2 Kings 25

Kikuyu Bible (IBUKU RĨRĨA ITHERU RĨA NGAI)

← Chapter 24 Jump to:

1Na gũgĩkinya atĩrĩ, atĩ mwaka wa kenda ĩrĩa Zedekia aakorirũo athamakĩte, o mweri wa ikũmi, mũthenya wa ikũmi wa mweri ũcio-rĩ, Nebukadinezaru, mũthamaki wa Babuloni, agĩthiĩ we mwene o na mbũtũ yake yothe ya ita, akahũrane na Jerusalemu, nake akĩamba hema ciake arĩakĩrĩre, ningĩ andũ ake magĩaka inyamũ ndaya na igũrũ cia mũtharĩko mbarĩ ciothe cia rũirigo rũarĩo.

2Itũũra rĩu rĩgĩkĩrigicĩrio nĩ getha rĩtunyanwo o nginya mwaka wa ikũmi na ũmwe ĩrĩa Zedekia aakorirũo athamakĩte.

3Na rĩrĩ, mũthenya wa kenda wa mweri wa ĩna-rĩ, ng’aragu ĩgĩkorũo ĩĩhĩte mũno mũno itũũra-inĩ rĩu, o nginya gũkĩaga irio cia kũrĩo nĩ andũ a bũrũri ũcio.

4Hĩndĩ ĩo rũthingo rũa itũũra rũgĩthario handũ, nao andũ othe a ita makĩũra ũtukũ, makĩgera mũromo-inĩ ũrĩa wakuhanĩrĩirie na mũgũnda wa mũthamaki, gatagatĩ ga thingo cierĩ; (nao Akalidei nĩ kũrigicĩria maarigicĩirie itũũra rĩu na mbarĩ ciothe:) nake mũthamaki agĩĩthiĩra na njĩra ya Araba.

5No rĩrĩ, mbũtũ cia ita cia Akalidei igĩteng’eria mũthamaki, ikĩmũkinyĩrĩra o kũu werũ ũrĩa mwaraganu wa Jeriko; nayo mbũtũ yake yothe ya ita ĩkĩharaganio ĩkĩmũtiga.

6Hĩndĩ ĩo Akalidei magĩkĩnyita mũthamaki makĩmũtwara kwĩ mũthamaki wa Babuloni o kũu Ribila; makĩmũtuĩra cira wa ũrĩa mekũmwĩka.

7Nao makĩũragĩra ariũ a Zedekia o hau mbere yake ameroreire, nake Zedekia we mwene makĩmũkũũra maitho, makĩmuoha na bĩngũ cia gĩcango, makĩmũtwara Babuloni.

8Na rĩrĩ, mũthenya wa mũgwanja wa mweri wa ĩtano mwaka-inĩ wa ikũmi na kenda ĩrĩa mũthamaki Nebukadinezaru, o ũcio mũthamaki wa Babuloni, aakorirũo athamakĩte-rĩ, Nebuzaradani, mũnene ũmwe wa arangĩri ake, ndungata ya mũthamaki wa Babuloni, agĩkinya Jerusalemu;

9nake agĩgĩcina nyũmba ya Jehova, na nyũmba ya mũthamaki, o na nyũmba ciothe cia Jerusalemu, o iria ciothe ciarĩ nene; agĩcicina na mwaki.

10Nayo mbũtũ yothe ya ita cia Akalidei, ĩrĩa yarĩ na mũnene ũcio wa arangĩri, ĩgĩtharia thingo cia Jerusalemu mbarĩ ciothe.

11O namo matigari ma andũ arĩa maatigarĩte kũu itũũra-inĩ, o na andũ arĩa metwarĩte o ene harĩ mũthamaki wa Babuloni, o na matigari ma kĩrĩndĩ kĩrĩa kĩngĩ, Nebuzaradani, mũnene wa arangĩri, akĩmataha.

12No rĩrĩ, mũnene ũcio wa arangĩri agĩtiga andũ amwe athĩni mũno a bũrũri ũcio kuo matuĩke acehi mĩthabibu, o na arĩmi.

13Nacio itugĩ cia icango iria ciarĩ o kũu nyũmba ya Jehova thĩinĩ, o na inyamũ iria ciahaanaga ngari, o na itangi rĩrĩa rĩetagwo karia ga gĩcango rĩrĩa rĩarĩ o kũu nyũmba ya Jehova thĩinĩ, Akalidei magĩciũraganga tũcunjĩ, nakĩo gĩcango gĩacio magĩgĩtwara kũu Babuloni.

14O nacio nyũngũ, o na ihakũri, o na tũmĩĩhato twa mũrarĩ wa ndambĩ, o na iciko, o na indo ciothe cia gĩcango iria ciarutagwo wĩra nacio, magĩcioya, magĩthiĩ nacio.

15O nacio ngĩo cia makara o na mbakũri-rĩ, mũnene ũcio wa arangĩri agĩthiĩ o na iria ciarĩ cia thahabu theri, kana o betha theri.

16Nacio itugĩ icio cierĩ, o na karia karĩa kaarĩ kuo, o na inyamũ iria ciahaanaga ngari, o icio Suleimani aathondekete cia kũigwo nyũmba ya Jehova-rĩ, gĩcango kĩa indo icio ciothe gĩtiathimĩkire nĩ kũingĩha.

