2 Kings 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1Na rĩrĩ, Jehoramu, mũrũ wa Ahabu, aambĩrĩirie gũthamakĩra Isiraeli, o kũu Samaria, mwaka wa ikũmi na ĩnana ĩrĩa Jehoshafatu, mũthamaki wa Juda, aakorirũo athamakĩte, nake agĩthamaka mĩaka ikũmi na ĩĩrĩ.

2Nake agĩgĩĩka maũndũ marĩa monagwo marĩ moru nĩ Jehova, no rĩrĩ, ti ta ũrĩa ithe na nyina mekaga; nĩ ũndũ nĩeheririe gĩtugĩ kĩrĩa ithe ehandĩire gĩa gũtuĩka ihoero rĩa Baali.

3No nĩaarũmanĩrĩire mũno na mehia ma Jeroboamu wa Nebati, marĩa ehirie we mwene na agĩtũma Aisiraeli o nao mehie nĩ ũndũ wamo; na ndaigana gũtigana namo.

4Na rĩrĩ, Mesha, mũthamaki wa Moabi, aarĩ gĩtonga kĩnene kĩa ng’ondu, nake nĩaaheaga mũthamaki wa Isiraeli guoya wa tũtũrũme ngiri igana rĩmwe, o na wa ndũrũme nene ngiri igana rĩmwe.

5No nĩgwakinyire atĩrĩ, atĩ Ahabu aakua, mũthamaki ũcio wa Moabi agĩũkĩrĩra mũthamaki wa Isiraeli, akĩmũrema.

6Hĩndĩ ĩo Jehoramu, ũcio mũthamaki, agĩkiuma Samaria, agĩcokanĩrĩria Aisiraeli othe.

7Ningĩ akĩrekania he Jehoshafatu, mũthamaki wa Juda, akĩmwĩra atĩrĩ, Mũthamaki wa Moabi nĩanjũkĩrĩire akanema; rĩu-rĩ, nĩũgwĩtĩkĩra gũtwarana na niĩ, tũkahũrane mbaara na Moabi? Nake akiuga atĩrĩ, Ĩĩ, nĩngwambata; niĩ tũrĩ o ũndũ ũmwe nawe, nao andũ akwa no ta andũ aku o nacio mbarathi ciakwa no ta mbarathi ciaku.

8Agĩgĩcoka akĩũria atĩrĩ, Tũkwambatĩra njĩra ĩrĩkũ? Nake agĩcokia atĩrĩ, Nĩ njĩra ya werũ wa Edomu.

9Tondũ ũcio mũthamaki wa Isiraeli agĩgĩthiĩ me na mũthamaki wa Juda o na mũthamaki wa Edomu; nao magĩthiĩ rũgendo mĩthenya mũgwanja rũa kĩrigicũko, makĩaga maĩ ma kũnyuo nĩ andũ a ita, o na nyamũ iria ciamoimĩte thutha.

10Nake mũthamaki wa Isiraeli agĩkiuga atĩrĩ, Wũi-ĩiya-witũ-ĩ! Anga Jehova atwĩtĩte, ithuĩ athamaki atatũ, tũũngane, nĩguo atũrekererie atũneane moko-inĩ ma Amoabi.

11No rĩrĩ, Jehoshafatu akĩũria atĩrĩ, Kaĩ gũkũ gũtarĩ mũnabii wa Jehova nĩguo atũtuĩrĩrie ũhoro he Jehova? Nake mũndũ ũmwe wa ndungata cia mũthamaki wa Isiraeli agĩcokia akiuga atĩrĩ, Elisha wa Shafatu e gũkũ, o we ũcio waitagĩrĩria Elija maĩ moko.

12Nake Jehoshafatu agĩkiuga atĩrĩ, Ũhoro wa Jehova nĩwe wĩ naguo. Tondũ ũcio mũthamaki wa Isiraeli, na Jehoshafatu, o na mũthamaki wa Edomu, magĩgĩikũrũka magĩkiya harĩ we.

13Nake Elisha agĩkĩũria mũthamaki wa Isiraeli atĩrĩ, Ndĩ na ũhoro ũrĩkũ nawe? Ndũthiĩ harĩ anabii a thoguo, o na harĩ anabii a nyũkwa. Nake mũthamaki wa Isiraeli akĩmwĩra atĩrĩ, Aca, nĩ ũndũ-rĩ, Jehova atwĩtĩte, ithuĩ athamaki aratũ, tũũngane, nĩguo atũrekererie atũneane moko-inĩ ma Amoabi.

14Nake Elisha akiuga atĩrĩ, O ta ũrĩa Jehova Mũnene wa ita atũũraga muoyo, o we ũrĩa niĩ ndũgamaga mbere yake-rĩ, ti-itherũ tiga ngũconoka nĩ ũndũ atĩ Jehoshafatu, mũthamaki wa Juda, e ho ndingĩarora na harĩ wee, kana ngũcũthĩrĩrie.

