2 Kings 7

Kikuyu Bible (IBUKU RĨRĨA ITHERU RĨA NGAI)

← Chapter 6 Jump to: Chapter 8 →

1Nake Elisha agĩkiuga atĩrĩ, Ta igua uuge wa Jehova; Jehova oigĩte ũũ: Rũciũ ihinda o ta rĩrĩ-rĩ, kĩbaba kĩnene kĩa mũtu ũrĩa mũhinyu mũno gĩkendagio cekeri ĩmwe, o nacio ibaba igĩrĩ nene cia cairi ikendagio cekeri ĩmwe, o kũu kĩhingo-inĩ gĩa Samaria.

2Nake mũnene ũrĩa mũthamaki etiiranagia na guoko gwake agĩcokeria mũndũ ũcio wa Ngai, akĩmwĩra ũũ: Atĩrĩrĩ, o na Jehova angĩtua ndirica igũrũ-rĩ, anga ũndũ ũcio wekĩka? Nake Elisha agĩkiuga ũũ: Atĩrĩrĩ, ũndũ ũcio nĩũkawĩyonera na maitho iaaaku, no irio icio ndũgacirĩa.

3Na rĩrĩ, hau itonyero-inĩ rĩa kĩhingo gĩa itũũra-rĩ, haarĩ andũ ana a mangũ; nao magĩkĩũrania o mũndũ na mũndũ ũrĩa ũngĩ atĩrĩ, Hĩ, tũgũgĩikara haha o nginya tũgakuaa nĩ ũndũ kĩ?

4Tũngiuga uũ: Nĩtũgũtonya itũũra, o nakuo kũu itũũra-inĩ kũrĩ o ng’aragu, na no tũrĩkuĩra kuo; o na ningĩ twaikara haha no tũrĩkua. Tondũ ũcio gĩũkei tũkagũe moko-inĩ ma ita ya Asuriata; nao maatũhonokia tũtũũre muoyo-rĩ, tũgĩtũũre; no maatũũraga, tũgĩkue twehere.

5Magĩkĩroka gũũkĩra na maairia nĩguo mathiĩ kĩraaro-inĩ gĩa Asuriata. Nao maakinya o nyumĩrĩra-inĩ ya kĩraaro kĩu gĩa Asuriata-rĩ, magĩkora hatirĩ mũndũ o na ũmwe.

6Nĩ ũndũ Jehova nĩaatũmĩte mbũtũ cia ita cia Asuriara ciigue mũruruno ta wa ngari cia ita, o na mũrurumo ta wa mbarathi, o ta arĩ mũrurumo wa mbũtũ nene mũno ya ita; nao magĩkĩĩrana o mũndũ na mũndũ atĩrĩ, Hĩ! Mũthamaki wa Isiraeli nĩatũhakanĩrĩire harĩ athamaki a Ahiti, na athamaki a Misiri, nĩguo moke matũtharĩkĩre.

7Na tondũ ũcio makĩroka gũũkĩra na mairia makĩũra, magĩtiga hema ciao, na mbarathi ciao, na ndigiri ciao, o nakĩo kĩraaro kĩao magĩgĩtiga o ro ũguo o ta ũrĩa gĩatariĩ, magĩkĩũra nĩguo mahonokie mĩoyo yao.

8Na rĩrĩ, hĩndĩ ĩrĩa andũ acio a mangũ maakinyire nyumĩrĩra ya kĩraaro-rĩ, magĩtonya hema ĩmwe, makĩrĩa irio na makĩnyua, magĩcoka magĩkuua betha na thahabu o na nguo, macirutĩte kuo, magĩthiĩ magĩcihitha; ningĩ makĩhũndũka, magĩtonya hema-inĩ ĩngĩ, makĩruta indo ingĩ kuo, magĩthiĩ magĩcihitha.

9Magĩgĩcoka makĩĩrana o mũndũ na mũndũ ũrĩa ũngĩ atĩrĩ, Tũtireka wega; ũmũthĩ-rĩ, nĩguo mũthenya wa kũheanwo ũhoro mwega, na ithuĩ no gũkira tũkirĩte ki; tũngĩikara o nginya hĩndĩ ĩrĩa kũrĩkĩa-rĩ, ũũru nĩũgũtũcokerera; tondũ ũcio rekei tũthiĩ tũkahe andũ a nyũmba ya mũthamaki ũhoro ũyũ.