17Ũraihu wa gĩtugĩ kĩmwe warĩ mĩkono ikũmi na ĩnana, na igũrũ rĩakĩo kwarĩ kĩongo kĩrĩ gĩthiũrũrĩ gĩa gĩcango; o naguo ũraihu wa kĩongo kĩu warĩ mĩkono ĩtatũ; na nĩkwarĩ kĩnyamũ gĩtumĩtwo ta rũgara, o na makomamanga, kĩongo-inĩ kĩu igũrũ, nacio indo icio ciothe ciarĩ cia gĩcango. Na rĩrĩ, gĩtugĩ kĩrĩa gĩa kerĩ nakĩo gĩathondeketwo o ro ũguo ta kĩu kĩngĩ, gĩĩkĩrĩtwo kĩnyamũ ta rũgara o ũndũ ũmwe.

18Nake mũnene ũcio wa arangĩri akĩnyita Seraia, mũthĩnjĩri-Ngai mũnene, o na Zefania mũthĩnjĩri-Ngai ũrĩa mũnyinyi wa kerĩ, o na andũ arĩa atatũ maaikaragia mũrango;

19nakuo kũu itũũra-inĩ thĩinĩ akĩnyita mũrori ũmwe wa maũndũ ma nyũmba ya mũthamaki ũrĩa wehokeirũo ũrori wa andũ a ita; o na andũ atano thĩinĩ wa arĩa maaikaranagia na mũthamaki, arĩa aakorire itũũra-inĩ rĩu; o na karani wa mũnene wa mbũtũ cia ita ũrĩa waandĩkaga andũ a bũrũri a gũthiĩ ita; o na andũ angĩ mĩrongo ĩtandatũ a bũrũri ũcio arĩa monekire itũũra-inĩ rĩu.

20Nebuzaradani, mũnene ũcio wa arangĩri, agĩkĩmanyita, akĩmatwarĩra mũthamaki wa Babuloni o kũu Ribila.

21Nake mũthamaki wa Babuloni akĩmahũra akĩmoragĩra o kũu Ribila, bũrũri wa Hamathu. Ũguo nĩguo andũ a Juda maatahirũo makĩrutwo bũrũri wao.

22Na rĩrĩ, ha ũhoro wa andũ arĩa maatigarire kũu bũrũri wa Juda, o arĩa Nebukadinezaru mũthamaki wa Babuloni aatigire kuo-rĩ, agĩtua Gedalia mũrũ wa Ahikamu wa Shafani barũthi wao amaathage.

23Na rĩrĩ, hĩndĩ ĩrĩa anene othe a athigari a ita, me hamwe na andũ ao, maaiguire atĩ mũthamaki wa Babuloni nĩatuĩte Gedalia barũthi wao, magĩgĩthiĩ he Gedalia o kũu Mizipa me hamwe na andũ ao; nao arĩa maathiire nĩ Ishumaeli wa Nethania, na Johanani wa Karea, na Seraia wa Tanihumethu, ũrĩa warĩ Mũnetofathi; na Jaazania, mũrũ wa Mũmaakathi.

24Nake Gedalia akĩaria nao akĩmera na mwĩhĩtwa, o ene, o na andũ ao, atĩrĩ, Tigai gwĩtigĩra nĩ ũndũ wa ndungata cia Akalidei; tũũrai bũrũri ũyũ mũtungatagĩra mũthamaki wa Babuloni, na nĩmũkona wega.

25No rĩrĩ, mweri wa mũgwanja gũgĩkinya atĩrĩ, atĩ Ishumaeli, mũrũ wa Nethania wa Elishama, wa mbarĩ ya mũthamaki, agĩthiĩ e na andũ ikũmi, nao makĩhũra Gedalia o nginya agĩkua, na makĩũraga Ayahudi o na Akalidei arĩa maarĩ hamwe nake kũu Mizipa.

26Nao andũ othe arĩa anyinyi o na arĩa anene, o na anene a athigari, magĩũkĩra magĩthiĩ magĩkinya Misiri; nĩ gũkorũo nĩmetigagĩra Akalidei.

27Na gũgĩkinya atĩrĩ, atĩ mwaka wa mĩrongo ĩtatũ na mũgwanja kuuma hĩndĩ ĩrĩa Jehoiakini, mũthamaki wa Juda aatahirũo, o mweri wa ikũmi na ĩĩrĩ, o na mũthenya wa mĩrongo ĩĩrĩ na mũgwanja wa mweri ũcio-rĩ, Evili-merodaku, mũthamaki wa Babuloni, o ro mwaka ũrĩa aambĩrĩirie gũthamaka, agĩtũũgĩria Jehoiakini, mũthamaki wa Juda, akĩmũruta korokoro;

28nake akĩmwarĩria na ũhoreri, akĩmũtũũgĩria na ũndũ wa kũiga gĩtĩ gĩake gĩa ũthamaki mbere ya itĩ cia athamaki arĩa angĩ maarĩ hamwe nake kũu Babuloni.

29Nake akĩmũkũũranĩria nguo ciake cia korokoro-inĩ, nake Jehoiakini agĩgĩtũũra arĩanagĩra irio nake matukũ mothe marĩa aatũũrire muoyo.

30Naho ha ũhoro wa indo cia kũmũtũũria-rĩ, aaheagwo hĩndĩ ciothe nĩ mũthamaki, o mũthenya indo ciaguo, matukũ mothe marĩa aatũũrire muoyo.

← Chapter 24 Jump to: