Revelation 19

kumaoni

← Chapter 18 Jump to: Chapter 20 →

1जब उ शक्तिशाली स्वर्गदूत ले बोलून बन्द करछ्य, तब मैंले सुणछ्य, उ इसो जसो छ्यो जसकैं स्वर्ग में भौत लोग गीत गान मर्यान हुन! हालेलूय्याह “अब हमोरो परमेश्वर अपूनी महिमा और सामर्थ को इस्तमाल करभेरन अपून लोगून बचालो।”

2उकी अराधना करा किलैकी उक सब फैसला सही और सच्चा छन। येक कारण उले उ ठूली वेश्या को न्याय करछ्य, किलैकी उले संसारा का लोगून पाप करून खिन मजबूर करछ्य। परमेश्वरेले उको न्याय करिना को छै किलैकी उक सेवकून उक द्वारा मारी गैछ्या।

3फिर दुसारा बार ले मैंले सुणछ्य, इसो लागून मरैछ्यो जसकैं स्वर्ग में भौत लोग गीत गान मर्यान हो! हालेलूय्याह! बेबीलोन देश स नाश करूनो वालो आगा भटे निकलून वालो धुआँ कभै ले बन्द नी होलो।

4तब चौबीस प्राचीन और चारू प्राणी ले झुकभेरन परमेश्वरै की अराधना करछ्य; जो सिंहासन में बैठिना को छ्या, और क्योछ, “आमीन! हालेलूय्याह।”

5और फिर मैंले कैसे बोलून सुणछ्य, और इसो लागछ्य जसकैं आवाज परमेश्वरा का सिंहासना भटे आछ, “हे हमार परमेश्वरा का सेवकों और तुम जो उको डर मानछा, तुम चाहे ठूला पद में हो या नाना पद में परमेश्वरे की स्तुति करा।”

6येक बाद, मैंले यो ले सुणछय जो भौत ज्यादा लोगून को चिल्लान जसो छ्यो। उनोरो चिल्लानो ठूलो झरना का पानि का गर्जन की नियाती छ्यो, और बादल की ठूली गड़गड़ाट की आवाजे की नियाती छी। मैंले उनून यो कुनै सुणछ्य; “हालेलूय्याह! आ हम हमार प्रभु परमेश्वरे की स्तुति करा। क्याखिनकि उक पास हरेक जाग राज्य करना की सामर्थ छै।

7आ, हम खुश और मगन हो, और उकी स्तुति करा, क्याखिनकि मेम्ना को ब्याक बखत आग्योछ, और उकी ब्योलि अपूनो शिंगार करभेरन अपूनास सजाभेरन उ खिन तैय्यार कर हैछ।

8परमेश्वरे ले मेम्ना स साफ, चमकदार मलमल का बनिना का कपाड़ा पैनून खिन दीयान।” क्याखिनकि उ चमकदार मलमल को मतलब, परमेश्वरा का लोगून का धर्माका काम छन।

9तब स्वर्गदूतले मैंथैं क्योछ, “यो लिख, कि धन्य उन छन, जो मेम्ना का ब्याका दावत में बुलाई ग्यान।” फिर उले मैंथैं क्योछ, “इन वचन जो परमेश्वरे ले कईना का छन, उन बिलकुल सत्य छन।”

10जब मैंले सुणछ्य त मैं उ आदिमी का सामुनि झुक गयुं जो मैंथैं बात करूनमर्यो छ्यो, किलैकी मैं उकी अराधना करून खिन जानमरै छ्यूँ। उले मैंथैं क्योछ, “मेरि अराधना जन कर, मैं केवल परमेश्वरो को एक सेवक छूँ जसो तैं छै और त्यारा भाईन का नियाती जो यीशु का गवाह छन सच्ची शिक्षान में विश्वास करनान और मान्नान। केवल परमेश्वरै छै जैकी तैंस अराधना करून चैंछी। क्याखिनकि परमेश्वर आत्मा छै जो परमेश्वरा का लोगून यीशु का द्वारा बताई ग्यान सत्य की घोषणा करना का योग्य बनूछो।”

