2 Kings 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1Na gũgĩkinya atĩrĩ, atĩ hĩndĩ ĩrĩa Jehova aacirĩire kuoya Elija amũtware igũrũ na ũndũ wa kĩhuhũkanio kĩa rũhuho-rĩ, Elija ũcio nĩ gũthiĩ maathiaga na Elisha moimĩte Giligali.

2Nake Elija akĩĩra Elisha atĩrĩ, Ndagũthaitha ũikarage haha; nĩ ũndũ Jehova nĩandeketie ’thiĩ o nginya Beth-eli. Nake Elisha akĩmwĩra atĩrĩ, O ta ũrĩa Jehova atũũraga muoyo, o na ta urĩa wee mwene ũtũũraga muoyo-rĩ, ndingĩgũtiga. Tondũ ũcio magĩgĩikũrũka magĩkinya Beth-eli.

3Nao andũ a thiritũ ya ariũ a anabii arĩa maarĩ kũu Beth-eli makiumagara, magĩkinya he Elisha, makĩmũũria atĩrĩ, Nĩũramenya atĩ Jehova nĩekuoya mwathi waku, amweherie harĩ wee ũmũthĩ, atige gũcoka gũgwatha? Nake akiuga atĩrĩ, Ĩĩ, nĩnjũĩ; inyuĩ ta wĩkirĩrei.

4Ningĩ Elija akĩmwĩra atĩrĩ, Elisha, ndagũthaitha ũikarage hawa; nĩ ũndũ Jehova nĩandeketie ’thiĩ Jeriko. Nake akiuga atĩrĩ, O ta ũrĩa Jehova atũũraga muoyo, o na ta ũrĩa wee mwene ũtũũraga muoyo-rĩ, ndingĩgũtiga. Tondũ ũcio magĩgĩthiĩ magĩkinya Jeriko.

5Nao andũ a thiritũ ya ariũ a anabii arĩa maarĩ kũu Jeriko magĩkuhĩhĩria Elisha, makĩmũũria atĩrĩ, Nĩũramenya atĩ Jehova nĩekuoya mwathi waku, amweherie harĩ wee ũmũthĩ, atige gũcoka gũgwatha? Nake agĩcokia atĩrĩ, Ĩĩ, nĩnjũĩ; inyuĩ ta wĩkirĩrei.

6Ningĩ Elija akĩmwĩra atĩrĩ, Ndagũthaitha ũikarage haha; nĩ ũndũ Jehova nĩandeketie ’thiĩ Jorodani. Nake akiuga atĩrĩ, O ta ũrĩa Jehova atũũraga muoyo, o na ta ũrĩa wee mwene ũtũũraga muoyo-rĩ, ndingĩgũtiga. Magĩkĩgwata njĩra o erĩ.

7Na rĩrĩ, andũ mĩrongo ĩtano a thiritũ ya ariũ a anabii magĩthiĩ, makĩrũgama handũ haraya mang’ethanĩire nao; nao acio erĩ makĩrũgama hakuhĩ na Jorodani.

8Nake Elija akĩruta nguo yake ya igũrũ, akĩmĩkũnjakũnja, akĩgũtha maĩ, namo makĩgayũkana ũũ na ũũ, na tondũ ũcio o erĩ magĩkĩringĩra thĩ nyũmũ.

9Na gũgĩkinya atĩrĩ, atĩ maaringa mũrĩmo, Elija akĩĩra Elisha ũũ, Hoya ũndũ ũrĩa ũkwenda ngwĩke o mbere itanathengio harĩ wee. Nake Elisha akiuga atĩrĩ, Ndagũthaitha ũngaĩre magai merĩ ma hinya wa roho waku magĩe na niĩ.

10Nake akiuga atĩrĩ, Nĩwahoya ũndũ wĩ hinya; no rĩrĩ, ũngĩkorũo nĩũrĩnyona ngĩeherio harĩ wee-rĩ, ũndũ ũcio nĩũrĩgũkora; no kũngĩkorũo ti ũguo, ũndũ ũcio ndũrĩgũkora.

11Na gũgĩkinya atĩrĩ, atĩ hĩndĩ ĩrĩa maathiaga na njĩra o ro ũguo, makĩaranagĩria-rĩ, atĩrĩrĩ, makiumĩrĩrũo nĩ ngari yarĩrĩmbũkaga ta mwaki, o na mbarathi ciarĩrĩmbũkaga ta mwaki, ikĩmagayũkania o erĩ magĩtigana; nake Elija agĩkĩambatio igũrũ na kĩhuhũkanio kĩa rũhuho.

