Ecclesiastes 3

Kikuyu Bible (IBUKU RĨRĨA ITHERU RĨA NGAI)

← Chapter 2 Jump to: Chapter 4 →

1Atĩrĩrĩ, kĩndũ o gĩothe kĩrĩ na ihinda rĩakĩo, o na ũndũ o wothe ũrĩa ũrĩ gũkũ thĩ, ũrĩ na ihinda rĩaguo.

2Kũrĩ hĩndĩ ya gũciarũo, o na hĩndĩ ya gũkua; hĩndĩ ya kũhanda, o na hĩndĩ ya kũmunya kĩrĩa kĩhande;

3hĩndĩ ya kũũraga, o na hĩndĩ ya kũhonia; hĩndĩ ya gũtharia, o na hĩndĩ ya gwaka;

4hĩndĩ ya kũrĩra, o na hĩndĩ ya gũtheka; hĩndĩ ya gwĩthikĩra, o na hĩndĩ ya kũina.

5Hĩndĩ ya kũhurunja mahiga, o na hĩndĩ ya kũmacokereria; hĩndĩ ya kũhĩmbĩria, o na hĩndĩ ya kwĩhinga kũhĩmbĩria.

6Hĩndĩ ya gũcaria, o na hĩndĩ ya kũũrũo nĩ indo; hĩndĩ ya kũiga, o na hĩndĩ ya gũte.

7Hĩndĩ ya gũtembũra, o na hĩndĩ ya gũtuma; hĩndĩ ya gũkira ki, o na hĩndĩ ya kwaria;

8hĩndĩ ya kwenda, o na hĩndĩ ya gũthũũra; hĩndĩ ya mbaara, o na hĩndĩ ya thayũ.

9Mũndũ ũrĩa ũrutaga wĩra-rĩ, egunaga atĩa na wĩra ũcio etungumanagia naguo?

10Nĩnyonete mĩtangĩko ĩrĩa Ngai aheete ciana cia Adamu, nĩguo itangĩkage nayo.

11Ombire kĩndũ o gĩothe gĩthakare hĩndĩ yakĩo; o na ningĩ agĩĩkĩra kĩriga ngoro-inĩ ciao, matikanamenye wĩra ũrĩa Ngai aanaruta kuuma o kĩambĩrĩria nginya o ithirĩro.

12Nĩnjũĩ atĩ hĩndĩ ĩrĩa yothe megũtũũra muoyo, matirĩ ũndũ ũngĩ mangĩĩka ũhĩtũkanĩte na gũkena o na kwĩonera wega.

13O na ningĩ ngamenya atĩ kĩheo kĩa Ngai nĩ gĩkĩ, atĩ o mũndũ arĩage na anyuage, na onage wega mĩĩtungumanĩrie-inĩ yake yothe.

14Nĩnjũĩ atĩ ũndũ o wothe ũrĩa wĩkagwo nĩ Ngai ũgũtũũra tene na tene; ndũngĩongerereka, kana ũnyihanyihĩke; nake Ngai awĩkĩte, no getha andũ mamwĩtigagĩre.

15Ũrĩa gũtariĩ rĩu-rĩ, noguo gwatariĩ tene; na ũrĩa gũgatuĩka thutha-inĩ, no ũrĩa gwatariĩ tene; nake Ngai acaragia atĩ ũndũ ũrĩa wahĩtũkire ũcoke o ro ho.

16O na ningĩ makĩria ngĩona atĩ gũkũ thĩ kwaraga riũa, handũ harĩa hatuagĩrũo cira, waganu ũrĩ o ho; o na handũ harĩa harĩ ũthingu, waganu ũrĩ o ho.

17Ngĩkiuga na ngoro atĩrĩ, Ngai nĩwe ũgacirithia andũ arĩa athingu, o na arĩa aaganu; nĩ gũkorũo maũndũ mothe, o na mawĩra mothe marĩ na mahinda namo.

18Naho ha ũhoro wa ciana cia Adamu ngĩkiuga na ngoro atĩrĩ, gũtuĩkaga ũguo nĩ getha Ngai acigerie, nĩguo imenye atĩ ihaana o ta nyamũ.

19Nĩ gũkorũo maũndũ marĩa makoraga ciana cia Adamu, nomo makoraga nyamũ o ũndũ ũmwe; o ta ũrĩa andũ makuaga-rĩ, ũguo noguo ikuaga o nacio; ĩĩ, ti-itherũ harĩ ciũmbe ciothe roho no ũmwe; o na mũndũ ndarĩ handũ akĩrĩte nyamũ; nĩ ũndũ wothe no tũhũ.

20Othe mathiaga o kũndũ kũmwe; nĩ ũndũ othe moimire o tĩri-inĩ, nao othe magacoka matuĩke o tĩri.

21Nũ ũngĩkĩmenya kana hihi roho wa mũndũ nĩwambataga na igũrũ, naguo roho wa nyamũ ũgaikũrũka na thĩ?

22Tondũ ũcio ngĩkĩona atĩ hatirĩ ũndũ mwega ũhĩtũkanĩte na mũndũ gwĩkenia na mawĩra make, amu ũcio nĩguo igai rĩake; nĩ ũndũ-rĩ, nũ ũngĩkĩmũcokia rĩngĩ, nĩguo akona maũndũ marĩa makamũtua thutha?

← Chapter 2 Jump to: Chapter 4 →