10Tondũ ũcio magĩgĩthiĩ magĩĩta aikaria kĩhingo gĩa itũũra makĩmahe ũhoro, makiuga atĩrĩ, Tũthiire twakinya kĩraaro-inĩ gĩa Asuriata; na atĩrĩrĩ, twakora hatarĩ mũndũ o na ũmwe, kana muugio wa mũndũ o na ũmwe; tiga o mbarathi tũkorire ciohetwo, o na ndigiri ikohwo, o nacio hema twacikora o ro ũguo o ta ũrĩa iratariĩ.

11Nao aikaria acio a kĩhingo magĩkĩanĩrĩra makĩheana ũhoro ũcio kũu nyũmba ya mũthamaki.

12Nake mũthamaki akĩarahũka o ũtukũ, akĩĩra ndungata ciake atĩrĩ, Rĩu nĩngũmuonia ũrĩa Asuriata matwĩkĩte. Nĩmoĩ atĩ tũrĩ ahũtu; na tondũ ũcio mathiĩte makoima kĩraaro-inĩ nĩguo makehithe na kũu gĩthaka-inĩ, makoiga atĩrĩ, Hĩndĩ ĩrĩa mariuma itũũra-inĩ-rĩ, nĩguo twĩmagwata mĩgwate, tũcoke tũtonye itũũra.

13Mũndũ ũmwe wa ndungata ciake agĩgĩcokia, akiuga atĩrĩ, Ndagũthaitha ũreke andũ amwe manyite mbarathi ithano, thĩinĩ wa iria itigarĩte, o icio itigarĩte itũũra-inĩ, (na atĩrĩrĩ, icio itariĩ o ta kĩrĩndĩ gĩothe gĩa Isiraeli, kĩrĩa gĩtigĩtwo gĩikarĩte gũkũ thĩinĩ; na igaikara o ta kĩrĩndĩ gĩothe gĩa Isiraeli gĩkĩ gĩkũninwo;) reka tũrekie andũ makarore ũrĩa gũtariĩ.

14Tondũ ũcio magĩkĩoya ngari igĩrĩ cia ita hamwe na mbarathi, nake mũthamaki agĩkĩrekia andũ marũmĩrĩre mbũtũ cia ita cia Asuriata, akiuga atĩrĩ, Ta thiĩi mũkarore ũrĩa gũtariĩ.

15Nao magĩkĩmarũmĩrĩra o nginya magĩkinya Jorodani; na atĩrĩrĩ, kũu njĩra-inĩ guothe kwaiyũrĩte nguo o na indo iria Asuriata maateete marĩ ihenya-inĩ. Nao andũ acio maareketio makĩhũndũka, makĩhe mũthamaki ũhoro ũcio.

16Nao andũ makiumagara, magĩtaha indo kĩraaro-inĩ gĩa Asuriata. Na tondũ ũcio kĩbaba kĩmwe kĩnene kĩa mũtu mũhinyu mũno kĩendagio cekeri ĩmwe, o nacio ibaba igĩrĩ nene cia cairi ikendio cekeri ĩmwe, o ta ũrĩa uuge wa Jehova watariĩ.

17Nake mũthamaki agĩgĩtua atĩ mũnene ũcio etiiranagia na guoko gwake aikarie kĩhingo gĩa itũũra; nao andũ makĩmũrangĩrĩria o hau kĩhingo-inĩ kĩu, agĩgĩkua, o ta ũrĩa mũndũ wa Ngai oigĩte, hĩndĩ ĩrĩa mũthamaki aaikũrũkire agĩthiĩ harĩ we.

18Na gũgĩkinya atĩrĩ, atĩ ũhoro ũcio ũgĩtuĩka o ta ũrĩa mũndũ ũcio wa Ngai erĩte mũthamaki, akoiga ũũ: Atĩrĩrĩ, ibaba igĩrĩ nene cia cairi ĩkoima cekeri ĩmwe, o na kĩbaba kĩmwe kĩnene kĩa mũtu ũrĩa mũhinyu mũno kiume cekeri ĩmwe, o kũu kĩhingo-inĩ gĩa Samaria, ihinda o ta rĩrĩ rũciũ;

19na hĩndĩ ĩo mũnene ũcio wa athigari agĩcokeria mũndũ ũcio wa Ngai akiuga ũũ: Hĩ! O na Jehova angĩtua ndirica igũrũ-rĩ, anga ũndũ ũcio wekĩka? Nake Elisha agĩkiuga ũũ: Atĩrĩrĩ, ũndũ ũcio nĩũkawĩyonera na maitho maku, no rĩrĩ, irio icio ndũgacirĩa;

20naguo ũguo noguo gwakinyire ũhoro-inĩ wake; nĩ gũkorũo nĩmaamũrangĩrĩirie o hau kĩhingo-inĩ, agĩkua.

← Chapter 6 Jump to: Chapter 8 →