। यो उई शैहर छै जो स्वर्ग भटे, मतलब म्यारा परमेश्वरा का तरफ भटे तलि आलो। मैं उमें अपूनो नय्या नाम ले लिखूलो।

13जो कोई यो बात स सुण सकछो जो मैं कुंन मरैयू, उ यो समझना की कोशिश करो कि, पवित्र आत्मा विश्वासीन की मण्डली थैं कि कुंछो।

14लौदीकिया शैहरा का विश्वासीन की मण्डली का स्वर्गदूत स यो लिख: कि मैं उ छूँ जो आमीन और विश्वासयोग्य, और सच्चो गवा छै, और परमेश्वरै की सृष्टि को मूल कारण छै, और मैं उ छूँ जैक द्वारा परमेश्वरेले सब चीजून बनाछ, मैं जो कुछूँ ऊस सुण:

15मैं तेरा कामून निकीकैं जाणछूँ कि तै नै त मैंमें अपून विश्वास भटे इनकार करून मरेछै और नै मैंस पुर मनले प्रेम करछै मैं चाछूँ कि या त तै मेरो इनकार कर दे या मैंस पुर मनले प्रेम कर।

16येक कारण मैंस पतो छै कि तै नै त मैंमें अपून विश्वास को इनकार करून मरेछै और नै अपून पुर मनले मैंस प्रेम करछै, किलैकी तै म्यारा प्रति अपून विश्वास में सिर्फ आधा-अधूरो छै, येक कारण मैं तैंस अपून है दूर करून खिन तैयार छूँ।

17तै कुछै कि तै धनवान छै और त्यारा पास उ सब छै जैकी तैंस जरूरत छै, लेकिन तै नै जाणनै कि येको सच यो छै कि, तैमें तरस ऊँछो। किलैकी सच यो छै कि तै गरीब छै, तेरा पास कपाड़ा नाहातिन, और तै अन्धो छै।

18येक कारण ले, मैं तैंस आग ले शुद्ध करिना को सुना स मैंथै मोल लीना की सलाह दीछूँ ताकि तै सच्ची में धनवान बन सके। तैंस अपून पैनून खिन सफेद कपाड़ा मैंथै मोल लीन चैंछो ताकि तै लोगून का द्वारा तैंस नंगो देखना की शर्मिदगी भटे बच सके। तैंस अपून आँखान में डालून खिन थ्वाड़ा सुरमा ले मैंथै मोल लीन चैछो, ताकि तै देख सके।

19मैं जैस ले प्रेम करछूँ, ऊस मैं सिखूछूँ और सजा ले दीछूँ ताकि उन निका बन जून। येक कारण भलाई करून में लाग रौ, पापक काम करून बंद कर दे।

20सुणा, मैं तुमार दिल में ऊँन खिन उ आदिमी की नियाती छूँ जो घरा का भ्यार ठाड़ छै और द्वार स खटखटूछो। अगर तुम मेरि आवाज स सुणछा और मैंखिन अपूनो दिल खोलछा त मैं भितर ऊँलो और हम एक-दुसरा का दगाड़ संगति करला।

21जो आदिमी शैतानी ताकतून हरा द्योलो, मैं ऊस अपून दगाड़ सिंहासन में बैठूना को अधिकार द्यूलो। यो बिल्कुल म्येरो जसो होलो, जसकै मैंले शैतानी ताकतून हरा दीछ और अपून पिता का दगाड़ सिंहासन में बैठ गयूँ।

22जो कोई यो बात स सुण सकछो जो मैं कुंन मरैयू, उ यो समझना की कोशिश करो कि, पवित्र आत्मा विश्वासीन की मण्डली थैं कि कुंछो।

← Chapter 2 Jump to: Chapter 4 →