15No rĩrĩ, rĩu ta ndeherei mũinia wa kĩnanda kĩa ndigi. Na gũgĩkinya atĩrĩ, atĩ hĩndĩ ĩrĩa mũinia ũcio wa kĩnanda kĩa ndigi aainirie-rĩ, guoko kwa Jehova gũgĩkora Elisha.

16Nake agĩkiuga atĩrĩ, Jehova oiga ũũ: Enjithia mĩtaro gĩtuamba gĩkĩ ĩiyũre kuo.

17Nĩ gũkorũo Jehova oigĩte ũũ: Mũtikona rũhuho, kana muone mbura; no rĩrĩ, gĩtuamba gĩkĩ nĩgĩkũiyũra maĩ; na nĩmũkũmanyua, inyuene, o na ũhiũ wanyu, o na nyamũ cianyu ciothe.

18Na rĩrĩ, ũndũ ũcio nĩ mũhũthũ mũno ũkĩonwo nĩ Jehova, nĩ ũndũ o nao Amoabi nĩekũmarekereria amaneane moko-inĩ manyo.

19Narĩo itũũra rĩrĩa rĩothe rĩirigĩtwo nĩmũkũrĩhũra, o na itũũra rĩrĩa rĩothe rĩega; na mũgũithie mũtĩ o wothe ũrĩa mwega, na mũthike ithima ciothe cia maĩ, o na gĩcigo kĩrĩa gĩothe kĩega gĩa gĩthaka mũgĩthũkie na mahiga.

20Na gũgĩkinya atĩrĩ, atĩ rũcinĩ rũrũ rũngĩ, o ta ihinda rĩrĩa rĩrutagwo igongona, atĩrĩrĩ, hagĩgĩũka maĩ moimĩte na njĩra ya Edomu, naguo bũrũri ũcio ũkĩiyũra maĩ.

21Na rĩrĩ, hĩndĩ ĩrĩa Amoabi othe maaiguire atĩ athamaki acio nĩmaambatĩte makahũrane nao, magĩĩcokanĩrĩria othe hamwe, o arĩa othe maarĩ aiganu a kwĩoha indo cia mbaara, hamwe na arĩa maatũire maciĩohaga, magĩthiĩ makĩrũgama mũhaka-inĩ wa bũrũri wao.

22Nao Amoabi acio makĩroka gũũkĩra rũcinĩ tene, narĩo riũa rĩkĩara maĩ-inĩ macio igũrũ, magĩkĩona maĩ macio maang’etheire matunĩhĩte makahaana o ta thakame;

23magĩkiuga atĩrĩ, Ĩno nĩ thakame; ti-itherũ athamaki acio nĩmaninĩtwo; nĩ kũũragana moraganĩte, o mũndũ akoraga ũrĩa ũngĩ; na tondũ ũcio rĩu, inyuĩ Amoabi aya, nĩtũgĩtahei!

24Na rĩrĩ, hĩndĩ ĩrĩa maakinyire kĩraaro-inĩ gĩa Isiraeli, Aisiraeli magĩũkĩra makĩhũra Amoabi acio o nginya makĩmorĩra; magĩgĩthiĩ na mbere o kũu bũrũri wao thĩinĩ makĩhũraga Amoabi.

25Nao makĩananga matũũra mao, o na gĩcigo kĩrĩa gĩothe kĩega gĩa gĩthaka, andũ othe, o mũndũ agĩgĩikia ihiga, magĩkĩiyũria, o nacio ithima ciothe cia maĩ magĩcithika, o nayo mĩtĩ ĩrĩa yothe mĩega makĩmĩtemenga; magĩgĩĩka kũndũ kũu guothe ũguo, tiga o Kiri-haresethu gwiki maatigire mahiga makuo; no rĩrĩ, andũ arĩa maaikagia mahiga na igũtha nĩmaaarĩthiũrũrũkire, makĩrĩhũra.

26Na rĩrĩ, mũthamaki wa Amoabi ona atĩ mbaara ikũmũrũrĩra mũno, agĩkĩoya andũ magana mũgwanja meohete hiũ cia njora agĩthiĩ nao, nĩguo matũrĩkie makinyĩre mũthamaki wa Edomu; no rĩrĩ, matiigana kũhota.

27Hĩndĩ ĩo agĩkĩnyita mũriũ ũrĩa mũkũrũ, o we ũrĩa ũngĩgathamaka ithenya rĩake, akĩmũruta atuĩke ihaki rĩa njino, akĩmũcinĩra igũrũ rĩa rũirigo rũa itũũra. Naho hagĩkĩgĩa marakara manene mũno nĩ ũndũ wa andũ a Isiraeli; nao Aisiraeli magĩtigana nake, magĩcoka bũrũri wao.

← Chapter 2 Jump to: Chapter 4 →