Revelation 18

kumaoni

← Chapter 17 Jump to: Chapter 19 →

1येका बाद, फिर मैंले स्वर्ग भटे एक स्वर्गदूत स तलि ऊँन देखछ्य। उक पास भौत अधिकार छ्यो; और उकी भौत चमकदार चमक का कारण पुरी धरती में उज्यालो हो ग्यो।

2उले जोरले धध्याभेरन क्योछ, “नाश हो ग्यो, उ बेबीलोन देश बुरा तरीका ले नाश हो ग्यो। और उ भूतून की रूना की जाग, और हरेक बुरी आत्मा को अड्डा, और हरेक अशुद्ध और घृणित चिड़ियान को अड्डा बन ग्यो।”

3यो येक कारण होलो किलैकी उ स्यैनि ले जो बेबीलोन देश छै, हरेक जाति का सब लोगून ब्यभिचार की मदहोश करून वाली शराब ले धुत कर दीछ, जो उकी मूर्तिन की पूजा करनान। पुर संसारा का राजान ले उक दगाड़ व्यभिचार करिना को छै। और संसारा का ब्यापारी उ स्यैनि की मैहंगी-मैहंगी चीजून की इच्छा का कारण धनवान बन ग्यान।

4फिर मैंले स्वर्ग भटे एक आजि आवाज सुणछ्य, हे म्यारा लोगो, उ शैहर में भटे भ्यार निकल जा। तुम उन लोगून का पापून का भागीदार जन बना, ताकि जो बिपत्तिन उमें आलि उ तुमार मलिमें नै अ।

5किलैकी उक पाप भौत छन और उको खता स्वर्ग तक पुज ग्योछ, और परमेश्वर उ बुराईस नै भुलनो जो उले करिना की छै।

6येक कारण मैं कुंछूँ, उ शैहरा का दगाड़ ले ऊसोई कर, जसो उले दुसारा लोगून का दगाड़ करछ्य। और जो दुख उले दीयान ऊस दुगुन लौटा दे। उले लोगून अपून बुरा कामून को स्वाद चाखून खिन प्रभावित करछ्य, ऊस परमेश्वरो को गुस्सा ले दुगुन ताकतले सहन पड़ोलो।

7जतुक उले अपूनी बड़ाई करछ्य और भोग बिलास करछ्य उतकैं ऊस तखलीफ दीछ, उले अपून मन में क्योछ, “मैं एक रानी की नियाती लोगून में राजा करलो। मैं एक विध्वा नाहातिनू, और मैं शोक कभै नी करूँ।”

8येक कारण एक्कै दिन में उमें बिपत्ति आ पड़ाला, और मौत, और शोक, और अकाल; और उ आग में भस्म कर दी जालि, किलैकी उको न्याय करूनवाला प्रभु परमेश्वरा का शक्तिमान छै।

9“तब संसारा का राजा, जिनून ले उक दगाड़ ब्यभिचार और भोगबिलास करछ्य, जब राजा ऊस आगा का लपटून में जलून देखाला त उन उनून खिन रोला और छाती पीटाला।”

10और उकी तखलीफ का डरा का मारी उन भौत दूर ठाड़ हो भेरन कौला, हे ठूला देश, बेबीलोन! हे मजबूत देश, हाय! हाय! पल भर में परमेश्वरो को न्याय तैमें अचानक आग्योछ।

11“संसार का ब्यापारी उ खिन डाड़ मारला और बिलाप कराला, किलैकी अब कोई नाहातिन जो उ सामान स मोल ल्योलो जो ऊस बचुन मर्यान।”

12उनोरो माल कई प्रकारो को छ्यो। उमें सुन, चाँदी, रत्न, और मोती छ्या। उमें बेहतरीन कपाड़ा छ्या जो मेहंगा धागा, चमकील लाल और बैंजनी कपाड़ा ले बनिना का छ्या। उमें खुशबुदार लाकाड़ा ले बनिना का चीज, हाथी का दाँत ले बनिना का चीज छ्या, और दुसारा चीज छ्या जो मेहंगा लाकाड़ा या पीतल और लूवा और संगमरमर ले बनिना का छ्या,