11फिर मैंले स्वर्ग स खुलीना को देखछ्य, और वाँ मैंले एक सफेद घोड़ो ले देखछ्य, जैमें एक सवार बैठिनाको छै, जो परमेश्वरो को विश्वासयोग्य और सच्चो सेवक छै; उ उक अनुसार जो परमेश्वरेकि नजर में ठीक छै, परमेश्वरा का बैरिन का खिलाफ न्याय करछो और लड़ाई करछो।

12उक आँखा आगा का लपटून की नियाती चमक छ्या, और उले भौत ज्यादा मुकुट पैनिना का छ्या। उक आंग में एक नाम लिख रैछ, लेकिन केवल उई उ नामोको मतलब जाणछो।

13उ खून में लतपत होईना का कपाड़ पैनिनाको छै, और उको नाम परमेश्वरो को वचन छै।

14स्वर्ग भटे सिपाईन की ठूली भीड़ उक पछिल-पछिल गैछ, यो सैनिक सफेद घोड़ान में बैठिनाका छ्या और उनूनले सफेद मलमल का कपाड़ा पैनिना का छ्या।

15जो घोड़ा में बैठिनाको छ्यो उको मुँख भटे एक तेज तलवार निकलछी जैको इस्तमाल उन देशून हरून खिन करोलो, और उ लूवाको राजदण्ड लीभेरन उनूनमें राजा करोलो, और सर्वशक्तिमान परमेश्वरा का भयानक गुस्सा की मदिरा का कुंण्ड में अंगूर स निचोड़ोलो।

16और उक कपाड़ा और दैंन जंगाड़ में यो नाम लिखीना को छै, “उ प्रभुन को प्रभु और राजान को राजा छै।”

17फिर मैंले एक स्वर्गदूत स सूरज में ठाड़ होईनाको देखछ्य, उले जोर धध्याभेरन आकाश उड़ून वालान सब चिलून थैं क्योछ, आ, उ ठूली दावत खिन जाम हो जा, जो परमेश्वरेले तुमून खिन तैय्यार कर रैछ।

18आ और राजान को, और सब सरदारून को, और ताकतबर सैनिकून को, घोड़ा और जो उनूनमें बैठून वाला जो मर ग्यान उनोरो माँसो खा। तुम हर प्रकारो लोगून को माँसो खा सकछा, क्या दास क्या आजाद हो, क्या नाना क्या ठूला सबून को।

19फिर मैंले उ जानवर स देखछ्य जो समुद्र भटे भ्यार आईना को छ्यो, और संसारा का राजान और उनेरि सेनान ले देखछ्य, उन घोड़ान में बैठीनाका और उकी सेना का बिरोध में लड़ून खिन एक दगाड़ आईना का छ्या।

20उ पैलो जानवर और उक दगाड़ दुसोरो झूठ्ठो जानवर पकड़ी ग्यो, उले पैला जानवर का तरफ भटे चमत्कार दिखाईना छ्या, जैक द्वारा उले ऊस भरमाछ जिनून में उ जानवर कि छाप छी, और जो उकी मूर्ति कि पूजा करछ्या। इन द्वीवैन ज्यूनाई आगा का कुण्ड में डाल दी ग्यान जो गन्धक ले जलछी।

21तब सफेद घोड़ा में बैठीनवालो उ सवार ले जंगली जानवर स और उकी पुरी सेना स मार डालछ्य, उले उनून उ तलवार ले काट डालछ्य जो उक मुँख भटे निकलछी। चील मरिनाका लोगून को माँसो खान खिन आग्या जब तक की उनोरो पेट नै भरीग्यो।

← Chapter 18 Jump to: Chapter 20 →