12Nake Elisha agĩkĩona ngari ĩo, akĩanĩrĩra akiuga atĩrĩ, Ĩ baba, ĩ baba-ĩ! Nĩwe ũrarĩ ngari cia Isiraeli o na andũ arĩa mathiaga mahaicĩte mbarathi ciakuo! No ndaigana gũcoka kũmuona. Nake agĩkĩnyita nguo ciake mwene, agĩcitembũrania icunjĩ igĩrĩ.

13Ningĩ akĩoya nguo ya igũrũ ya Elija, ĩrĩa yagũĩte thĩ yumĩte harĩ we, akĩhũndũka, akĩrũgama hũgũrũrũ-inĩ cia Jorodani.

14Agĩkĩoya nguo ĩo ya igũrũ ya Elija ĩrĩa yagũĩte thĩ yumĩte harĩ we, akĩgũtha maĩ nayo akiugaga atĩrĩ, Jehova, Ngai wa Elija, arĩ ha? Na rĩrĩ, hĩndĩ ĩrĩa o nake aagũthire maĩ-rĩ, makĩgayũkana ũũ na ũũ; nake Elisha agĩkĩringa mũrĩmo.

15Na rĩrĩ, hĩndĩ ĩrĩa ariũ a anabii arĩa maaikaire mamũng’etheire kũu Jeriko maamuonire-rĩ, makiuga atĩrĩ, Roho wa Elija nĩũgũtũũra na Elisha. Nao magĩgĩthiĩ kũmũthagania, makĩinamĩrĩra o hau thĩ mbere yake,

16makĩmwĩra ũũ: Atĩrĩrĩ, ithuĩ, ndungata ciaku, twĩ na andũ marĩ hinya mĩrongo ĩtano; twagũthaitha ũreke mathiĩ magacarie mwathi waku; nĩ getha hihi roho wa Jehova ndũgakorũo ũmũiyũkĩtie, ũkamũikia kũndũ kĩrĩma-inĩ kĩmwe, kana o kĩanda-inĩ. Nake agĩkiuga atĩrĩ, Tigai kũrekania.

17Nao rĩrĩa maamũringĩrĩirie o nginya agĩconoka-rĩ, agĩkiuga atĩrĩ, Kĩmarekiei. Magĩkĩrekia andũ mĩrongo ĩtano, nao makĩmũcaria mĩthenya ĩtatũ, no matiamuonire.

18Magĩkĩmũcokerera, tondũ aaikarĩte o Jeriko; nake akĩmera atĩrĩ, Githĩ ndiamwĩrire, Tigai gũthiĩ?

19Nao andũ a itũũra rĩu magĩkĩĩra Elisha ũũ: Atĩrĩrĩ, twagũthaitha, ta rora handũ haha itũũra rĩrĩ rĩrĩ, atĩ nĩ hega mũno, o ta ũrĩa wee, mwathi witũ ũkwĩonera; no rĩrĩ, maĩ maho nĩ moru, o naguo tĩri waho nĩũhunithagia ũhiũ.

20Nake agĩkiuga atĩrĩ, Ta ndeherei kanyũngũ kerũ, na mũgekĩre cumbĩ thĩinĩ. Nao magĩgatwara harĩ we.

21Nake agĩkiumagara agĩthiĩ itherũkĩro-inĩ rĩa maĩ macio, agĩikia cumbĩ kuo thĩinĩ, akiuga atĩrĩ, Jehova oiga ũũ: Nĩndathondeka maĩ maya; gwata rĩu matikanacoke gũtũma kũgĩe gĩkuũ, kana matũme bũrũri ũhunithie ũhiũ.

22Tondũ ũcio maĩ macio makĩninwo ũũru wamo, ũkĩaga gũcoka kuoneka o na ũmũthĩ, o ta ũrĩa ũhoro wa Elisha watariĩ ũcio aarĩtie.

23Nake akĩambata akiuma kũu athiĩ Beth-eli; na rĩrĩ, hĩndĩ ĩrĩa aambataga agĩthiĩ na njĩra o ro ũguo-rĩ, hagĩgĩũka tũhĩĩ tuumĩte na kũu itũũra-inĩ, tũkĩmũthekerera nĩ kũmũmena, tũkĩmwĩraga atĩrĩ, Ambata, kĩhara gĩkĩ; ĩ ndwambate, kĩhara gĩkĩ!

24Nake akĩroraga na thutha wake, agĩtuona, agĩtũruma akĩgwetaga rĩĩtwa rĩa Jehova. Naho hagĩkiumĩra nduba igĩrĩ cia mĩgoma gĩthaka-inĩ, igĩtarũranga tũhĩĩ mĩrongo ĩna na twĩrĩ thĩinĩ watuo.

25Nake agĩkiuma kũu, agĩkinya kĩrĩma-inĩ gĩa Karimeli, ningĩ oima kũu agĩcoka Samaria.

← Chapter 1 Jump to: Chapter 3 →