Ecclesiastes 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to: Chapter 5 →

1Ningĩ gũkũ thĩ kwaraga riũa-rĩ, ndacokire ngĩona maũndũ marĩa mahinyanagĩrĩrio namo, ngĩkĩona maithori ma arĩa ahinyĩrĩrie, no matiarĩ na mũmahoreria; na mwena-inĩ wa arĩa mekũmahinyĩrĩria, kwĩ na hinya, no acio ahinyĩrĩrie matiarĩ na mũmahoreria.

2Tondũ ũcio ngĩkĩgatha andũ arĩa akuũ, o acio mekuĩrĩire o gatene, gũkĩra arĩa matigĩtwo muoyo, o acio me muoyo o na rĩu;

3no rĩrĩ, gũkĩra andũ a mĩthemba ĩo yerĩ-rĩ, nĩ mũndũ ũrĩa ũtarĩ waciarũo, o ũcio ũtarĩ wona maũndũ moru marĩa mekagwo gũkũ thĩ kwaraga riũa.

4Ningĩ ngĩkĩona wĩtungumanio wothe, o na mawĩra mothe marĩa marutagwo na ũũgĩ, atĩ moimanaga na mũndũ kũiguĩra ũrĩa ũngĩ ũiru. Ũndũ ũcio o naguo no wa tũhũ na gwĩthĩnia gũtheri.

5Kĩrimũ kĩĩgwatanagĩria moko, na gĩkerĩaga nyama cia mwĩrĩ wakĩo.

6Nĩ kaba kũiyũkia rũhĩ rũgima na ũhoreri gũkĩra kũnyita na ngundi igĩrĩ na mwĩtungumanio wa gwĩthĩnia gũtheri.

7Ningĩ gũkũ thĩ kwaraga riũa-rĩ, ngĩcoka ngĩona ũndũ wa tũhũ.

8Nĩkũrĩ mũndũ wa mũmwe, ũtarĩ na mũrunawe, ĩĩ, ti-itherũ ndarĩ mũriũ, kana mũrũ wa nyina; no rĩrĩ, ndathiragwo nĩ mwĩtungumanio, o na kana maitho make makahũna ũtonga. Nake oigaga atĩrĩ, Ndĩgĩĩtungumanagĩria ũ, ngĩimaga ngoro yakwa kwĩhũnĩrĩria maũndũ mega? Ũndũ ũcio o naguo nĩ wa tũhũ, ĩĩ, ti-itherũ nĩ wa gũtangĩka kũnene.

9Nĩ kaba andũ erĩ gũkĩra ũmwe, nĩ gũkorũo nĩmonaga uumithio mwega wa gwĩtungumania kwao.

10Nĩ ũndũ mangĩgũa thĩ, ũmwe no oe ũrĩa ũngĩ; no rĩrĩ, mũndũ ũmwe angĩgũa, na ndarĩ wa kũmuoya na igũrũ, kaĩ arĩ na haaro-ĩ!

11Ningĩ-rĩ, andũ erĩ mangĩkoma hamwe nĩmaiguithanagia ũrugarĩ; no mũndũ e wiki-rĩ, aakĩĩiguithia ũrugarĩ atĩa?

12O na mũndũ angĩhoota mũndũ ũrĩa wĩ wiki-rĩ, erĩ maahota kũmwĩtiiria; na mũhĩndo mũrame na ndigi ithatũ ndũngĩtuĩka narua.

13Nĩ kaba mwanake mũkĩa na mũũgĩ, gũkĩra mũthamaki mũkũrũ mũkĩgu, ũrĩa ũtangĩcoka gũtaarĩka.

14Nĩ gũkorũo oimire korokoro-inĩ atuwo mũthamaki; no ũcio ũngĩ, o na aciarĩirũo ũthamaki-inĩ wake, agĩtuĩka o mũkĩa.

15Ndakĩonire atĩ andũ othe arĩa marĩ muoyo gũkũ thĩ kwaraga riũa, me mwena wa mwanake ũcio, o we ũcio wa kerĩ, ũrĩa warũgamĩte handũ-inĩ hake.

16Andũ othe arĩa maathagwo nĩwe matingĩtarĩka; no rĩrĩ, arĩa magoka thutha-rĩ, matikamũkenera. Ĩĩ, ti-itherũ ũndũ ũcio o naguo no wa tũhũ, na gwĩthĩnia gũtheri.

← Chapter 3 Jump to: Chapter 5 →