Ecclesiastes 7

Kikuyu Bible (IBUKU RĨRĨA ITHERU RĨA NGAI)

← Chapter 6 Jump to: Chapter 8 →

1Nĩ kaba ngumo njega gũkĩra maguta ma goro marĩa manungaga wega: o na mũthenya wa gũkua, gũkĩra mũthenya wa gũciarũo.

2Nĩ kaba gũceera mũciĩ wĩ kĩrĩro, gũkĩra gũthiĩ mũciĩ wĩ iruga: nĩ ũndũ gĩkuũ nĩkĩo kĩninaga andũ othe; nao arĩa me muoyo no matũũre maririkanaga ndeto icio.

3Nĩ kaba kĩeha gũkĩra mĩtheko; nĩ ũndũ gũtuka gĩthiithi nĩgũtũmaga ngoro yagĩre.

4Ngoro cia andũ arĩa ogĩ-rĩ, ikoragwo ikĩrũmbũiya ũhoro wa mũciĩ ũrĩa wĩ kĩrĩro, no ngoro cia irimũ irũmbũyagia ũhoro wa mũciĩ ũrĩa wĩ gĩkeno.

5Nĩ kaba kũigua irũithia rĩa andũ arĩa ogĩ gũkĩra kũigua rũĩmbo rũa irimũ.

6Nĩ ũndũ o ta ũrĩa mwaki wa mĩigua ũtũratũrĩkaga wĩ nguruĩ ya nyũngũ, ũguo noguo mĩtheko ya kĩrimũ ĩtariĩ; ũndũ ũcio o naguo no

7wa tũhũ Ti-itherũ ũtunyani nĩũtũmaga mũndũ mũũgĩ akĩge, na ihaki rĩgate ũtaũku wa gũtaũkĩrũo maũndũ wega.

8Nĩ kaba kĩrĩkĩrĩro-inĩ kĩa ũndũ, gũkĩra kĩambĩrĩria-inĩ kĩaguo; nĩ kaba mũndũ wĩ ngoro ĩĩ gĩeterero gũkĩra ũrĩa wĩ ngoro ya mwĩtĩo.

9Tigaga kũhiũha kũrakara na ngoro yaku; nĩ ũndũ marakara matũũraga ngoro-inĩ cia irimũ.

10Tigaga kuuga atĩrĩ, Nĩ kĩ gĩatũmire matukũ ma tene maagĩre gũkĩra matukũ maya? Nĩ ũndũ ha ũhoro ũcio, ndũrĩ na ũũgĩ ũkĩũũria.

11Ũũgĩ nĩ mwega o ta igai; ĩĩ, nĩwagĩrĩte makĩria harĩ arĩa monaga riũa.

12Nĩ gũkorũo ũũgĩ nĩ mwĩgito; o ta ũrĩa mbia irĩ mwĩgito; no rĩrĩ, wega wa ũmenyi maũndũ nĩ ũyũ, atĩ ũũgĩ nĩũtũũragia mũndũ muoyo ũrĩa wĩ naguo.

13Ta wĩtaranie wĩra wa Ngai; kũndũ kũrĩa ogomirie-rĩ, nũ ũngĩhota gũkũrũnga?

14Mũthenya ũrĩa ũgaacĩire-rĩ, iyũrũo nĩ gĩkeno, o naguo mũthenya wa mũtino-rĩ, gĩĩcirie; nĩ ũndũ Ngai nĩaatũmire mĩthenya ĩo ĩtwarane, nĩ getha mũndũ ndakanamenye maũndũ marĩa makoneka thutha wake.

15Maũndũ maya mothe ndamonire matukũ-inĩ makwa ma ũkĩgu; nĩkũrĩ mũndũ mũthingu ũgĩaga gũkua o na ũthingu wake, na nĩkũrĩ mũndũ mwaganu wĩraihagĩria muoyo o agĩĩkaga maũndũ moru.

16Tiga gũthinga makĩria, kana kũũhĩga makĩria; ũkwenda kwĩũraga nĩkĩ?

17Tiga kwagana makĩria, kana gũkĩga; ũkwenda gũkua hĩndĩ yaku ĩtanakinya nĩkĩ?

18Nĩ wega wĩrute ũndũ ũcio; ĩĩ, ti-itherũ, o na ũtige kwĩamũra harĩ ũrĩa ũngĩ; nĩ ũndũ-rĩ, ũrĩa wĩtigagĩra Ngai nĩakahĩtũkana na macio mothe.

19Ũũgĩ nĩguo wĩkagĩra mũndũ mũũgĩ hinya gũkĩra aathani ikũmi arĩa me itũũra-inĩ.

20Ti-itherũ hatirĩ mũndũ mũthingu gũkũ thĩ wĩkaga o wega mũtheri, na ndehagia.

21Ningĩ-rĩ, tigaga gũthikĩrĩria ndeto ciothe iria ikwario, nĩ getha hihi ndũkaigue ndungata yaku ĩgĩkũruma.

22Nĩ ũndũ ngoro yaku o nayo nĩyũĩ atĩ kaingĩ o nawe, wee mwene, nĩũrumĩte andũ angĩ o ta ũguo.

23Maũndũ macio mothe ndamatuĩririe na ũũgĩ: ngiuga atĩrĩ, Nĩngũũhĩga; no rĩrĩ, ũũgĩ warĩ haraya na niĩ.

24Maũndũ marĩa marĩ kuo-rĩ, me haraya na niĩ, na makarikĩra mũno; nũ ũngĩkĩhota kũmamenya?

25Ndehũgũrire-ĩ, nayo ngoro yakwa ĩkĩgeria kũmenya, na gũtuĩria, o na kũmatha ũũgĩ na gĩtũmi kĩa maũndũ, o na kũmenya atĩ waganu nĩ ũkĩgu, o naguo ũkĩgu nĩ ũgũrũki:

26ngĩgĩcoka ngĩona ũndũ mũrũrũ gũkĩra gĩkuũ, naguo nĩ wa mũtumia ũrĩa wĩ ngoro ĩtariĩ ta mĩtego, o na ta ndigi ngonjanie cia kũgwatia, o namo moko make makahaana o ta nga: mũndũ ũrĩa wothe ũkenagia Ngai-rĩ, nĩakahonoka harĩ we; no rĩrĩ, mũndũ ũrĩa mwĩhia nĩagakumbatwo nĩwe.

27Atĩrĩrĩ, ũndũ ũcio nĩndĩwonete, ũguo nĩguo Mũhunjia ekuuga, ngĩringanagia ũndũ ũmwe na ũngĩ, nĩguo ’menye ũrĩa itũmi cia maũndũ itariĩ;

28nacio nĩcio ngoro yakwa ĩtũire ĩcaragia, no ndirĩ ndaciona; nyonete o mũndũ mũrũme ũmwe thĩinĩ wa andũ ngiri; no ndirĩ ndona mũndũ-wa-nja o na ũmwe thĩinĩ wao othe.

29Atĩrĩrĩ, ũndũ ũyũ wiki noguo nyonete, atĩ Ngai nĩombire andũ marĩ athingu; no rĩrĩ, o ene nĩmecarĩirie mawara maingĩ.

← Chapter 6 Jump to: Chapter 8 →