13और दालचीनी, मसाला, धूप, इत्र, लोबान, मदिरा, तेल, मैदा, ग्यूँ, गोरू-बल्द, भेड़-बाकारा, घोड़ा, रथ, और जो समान मोल लीछ्या और बेचनान, उन अब लोगून दास रूप में नै बेच सकना।

14ब्यापारी उथैं कौला, “उन सब चीज जैस तै चाँछी अब नाहातिन। उ खुशबुदार चीज जो तैंस पसन्द छ्या, उन सब चीज जिनून तै अपून शरीर स सुन्दर बनून खिन इस्तमाल करछी, उन सब हरा ग्यान उन अब नी मिलाला।”

15इन चीजून का ब्यापारी जो उक द्वारा धनवान हो गैछ्या, उकी तखलीफस देखभेरन दूर ठाड़ होला, और डाड़ मारभेरन बिलाप करभेरन कौला।

16हाय! हाय! यो ठूलो नगर जो मलमल, और बैंजनी और लाल रंगा का कपाड़ा पैनिना को छ्यो, और सुन और रत्नूले और मोतिन ले सजीना को छ्यो,

17थ्वाड़ा बखत में परमेश्वर उको सब धन नाश कर द्योलो। पानि का जहाज का सब कप्तान, और सब सवारी, और जहाज में काम करूनवाला, और उन सब जो समुद्र में काम करभेरन कमाई करनान, बेबीलोन देश भटे भौत दूर ठाड़ होभेरन,

18उ आग भटे निकलून वाला धुआँ देखाला जो शैहर स जलून मरैछ, तब उन चिल्लाल और कौला, “यो महान शैहरो को जसो कोई दुसोरो शैहर नाहातिन।”

19उ अपूनो दुख देखून खिन अपून ख्वारान में धुल डालाला, और रोला और बिलाप करभेरन कौल, “हाय! हाय!” यो ठूला नगर जैकी सम्पत्ति का कारण, हरेक जैका पास समुद्री जहाज छ्या, उन धनवान हो ग्या, और थ्वाड़ा बखत में उनोरो सब धन नाश हो ग्यो।

20“तुम जो स्वर्ग में रूछा, और हे परमेश्वरा का लोगो, और प्रेरितो, और परमेश्वरो को संदेश दिनवाला लोगून यो बारिमें भौत खुशी मना, किलैकी परमेश्वर उ शैहर में अपूनो न्याय भेजिना को छै, उ बुराईक कारण जो उले तुमार दगाड़ करिना की छै।”

21फिर एक ताकतवर स्वर्गदूत ले ठूलो चक्की को पाट जसो एक ढूंगो उठाछ, और यो कैभेरन समुद्र में खित दीछ, “ जसा तरीका ले यो ढूंगास समुद्र में खित जाछो, और उ दुबारा नै मिलनो, उसीकैं ठूलो देश बेबीलोन ले एक्कै बार में नाश हो ज्यालो। यो दुबारा नी बनाई जालो।”

22हे बेबीलोन देश, तैमें फिर कभै वीणा बजूनवाला और गीत की आवाज नी सुणाई देली। वाँ मुरूली या तुरी नी बजाई जाला, और कोई ले बड़िया कारीगर तैंस नी मिलाला; और चक्की को चलनाकि आवाज तैंस कभै नी सुणाई देली;

23उक रात अन्यारा होला, याँ तक कि एक दीया ले नी जलोलो। और ब्योलो और ब्योलि की खुशी की आवाज नी होलि। इसो येक कारण होलो किलैकी उक ब्यापारीन ले, जो पुर संसार में सबून है ठूला छ्या अपून जादू-टोना ले सब जाति का लोगून ध्वाका दीछ।

24परमेश्वरेले बेबीलोन देश स येक कारण दंड दीछ किलैकी यो शैहर ले परमेश्वरो को संदेश दिनवाला लोगून, और दुसारा सब लोगून जो परमेश्वरा का छन और पुर संसारा का लोगून में खूनो को दोष छ्यो।

← Chapter 17 Jump to: Chapter 19 →