2 Kings 14

Kikuyu Bible (IBUKU RĨRĨA ITHERU RĨA NGAI)

← Chapter 13 Jump to: Chapter 15 →

1Na rĩrĩ, mwaka wa ĩĩrĩ ĩrĩa Joashu, mũrũ wa Jehoahazu, mũthamaki wa Isiraeli, aakorirũo athamakĩte-rĩ, nĩguo Amazia, mũrũ wa Joashu, mũthamaki wa Juda aambĩrĩirie gũthamaka.

2Nake aarĩ wa mĩaka mĩrongo ĩĩrĩ na ĩtano hĩndĩ ĩo aambĩrĩirie gũthamaka, agĩthamaka mĩaka mĩrongo ĩĩrĩ na kenda kũu Jerusalemu; nake nyina etagwo Jehoadini wa kũu Jerusalemu.

3Nake agĩgĩĩka maũndũ marĩa monagwo marĩ mega nĩ Jehova, no ti ta ũrĩa ithe, Daudi, ekaga; no rĩrĩ, ekire maũndũ mothe o ta ũrĩa ithe, Joashu, ekaga.

4No rĩrĩ, matĩri ma kũndũ gũtũũgĩru matiigana kweherio; andũ no maatũire marutagĩra igongona, o na magacinĩra ũbumba, matĩri-inĩ macio.

5Na gũgĩkinya atĩrĩ, atĩ o rĩmwe ũthamaki warũma wega wĩ moko-inĩ make, akĩũraga ndungata ciake iria cioragĩte ithe mũthamaki;

6no rĩrĩ, ciana cia andũ acio maarĩ oragani ndaigana gũciũraga; no ekire o ta ũrĩa ũhoro wandĩkĩtwo ibuku-inĩ rĩa watho wa Musa, ũrĩa gwathanĩtwo nĩ Jehova, akoiga atĩrĩ, Maithe ma ciana matikanoragwo nĩ ũndũ wa ciana ciao, kana ciana ciũragwo nĩ ũndũ wa maithe; no rĩrĩ, mũndũ o mũndũ arĩkuaga nĩ ũndũ wa mehia make we mwene.

7Ningĩ Amazia akĩũragĩra andũ ngiri ikũmi a Edomu o kũu Gĩtuamba-inĩ gĩa Cumbĩ, narĩo itũũra rĩa Seĩa akĩrĩhũranĩra mbaara akĩrĩtunyana akĩrĩtua Jokitheeli, narĩo rĩtũire rĩĩtagwo ũguo o na ũmũthĩ.

8Hĩndĩ ĩo Amazia akĩrekia andũ he Jehoashu wa Jehoahazu, mũrũ wa Jehu mũthamaki wa Isiraeli, akĩmwĩra atĩrĩ, Ũka tuonanie ng’aara.

9Nake Jehoashu, mũthamaki wa Isiraeli, akĩrekania kwĩ Amazia, mũthamaki wa Juda, akĩmwĩra atĩrĩ, Kwĩ hĩndĩ mahiũ ma nyeki-inĩ marĩa maarĩ Lebanoni maarekanirie he mũtarakwa ũrĩa warĩ Lebanoni, makĩwĩra atĩrĩ, He mũrũ wakwa mwarĩguo amũhikie atuĩke mũka; na hĩndĩ ĩo nyamũ ĩmwe ya gĩthaka kũu Lebanoni ĩkĩhĩtũka, ĩkĩrangĩrĩria mahiũ macio ma nyeki-inĩ.

10Wee-rĩ, ti-itherũ nĩ kũhũra ũhũrĩte Edomu, nayo ngoro yaku ĩgatũma wĩtũũgĩrie mũno; nĩ kaba ũgĩtũũre wĩnenehagia nĩ ũndũ wa ũndũ ũcio wĩkĩte, na ũikare o gwaku mũciĩ; no rĩrĩ, ũgũkĩenda gũcoka gwĩthũĩrĩra thambo nĩ ũndũ kĩ, wĩninithie wee mwene mwĩ na andũ a Juda?

11No rĩrĩ, Amazia ndaigana kũigua. Tondũ ũcio Jehoashu, mũthamaki wa Isiraeli, agĩkĩambata; nake we mwene na Amazia, mũthamaki wa Juda, makĩonanĩria ng’aara o kũu Bethi-shemeshu, itũũra rĩa Juda.

12Juda magĩgĩtorio nĩ Isiraeli, nao mũndũ o mũndũ magĩkĩũrĩra hema-inĩ ciao.

13Nake Jehoashu, mũthamaki wa Isiraeli, akĩnyitĩra Amazia mũthamaki wa Juda, mũrũ wa Jehoashu wa Ahazia, o kũu Bethi-shemeshu, agĩcoka agĩthiĩ agĩkinya Jerusalemu, agĩtharia rũirigo rũa mahiga rũa Jerusalemu kuuma kĩhingo-inĩ kĩa Efiraimu nginya o kĩhingo gĩa koine-inĩ, handũ ha mĩkono magana mana.

14Nake agĩthiĩ na thahabu yothe, o na betha, o na indo ciothe iria cionekire cia kũu nyũmba ya Jehova thĩinĩ, o na cia kũndũ kũrĩa kwaigagwo mũthithũ wa indo cia bata nyũmba ya mũthamaki, o na akĩnyita andũ a gũgakũũrũo thutha-inĩ, agĩcoka Samaria.

15Na rĩrĩ, ciĩko iria ingĩ iria Jehoashu ekire, o na hinya ũrĩa aarĩ naguo, na ũrĩa aahũranire na Amazia, mũthamaki wa Juda-rĩ, anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

16Nake Jehoashu agĩkoma hamwe na maithe, agĩthikwo kũu Samaria, hamwe na athamaki a Isiraeli; nake Jeroboamu, mũrũwe, agĩthamaka ithenya rĩake.

17Nake Amazia, mũrũ wa Joashu, mũthamaki wa Juda, agĩtũũra muoyo mĩaka ĩngĩ ikũmi na ĩtano thutha wa hĩndĩ ĩrĩa Jehoashu mũrũ wa Jehoahazu, mũthamaki wa Isiraeli, aakuire.

18Na rĩrĩ, ciĩko iria ingĩ cia Amazia-rĩ, anga itiandĩkĩtwo ibuku-inĩ rĩa maũndũ ma ihinda rĩa athamaki a Juda?

19Nao andũ makĩgĩa ndundu o kũu Jerusalemu mamũũkĩrĩre; nake agĩkĩũrĩra Lakishi; no rĩrĩ, nĩmaarekirie andũ mamũrũmĩrĩre o kũu Lakishi, makĩmũũragĩra kuo.

20Thutha wa ũguo magĩkĩmũcokia aigĩrĩirũo mbarathi igũrũ; agĩthikwo o kũu Jerusalemu itũũra rĩa Daudi hamwe na maithe.

21Nao andũ othe a Juda makĩoya Azaria, ũrĩa warĩ wa mĩaka ikũmi na ĩtandatũ, makĩmũtua mũthamaki ithenya rĩa ithe Amazia.

22Nĩwe waakithirie Elathu akĩrĩcokeria Juda, mũthamaki ũcio aarĩkia gũkoma hamwe na maithe.

23Na rĩrĩ, mwaka wa ikũmi na ĩtano ĩrĩa Amazia, mũrũ wa Joashu mũthamaki wa Juda, aakorirũo athamakĩte, nĩguo Jeroboamu, mũrũ wa Joashu mũthamaki wa Isiraeli, aambĩrĩirie gũthamaka kũu Samaria; agĩthamaka mĩaka mĩrongo ĩna na ũmwe.

24Nake agĩĩka maũndũ marĩa monagwo marĩ moru nĩ Jehova; na ndaigana gũtigana na mehia mothe ma Jeroboamu wa Nebati, marĩa ehirie na agĩtũma Aisiraeli o nao mehie nĩ ũndũ wamo.

25Nake agĩcokithia mũhaka wa bũrũri wa Isiraeli, kuuma o itonyero-inĩ rĩa Hamathu o nginya iria-inĩ rĩa Araba, o ta ũrĩa uuge wa Jehova, Ngai wa Isiraeli, watariĩ, ũrĩa aaririe na kanua ka ndungata yake Jona wa Amitai, o we ũrĩa warĩ mũnabii wa Gathi-heferi.

26Nĩ gũkorũo Jehova nĩonire atĩ gũthĩnio kũrĩa Aisiraeli maathĩnagio kwarĩ kũnene mũno; nĩ ũndũ gũtiatigarĩte andũ marĩ ũkombo-inĩ, o na kana matarĩ ũkombo-inĩ, o na kana gũkagĩa mũndũ wa gũteithia Isiraeli.

27Nake Jehova ndaigana kuuga atĩ nĩekũhuura rĩĩtwa rĩa Isiraeli rĩthenge gũkũ thĩ guothe; no nĩ kũhonokia aamahonokirie na ũndũ wa Jeroboamu, mũrũ wa Joashu.

28Na rĩrĩ, ciĩko iria ingĩ cia Jeroboamu, o na maũndũ mothe marĩa ekire, o na hinya ũrĩa aarĩ naguo, o na ũhoro wa ũrĩa aarũire mbaara, o na wa ũrĩa aacokithĩirie Isiraeli Dameski na Hamathu, matũũra marĩa maarĩ ma Juda tene-rĩ, maũndũ macio anga matiandĩkĩtwo ibuku-inĩ rĩa maũndũ ma ihinda rĩa athamaki a Isiraeli?

29Nake Jeroboamu agĩkoma hamwa na maithe, o acio maarĩ athamaki a Isiraeli nake Zekaria, mũrũwe, agĩthamaka ithenya rĩake.

← Chapter 13 Jump to: Chapter 15 →